ਲਾਸ ਏਂਜਲਸ, 16 ਜਨਵਰੀ (ਪੋਸਟ ਬਿਊਰੋ)- ਅਮਰੀਕਾ 'ਚ ਕੱਲ੍ਹ ਇੰਜਣ 'ਚ ਆਏ ਤਕਨੀਕੀ ਨੁਕਸ ਕਾਰਨ ਸ਼ੰਘਾਈ ਜਾ ਰਹੇ ਜਹਾਜ਼ ਦੀ ਲਾਸਏਂਜਲਸ ਏਅਰਪੋਰਟ 'ਤੇ ਫਿਊਲ ਡੰਪਿੰਗ ਦੇ ਬਾਅਦ ਸੁਰੱਖਿਅਤ ਲੈਂਡਿੰਗ ਕਰਾਈ ਗਈ, ਪਰ ਇਸ ਦੌਰਾਨ ਡਿੱਗੇ ਤੇਲ ਦੀ ਲਪੇਟ 'ਚ ਆਉਣ ਨਾਲ ਇੱਕ ਸਕੂਲ ਦੇ 26 ਬੱਚਿਆਂ ਤੇ ਸਟਾਫ ਦੇ ਕੁਝ ਲੋਕਾਂ ਨੂੰ ਮਾਮੂਲੀ ਸੱਟਾਂ ਲੱਗੀਆਂ। ਉਨ੍ਹਾਂ ਨੂੰ ਡਾਕਟਰੀ ਸਹਾਇਤਾ ਦਿੱਤੀ ਗਈ ਹੈ।
ਫਿਊਲ ਡੰਪਿੰਗ ਪ੍ਰਕਿਰਿਆ ਵਿੱਚ ਜਹਾਜ਼ ਆਪਣਾ ਵਜ਼ਨ ਘੱਟ ਕਰਨ ਲਈ ਕੁਝ ਤੇਲ ਹਵਾ 'ਚ ਸੁੱਟ ਦੇਂਦਾ ਹੈ। ਹਵਾਬਾਜ਼ੀ ਕੰਪਨੀ ਡੈਲਟਾ ਦੇ ਬੁਲਾਰੇ ਐਡ੍ਰੀਅਨ ਜੀ. ਨੇ ਕਿਹਾ ਕਿ ਫਲਾਈਟ ਲਾਸ ਏਂਜਲਸ ਤੋਂ ਸ਼ੰਘਾਈ ਲਈ ਉਡੀ ਸੀ ਕਿ ਇੰਜਣ ਵਿੱਚ ਖ਼ਰਾਬੀ ਦਾ ਪਤਾ ਲੱਗਾ। ਇਸ ਉਤੇ ਜਹਾਜ਼ ਨੂੰ ਲਾਸ ਏਂਜਲਸ ਪਰਤਣ ਦਾ ਆਦੇਸ਼ ਦਿੱਤਾ ਗਿਆ। ਇਸ ਦੇ ਬਾਅਦ ਫਿਊਲ ਡੰਪਿੰਗ ਪ੍ਰਕਿਰਿਆ ਦੀ ਵਰਤੋਂ ਕਰ ਕੇ ਪਾਇਲਟ ਨੇ ਕੱਲ੍ਹ ਦੁਪਹਿਰ ਇਸ ਜਹਾਜ਼ ਨੂੰ ਸੁਰੱਖਿਅਤ ਲੈਂਡ ਕਰਵਾ ਦਿੱਤਾ, ਪਰ ਇਸ ਦੌਰਾਨ ਪਾਰਕ ਐਵੀਨਿਊ ਐਲੀਮੈੈਂਟ੍ਰੀ ਸਕੂਲ ਦੇ ਮੈਦਾਨ ਅਤੇ ਕਾਫ਼ੀ ਵੱਡੇ ਇਲਾਕੇ 'ਚ ਤੇਲ ਡਿੱਗਿਆ। ਫਾਇਰ ਬ੍ਰਿਗੇਡ ਦੇ ਅਧਿਕਾਰੀਆਂ ਮੁਤਾਬਕ ਸਕੂਲ ਦੇ 26 ਬੱਚਿਆਂ ਅਤੇ 11 ਅਧਿਆਪਕਾਂ ਤੇ ਮੁਲਾਜ਼ਮਾਂ ਨੇ ਚਮੜੀ 'ਚ ਜਲਨ ਤੇ ਸਾਹ ਲੈਣ 'ਚ ਦਿੱਕਤ ਦੀ ਸ਼ਿਕਾਇਤ ਕੀਤੀ ਸੀ।