ਕਾਬੁਲ, 15 ਜਨਵਰੀ (ਪੋਸਟ ਬਿਊਰੋ)- ਅਫ਼ਗਾਨਿਸਤਾਨ ਸਰਕਾਰ ਦੇ ਬੁਲਾਰੇ ਨੇ ਕਿਹਾ ਹੈ ਕਿ ਕਿਸੇ ਵੀ ਕਿਸਮ ਦੀ ਸ਼ਾਤੀ ਵਾਰਤਾ ਤੋਂ ਪਹਿਲਾਂ ਤਾਲਿਬਾਨ ਨੂੰ ਜੰਗਬੰਦੀ ਦਾ ਐਲਾਨ ਕਰਨਾ ਹੋਵੇਗਾ। ਉਨ੍ਹਾਂ ਦੋ ਟੁੱਕ ਕਿਹਾ ਕਿ ਜੇ ਅੱਤਵਾਦੀ ਜਮਾਤ ਅਜਿਹਾ ਨਹੀਂ ਕਰਦੀ ਤਾਂ ਅਫ਼ਗਾਨ ਸਰਕਾਰ ਨਾਲ ਵਾਰਤਾ ਨਹੀਂ ਹੋਵੇਗੀ।
ਰਾਸ਼ਟਰਪਤੀ ਭਵਨ ਦੇ ਬੁਲਾਰੇ ਸਾਦਿਕ ਸਿੱਦੀਕੀ ਨੇ ਕਿਹਾ ਕਿ ਤਾਲਿਬਾਨ ਵੱਲੋਂ ਜੰਗਬੰਦੀ ਦਾ ਐਲਾਨ ਕੀਤੇ ਬਿਨਾਂ ਨਾ ਲੰਬੇ ਸਮੇਂ ਤੱਕ ਖੇਤਰ ਵਿੱਚ ਸ਼ਾਤੀ ਰਹਿ ਸਕਦੀ ਹੈ ਅਤੇ ਨਾ ਹਿੰਸਾ ਵਿੱਚ ਕਿਸੇ ਤਰਾਂ੍ਹ ਦੀ ਕਮੀ ਆਵੇਗੀ। ਇਸ ਦੌਰਾਨ ਇੱਕ ਸਰਕਾਰੀ ਸੂਤਰ ਨੇ ਕਿਹਾ ਹੈ ਕਿ ਤਾਲਿਬਾਨ ਨੇ ਹਿੰਸਾ ਵਿੱਚ ਕਮੀ ਲਈ ਇੱਕ ਯੋਜਨਾ ਬਣਾਈ ਹੈ ਪ੍ਰੰਤੂ ਉਹ ਅਫ਼ਗਾਨ ਸਰਕਾਰ ਨਾਲ ਵਾਰਤਾ ਤੋਂ ਪਹਿਲਾਂ ਜੰਗਬੰਦੀ ਲਈ ਤਿਆਰ ਨਹੀਂ ਹਨ।
ਅਫ਼ਗਾਨਿਸਤਾਨ ਲਈ ਨਾਟੋ ਦੇ ਪ੍ਰਤੀਨਿਧ ਨਿਕੋਲਸ ਕਾਈ ਦਾ ਕਹਿਣਾ ਹੈ ਕਿ ਉਹ ਆਸ਼ਵਾਦੀ ਹਨ ਅਤੇ ਉਮੀਦ ਕਰਦੇ ਹਨ ਕਿ ਅਮਰੀਕਾ ਅਤੇ ਤਾਲਿਬਾਨ ਵਿਚਾਲੇ ਸ਼ਾਂਤੀ ਵਰਤਾ ਅੱਗੇ ਵਧੇਗੀ ਅਤੇ ਉਸ ਤੋਂ ਅਫ਼ਗਾਨ ਸਰਕਾਰ ਨਾਲ ਅੱਤਵਾਦੀ ਜਮਾਤ ਦੀ ਵਾਰਤਾ ਦਾ ਰਸਤਾ ਖੁੱਲ੍ਹ ਜਾਏਗਾ। ਉਨ੍ਹਾਂ ਕਿਹਾ ਕਿ ਪਿਛਲੇ ਸਾਲਾ ਦੌਰਾਨ ਸ਼ਾਂਤੀ ਪ੍ਰਕਿਰਿਆ ਦੇ ਪੱਖ ਵਿੱਚ ਇੱਕ ਮਜ਼ਬੂਤ ਖੇਤਰੀ ਸਹਿਮਤੀ ਬਣੀ ਹੈ ਤੇ ਵਰਤਮਾਨ ਸਮੇਂ ਵਿੱਚ ਇਸ ਖੇਤਰ ਵਿੱਚ ਸੁਰੱਖਿਆ ਬਲ ਪਹਿਲੇ ਤੋਂ ਕਿਤੇ ਜ਼ਿਆਦ ਮਜ਼ਬੂਤ ਹਨ। ਸ਼ਾਂਤੀ ਵਾਰਤਾ ਨਾਲ ਜੁੜੇ ਇੱਕ ਹੋਰ ਸੂਤਰ ਨੇ ਕਿਹਾ ਹੈ ਕਿ ਇਸ ਕੇਸ ਵਿੱਚ ਅਮਰੀਕਾ ਦੇ ਵਿਸ਼ੇਸ਼ ਦੂਤ ਜਾਲਮੇ ਖਲੀਲਜ਼ਾਦ ਪਿਛਲੇ ਇੱਕ ਹਫ਼ਤੇ ਤੋਂ ਕਤਰ ਵਿੱਚ ਹਨ। ਇਸ ਦੌਰਾਨ ਉਨ੍ਹਾਂ ਦੀ ਤਾਲਿਬਾਨ ਦੇ ਉਪ ਨੇਤਾ ਅਬਦੁੱਲ ਗਨੀ ਬਰਾਬਦ ਨਾਲ ਗ਼ੈਰ-ਰਸਮੀ ਗੱਲਬਾਤ ਵੀ ਹੋਈ ਹੈ। ਜਾਣਕਾਰ ਸੂਤਰਾਂ ਮੁਤਾਬਕ ਅਫ਼ਗਾਨ ਸਰਕਾਰ ਦੇ ਆਗੂਆਂ ਨਾਲ ਹਿੰਸਾ ਨੂੰ ਘੱਟ ਕਰਨ ਲਈ ਖਲੀਲਜ਼ਾਦ ਜਲਦੀ ਹੀ ਕਾਬੁਲ ਦਾ ਦੌਰਾ ਕਰਨਗੇ।
ਵਰਨਣ ਯੋਗ ਹੈ ਕਿ ਅਫ਼ਗਾਨਿਸਤਾਨ ਦਾ ਸੰਕਟ ਹੱਲ ਕਰਨ ਲਈ ਅਮਰੀਕਾ ਤੇ ਤਾਲਿਬਾਨ ਵਿਚਕਾਰ ਅਕਤੂਬਰ 2018 ਵਿੱਚ ਦੋਹਾ ਵਿੱਚ ਵਾਰਤਾ ਹੋਈ ਸੀ ਪ੍ਰੰਤੂ ਪਿਛਲੇ ਸਾਲ ਸਤੰਬਰ ਵਿੱਚ ਇੱਕ ਕਾਰ ਬੰਬ ਧਮਾਕੇ ਪਿੱਛੋਂ ਰੁਕ ਗਈ ਸੀ। ਸੱਤ ਦਸੰਬਰ, 2019 ਨੂੰ ਵਾਰਤਾ ਫਿਰ ਸ਼ੁਰੂ ਹੋਈ ਪ੍ਰੰਤੂ ਬਗਰਾਮ ਹਮਲੇ ਪਿੱਛੋਂ ਇਹ ਫਿਰ ਤੋਂ ਰੁਕ ਗਈ।