ਦਮਿਸ਼ਕ, 16 ਜਨਵਰੀ (ਪੋਸਟ ਬਿਊਰੋ)- ਇਜ਼ਰਾਈਲ ਨੇ ਕੱਲ੍ਹ ਸੀਰੀਆ ਦੇ ਹੋਮਸ ਸੂਬੇ ਵਿੱਚ ਟੀ-4 ਫ਼ੌਜੀ ਹਵਾਈ ਅੱਡੇ 'ਤੇ ਕਈ ਮਿਜ਼ਾਈਲਾਂ ਦਾਗੀਆਂ। ਸੀਰੀਆ ਦੀ ਫ਼ੌਜ ਨੇ ਦਾਅਵਾ ਕੀਤਾ ਹੈ ਕਿ ਵਧੇਰੇ ਮਿਜ਼ਾਈਲਾਂ ਹਵਾਈ ਰੱਖਿਆ ਪ੍ਰਣਾਲੀ ਦੀ ਮਦਦ ਨਾਲ ਨਸ਼ਟ ਕਰ ਦਿੱਤੀਆਂ ਗਈਆਂ, ਪਰ ਚਾਰ ਮਿਜ਼ਾਈਲਾਂ ਬੇਸ ਕੈਂਪ ਤੱਕ ਪਹੁੰਚਣ 'ਚ ਕਾਮਯਾਬ ਰਹੀਆਂ। ਇਸ ਹਮਲੇ 'ਚ ਕਿਸੇ ਦੇ ਜਾਨੀ ਨੁਕਸਾਨ ਦੀ ਖ਼ਬਰ ਨਹੀਂ ਹੈ।
ਸੀਰੀਆ ਦੀ ਫ਼ੌਜ ਮੁਤਾਬਕ ਹਮਲੇ ਵਿੱਚ ਕੁਝ ਵਾਹਨਾਂ ਦੇ ਨੁਕਸਾਨੇ ਜਾਣੇ ਤੋਂ ਇਲਾਵਾ ਕਿਸੇ ਜਹਾਜ਼ ਨੂੰ ਕੋਈ ਨੁਕਸਾਨ ਨਹੀਂ ਪਹੁੰਚਿਆ। ਇਹ ਮਿਜ਼ਾਈਲਾਂ ਸੀਰੀਆ ਦੇ ਦੱਖਣੀ ਪੂਰਬੀ ਖੇਤਰ ਅਲ ਤਾਂਫ ਵੱਲੋਂ ਆਏ ਜਹਾਜ਼ਾਂ ਦੇ ਵੱਲ ਨੂੰ ਦਾਗੀਆਂ ਗਈਆਂ ਸਨ। ਇਸ ਇਲਾਕੇ 'ਚ ਅਮਰੀਕਾ ਦਾ ਇੱਕ ਫ਼ੌਜੀ ਅੱਡਾ ਹੈ।ਹਮਲੇ ਬਾਰੇ ਇਜ਼ਰਾਈਲ ਨੇ ਕੋਈ ਬਿਆਨ ਨਹੀਂ ਦਿੱਤਾ। ਅਮਰੀਕਾ ਦੀ ਹਮਾਇਤ ਹਾਸਲ ਇਜ਼ਰਾਈਲ ਇਸ ਗੱਲ 'ਤੇ ਜ਼ੋਰ ਦਿੰਦਾ ਹੈ ਕਿ ਸੀਰੀਆ ਵਿਚਲੀ ਈਰਾਨੀ ਫ਼ੌਜ ਜਾਂ ਉਸ ਦੀ ਹਮਾਇਤ ਵਾਲੇ ਅੱਤਵਾਦੀਆਂ ਨੂੰ ਉਹ ਕਿਸੇ ਵੀ ਸੂਰਤ ਏਥੇ ਪੈਰ ਨਹੀਂ ਜਮਾਉਣ ਦੇਵੇਗਾ। ਸੀਰੀਆ ਤੇ ਆਲੇ ਦੁਆਲੇ ਦੇ ਖੇਤਰਾਂ ਵਿੱਚ ਈਰਾਨ ਦੀ ਹਮਾਇਤ ਵਾਲੇ ਹਿਜ਼ਬੁੱਲਾ ਅਤੇ ਹੋਰ ਹਥਿਆਰਬੰਦ ਸੰਗਠਨਾਂ ਖ਼ਿਲਾਫ਼ ਇਜ਼ਰਾਈਲ ਪਹਿਲਾਂ ਵੀ ਹਮਲੇ ਕਰਦਾ ਰਿਹਾ ਹੈ। ਅਮਰੀਕਾ ਵੱਲੋਂ ਈਰਾਨੀ ਫ਼ੌਜੀ ਕਮਾਂਡਰ ਕਾਮਿਸ ਸੁਲੇਮਾਨੀ ਨੂੰ ਮਾਰ ਸੁੱਟਣ ਤੋਂ ਬਾਅਦ ਇਜ਼ਰਾਈਲ ਦਾ ਸੀਰੀਆ 'ਚ ਇਹ ਪਹਿਲਾ ਹਮਲਾ ਹੈ।