ਨਿਊਯਾਰਕ, 13 ਜਨਵਰੀ (ਪੋਸਟ ਬਿਊਰੋ)- ਫੇਸਬੁੱਕ ਪੋਸਟ ਉੱਤੇ ਈਰਾਨ ਨੂੰ ਚੋਣਵੇਂ ਅਮਰੀਕੀ ਅੱਡਿਆਂ ਉੱਤੇ ਬੰਬ ਸੁੱਟਣ ਦੀ ਸਲਾਹ ਦੇਣ ਵਾਲੇ ਭਾਰਤ ਵੰਸ਼ੀ ਪ੍ਰੋਫੈਸਰ ਅਸ਼ੀਨ ਫਨਸੇ ਨੂੰ ਨੌਕਰੀ ਤੋਂ ਕੱਢ ਦਿੱਤਾ ਗਿਆ ਹੈ। ਬਾਬਸਨ ਕਾਲਜ ਬੋਸਟਨ ਦੇ ਮੁਤਾਬਕ ਨਿੱਜੀ ਫੇਸਬੁੱਕ ਪੇਜ ਉੱਤੇ ਕੀਤੀ ਅਸ਼ੀਨ ਦੀ ਪੋਸਟ ਕਾਲਜ ਦੇ ਮੁੱਲਾਂ ਅਤੇ ਸੰਸਕ੍ਰਿਤੀ ਦੇ ਮੁਤਾਬਕ ਨਹੀਂ। ਪ੍ਰੋਫੈਸਰ ਨੇ ਪਿਛਲੇ ਹਫ਼ਤੇ ਇਸ ਦੀ ਮਾਫ਼ੀ ਮੰਗਦੇ ਹੋਏ ਇਸ ਨੂੰ ਮਜ਼ਾਕ ਕਿਹਾ ਸੀ।
ਅਸਲ ਵਿੱਚ ਪ੍ਰੋਫੈਸਰ ਅਸ਼ੀਨ ਫਨਸੇ ਦੀ ਇਸ ਪੋਸਟ ਨੂੰ ਅਮਰੀਕਾ ਦੇ ਰਾਸ਼ਟਰਪਤੀ ਡੋਨਾਲਡ ਟਰੰਪ ਵੱਲੋਂ ਕੀਤੇ ਉਸ ਟਵੀਟ ਦੇ ਜਵਾਬ ਵਜੋਂ ਦੇਖਿਆ ਗਿਆ, ਜਿਸ ਵਿਚ ਉਨ੍ਹਾਂ ਨੇ ਈਰਾਨ ਨੂੰ ਚਿਤਾਵਨੀ ਦੇਂਦੇ ਹੋਏੇ ਕਿਹਾ ਸੀ ਕਿ ਉਹ ਹਮਲਾ ਕਰੇਗਾ ਤਾਂ ਅਮਰੀਕਾ ਉਸ ਦੇ 52 ਅਹਿਮ ਟਿਕਾਣਿਆਂ ਅਤੇ ਸੱਭਿਆਚਾਰਕ ਅਦਾਰਿਆਂ ਨੂੰ ਨਿਸ਼ਾਨਾ ਬਣਾਏਗਾ। ਅਮਰੀਕਾ ਦੇ ਅਧਿਕਾਰੀਆਂ ਨੇ ਟਰੰਪ ਦੇ ਬਿਆਨ ਦੇ ਉਲਟ ਕਿਹਾ ਸੀ ਕਿ ਸੱਭਿਆਚਾਰਕ ਥਾਵਾਂ ਨੂੰ ਨਿਸ਼ਾਨਾ ਬਣਾਇਆ ਜਾਣਾ ਅੰਤਰਰਾਸ਼ਟਰੀ ਕਾਨੂੰਨ ਹੇਠ ਜੰਗੀ ਅਪਰਾਧ ਹੈ ਅਤੇ ਅਮਰੀਕਾ ਕਦੇ ਵੀ ਅਜਿਹਾ ਨਹੀਂ ਕਰੇਗਾ।
ਪ੍ਰੋਫੈਸਰ ਅਸ਼ੀਨ ਫਨਸੇ ਨੇ ਪੰਜ ਜਨਵਰੀ ਨੂੰ ਲਿਖੀ ਆਪਣੀ ਪੋਸਟ ਵਿਚ ਕਿਹਾ ਕਿ ਈਰਾਨ ਦੇ ਸਰਬ ਉੱਚ ਆਗੂ ਨੂੰ 52 ਅਮਰੀਕੀ ਸੱਭਿਆਚਾਰਕ ਵਿਰਾਸਤਾਂ ਦੀ ਸੂਚੀ ਜਾਰੀ ਕਰਨੀ ਚਾਹੀਦੀ ਹੈ, ਜਿਥੇ ਉਹ ਬੰਬ ਸੁੱਟਣਾ ਚਾਹੁੰਦੇ ਹਨ। ਉਨ੍ਹਾਂ ਨੇ ਆਪਣੇ ਵੱਲੋਂ ਮਿਨੀਸੋਟਾ ਦੇ ਮਾਲ ਆਫ ਅਮਰੀਕਾ ਅਤੇ ਅਮਰੀਕੀ ਸੈਲੇਬ੍ਰਿਟੀ ਕਿਮ ਕਰਦਾਸ਼ੀਆਂ ਦੇ ਘਰ ਉੱਤੇ ਵੀ ਬੰਬ ਸੁੱਟਣ ਦੀ ਸਲਾਹ ਦੇ ਦਿੱਤੀ ਸੀ। ਪ੍ਰੋਫੈਸਰ ਅਸ਼ੀਨ ਪ੍ਰਮੁੱਖ ਬਾਬਸਨ ਕਾਲਜ ਦੇ ਡਾਇਰੈਕਟਰ ਸਨ। ਇਹ ਕਾਲਜ ਬੋਸਟਨ ਤੋਂ 20 ਕਿਲੋਮੀਟਰ ਦੂਰ ਵੈਲੇਸਲੇ ਵਿਚ ਹੈ। ਪ੍ਰੋਫੈਸਰ ਅਸ਼ੀਨ ਨੇ ਆਪਣੀ ਸਫਾਈ ਵਿਚ ਕਿਹਾ ਕਿ ਫੇਸਬੁੱਕ ਉੱਤੇ ਮੈਂ ਆਪਣੇ ਦੋਸਤਾਂ ਨਾਲ ਮਜ਼ਾਕ ਕੀਤਾ ਸੀ, ਪ੍ਰੰਤੂ ਲੋਕਾਂ ਨੇ ਗ਼ਲਤ ਅਰਥ ਕੱਢ ਲਿਆ। ਮੈਨੂੰ ਆਸ ਸੀ ਕਿ ਕਾਲਜ ਮੇਰੇ ਬੋਲਣ ਦੀ ਆਜ਼ਾਦੀ ਦਾ ਸਨਮਾਨ ਅਤੇ ਬਚਾਅ ਕਰੇਗਾ ਪ੍ਰੰਤੂ ਅਜਿਹਾ ਨਹੀਂ ਹੋਇਆ।