ਜਲੰਧਰ, 13 ਜਨਵਰੀ (ਪੋਸਟ ਬਿਊਰੋ)- ਜ਼ਿਲ੍ਹਾ ਖਪਤਕਾਰ ਫੋਰਮ ਨੇ ਇਕ ਵਾਰ ਫਿਰ ਇੰਪਰੂਵਮੈਂਟ ਟਰੱਸਟ ਜਲੰਧਰ ਦੇ ਚੇਅਰਮੈਨ ਦਲਜੀਤ ਸਿੰਘ ਆਹਲੂਵਾਲੀਆਂ ਦੇ ਖਿਲਾਫ ਦੋ ਵੱਖ-ਵੱਖ ਕੇਸਾਂ ਵਿੱਚ 10 ਫਰਵਰੀ ਤੱਕ ਲਈ ਗ੍ਰਿਫ਼ਤਾਰੀ ਵਾਰੰਟ ਜਾਰੀ ਕਰ ਦਿੱਤੇ ਹਨ। ਇਹ ਟਰੱਸਟ ਅਜਿਹੇ ਕੇਸਾਂ ਕਰ ਕੇ ਚਰਚਾ ਵਿੱਚ ਰਹਿੰਦਾ ਹੈ।
ਤਾਜ਼ਾ ਕੇਸਾਂ ਵਿੱਚੋਂ ਇੱਕ ਕੇਸ ਜੀ ਜੀ ਐਸ ਐਵਿਨਿਊ ਦਾ ਹੈ ਜਿਸ ਵਿੱਚ ਅਲਾਟੀ ਸਵਰਗੀ ਡੀ ਡੀ ਜੋਤੀ ਨੂੰ ਐਲ ਡੀ ਪੀ ਕੋਟੇ ਵਿੱਚ ਦੋ ਪਲਾਟ ਅਲਾਟ ਹੋਏ ਸਨ। ਦਸੰਬਰ 2009 'ਚ ਪਹਿਲੀ ਕਿਸ਼ਤ 1,51,125 ਜਮਾਂ ਕਰਵਾਉਣ ਦੇ ਬਾਵਜੂਦ ਉਨ੍ਹਾਂ ਨੂੰ ਪਲਾਟਾਂ ਦਾ ਕਬਜ਼ਾ ਇਹ ਕਹਿ ਕੇ ਨਹੀਂ ਦਿੱਤਾ ਗਿਆ ਕਿ ਅਜੇ ਇਨ੍ਹਾਂ ਪਲਾਟਾਂ ਦੀ ਜਾਂਚ ਚੱਲ ਰਹੀ ਹੈ। ਉਨ੍ਹਾਂ ਤੋਂ ਬਾਅਦ ਉਨ੍ਹਾਂ ਦੇ ਲੜਕੇ ਵਿਕਰਮ ਜੋਤੀ ਨੇ 1 ਜਨਵਰੀ 2017 ਵਿੱਚ ਜ਼ਿਲ੍ਹਾ ਖਪਤਕਾਰ ਫੋਰਮ ਵਿੱਚ ਕੇਸ ਕੀਤਾ ਸੀ। ਜ਼ਿਲ੍ਹਾ ਖਪਤਕਾਰ ਫੋਰਮ ਦੇ ਆਦੇਸ਼ ਮੁਤਾਬਕ ਉਨ੍ਹਾਂ ਨੂੰ ਮੁਆਵਜ਼ਾ, ਕਾਨੂੰਨੀ ਖਰਚਾ ਤੇ ਦੋ ਪਲਾਟ ਨਾ ਦੇਣ 'ਤੇ ਉਨ੍ਹਾਂ ਦੀ ਦੁਬਾਰਾ ਪਾਈ ਅਰਜ਼ੀ 'ਤੇ ਜ਼ਿਲ੍ਹਾ ਖਪਤਕਾਰ ਫੋਰਮ ਨੇ 10 ਜਨਵਰੀ ਤੱਕ ਹੁਕਮਾਂ ਦੀ ਪਾਲਣਾ ਕਰਦੇ ਹੋਏ ਚੇਅਰਮੈਨ ਦੀ ਗ੍ਰਿਫ਼ਤਾਰੀ ਵਾਰੰਟ ਜਾਰੀ ਕੀਤੇ ਹਨ।
ਦੂਜਾ ਮਾਮਲਾ ਪ੍ਰੇਮ ਵਾਲੀਆ ਪਤਨੀ ਮਦਨ ਗੋਪਾਲ ਵਾਲੀਆਂ ਅਰਬਨ ਅਸਟੇਟ ਵਾਸੀ ਦਾ ਹੈ, ਜਿਨ੍ਹਾਂ ਨੂੰ ਸੂਰੀਆ ਐਨਕਲੇਵ ਐਕਸਟੈਨਸ਼ਨ ਵਿੱਚ 152 ਸੀ ਵਿੱਚ 100 ਗਜ ਦਾ ਪਲਾਟ ਮਿਲਿਆ ਸੀ। ਉਨ੍ਹਾਂ ਨੇ ਇਸ ਦੀ 21,56,125 ਰੁਪਏ ਰਕਮ ਜਮਾਂ ਕਰਵਾ ਦਿੱਤੀ ਸੀ। ਪਲਾਟ ਨਾ ਮਿਲਣ 'ਤੇ ਉਹ ਵੀ ਜ਼ਿਲ੍ਹਾ ਖਪਤਕਾਰ ਫੋਰਮ ਵਿੱਚ ਚਲੇ ਗਏ। ਫੋਰਮ ਦੇ 8 ਜੁਲਾਈ 2019 ਨੂੰ ਜਾਰੀ ਆਦੇਸ਼ 'ਚ ਸਾਰੀਆਂ ਸਹੂਲਤਾਂ ਨਾਲ ਫਲੈਟ, ਮੁਆਵਜ਼ਾ, ਕਾਨੂੰਨੀ ਖਰਚਾ ਦੋ ਮਹੀਨੇ ਵਿੱਚ ਦੇਣ ਲਈ ਕਿਹਾ ਸੀ ਪਰ ਇਸ 'ਤੇ ਅਮਲ ਨਾ ਕਰਨ ਤੋਂ ਬਾਅਦ ਫੋਰਮ ਨੇ 10 ਫਰਵਰੀ ਤੱਕ ਆਦੇਸ਼ 'ਤੇ ਅਮਲ ਨਾ ਕਰਨ 'ਤੇ ਗ੍ਰਿਫ਼ਤਾਰੀ ਵਾਰੰਟ ਜਾਰੀ ਕੀਤੇ ਹਨ।