ਕੋਲਕਾਤਾ, 8 ਜਨਵਰੀ, (ਪੋਸਟ ਬਿਊਰੋ)- ਭਾਰਤੀ ਫੌਜ ਵਿੱਚ ਚੀਫ ਆਫ਼ ਡਿਫੈਂਸ ਸਟਾਫ਼ (ਸੀ ਡੀ ਐੱਸ) ਬਣਾਏ ਜਾਣ ਦੇ ਫੈਸਲੇ ਨੂੰ ਫੌਜ ਦੇ ਸਾਬਕਾ ਮੁਖੀ ਜਨਰਲ ਸ਼ੰਕਰ ਰਾਏ ਚੌਧਰੀ ਨੇ ਸਵਾਗਤ ਯੋਗ ਅਤੇ ਇਤਿਹਾਸਕ ਮੰਨਿਆ ਹੈ। ਉਨ੍ਹਾਂ ਨੇ ਕਿਹਾ ਕਿ ਪਿਛਲੀਆਂ ਸਰਕਾਰਾਂ ਨੇ ਤਖ਼ਤਾ ਪਲਟਣ ਦੇ ਡਰ ਕਾਰਨ ਇਹ ਨਹੀਂ ਸੀ ਬਣਾਇਆ।
ਅੱਜ ਬੁੱਧਵਾਰ ਨੂੰ ਕੋਲਕਾਤਾ ਵਿੱਚ ਜਨਰਲ ਸ਼ੰਕਰ ਰਾਏ ਚੌਧਰੀ ਨੇ ਕਿਹਾ ਕਿ ਦੇਸ਼ ਵਿੱਚ ਸੀ ਡੀ ਐੱਸ ਬਣਾਉਣ ਦੀ ਮੰਗ ਲੰਮੇ ਸਮੇਂ ਤੋਂ ਹੋ ਰਹੀ ਹੈ ਅਤੇ ਲੋੜ ਇਸ ਗੱਲ ਦੀ ਸੀ ਕਿ ਜ਼ਮੀਨੀ ਫੌਜ, ਨੇਵੀ ਅਤੇ ਹਵਾਈ ਫ਼ੌਜ ਇਕ ਛੱਤ ਦੇ ਹੇਠਾਂ ਆ ਜਾਣ, ਪਰ ਸਮੱਸਿਆ ਸਿਆਸੀ ਸੀ। ਉਨ੍ਹਾਂ ਜ਼ੋਰ ਦੇ ਕੇ ਕਿਹਾ ਕਿ ਇਸ ਦੇ ਪਿੱਛੇ ਓਦੋਂ ਦੀਆਂ ਸਰਕਾਰਾਂ ਦੇ ਦਿਲਾਂ ਵਿੱਚ ਸਮਾਇਆ ਹੋਇਆ ਤਖ਼ਤਾ ਪਲਟਣ ਦਾ ਡਰ ਸੀ। ਸਿਆਸੀ ਆਗੂਆਂ ਨੂੰ ਸ਼ੱਕ ਸੀ ਕਿ ਤਿੰਨੇ ਫੌਜਾਂ: ਜ਼ਮੀਨੀ ਫ਼ੌਜ, ਨੇਵੀ ਅਤੇ ਹਵਾਈ ਫ਼ੌਜ ਇਕੋ ਛੱਤ ਹੇਠ ਆ ਗਈਆਂ ਤਾਂ ਤਖ਼ਤਾ ਪਲਟ ਨਾ ਹੋ ਜਾਵੇ, ਏਸੇ ਲਈ ਏਸੇ ਸਾਲਾਂ ਤਕ ਦੇਸ਼ ਵਿੱਚ ਸੀ ਡੀ ਐੱਸ ਦਾ ਅਹੁਦਾ ਨਹੀਂ ਬਣਾਇਆ ਗਿਆ ਸੀ।
ਵਰਨਣ ਯੋਗ ਹੈ ਕਿ 31 ਦਸੰਬਰ ਨੂੰ ਜਨਰਲ ਬਿਪਿਨ ਰਾਵਤ ਭਾਰਤੀ ਫ਼ੌਜ ਮੁਖੀ ਦੇ ਅਹੁਦੇ ਤੇ ਸੇਵਾ ਮੁਕਤ ਹੋਏ ਸਨ ਅਤੇ ਇਕ ਜਨਵਰੀ ਨੂੰ ਉਨ੍ਹਾਂ ਨੇ ਦੇਸ਼ ਦੇ ਪਹਿਲੇ ਸੀ ਡੀ ਐੱਸ ਦਾ ਅਹੁਦਾ ਸੰਭਾਲਿਆ ਹੈ। ਫੌਜ ਦੇ ਸਾਬਕਾ ਮੁਖੀ ਨੇ ਕਿਹਾ ਕਿ ਤਿੰਨੇ ਫ਼ੌਜਾਂ ਦੇ ਚੰਗੇ ਤਾਲਮੇਲ ਲਈ ਸੀ ਡੀ ਐੱਸ ਦਾ ਅਹੁਦਾ ਬੜਾ ਮਹੱਤਵ ਪੂਰਨ ਹੈ। ਜਨਰਲ ਰਾਏ ਚੌਧਰੀ ਨੇ ਪਹਿਲੇ ਸੀ ਡੀ ਐੱਸ ਦੇ ਰੂਪ ਵਿੱਚ ਜਨਰਲ ਬਿਪਿਨ ਰਾਵਤ ਦੀ ਨਿਯੁਕਤੀ ਉੱਤੇ ਕਿਹਾ ਕਿ ਉਹ ਬੜੇ ਅਨੁਭਵੀ ਹਨ। ਏਨੇ ਸਾਲਾਂ ਤਕ ਉਨ੍ਹਾਂ ਨੇ ਭਾਰਤੀ ਫ਼ੌਜ ਨੂੰ ਸੇਵਾਵਾਂ ਦਿੱਤੀਆਂ ਹਨ। ਜਨਰਲ ਚੌਧਰੀ ਨੇ ਭਰੋਸਾ ਪ੍ਰਗਟਾਇਆ ਕਿ ਉਹ ਤਿੰਨੇ ਫ਼ੌਜਾਂ ਦੀਆਂ ਲੋੜਾਂ ਅਨੁਸਾਰ ਯੋਗ ਫ਼ੈਸਲੇ ਲੈਣਗੇ।