ਬਰੈਂਪਟਨ, (ਡਾ. ਝੰਡ) -26 ਨਵੰਬਰ ਵੀਰਵਾਰ ਵਾਲੇ ਦਿਨ ਹੈਮਿਲਟਨ ਵਿਚ ਹੋਈ 10 ਮੀਲ ਦੌੜ 'ਬੌਕਸਿੰਗ-ਡੇਅ ਰੱਨ' ਸੰਜੂ ਗੁਪਤਾ ਦੀ ਇਸ ਸਾਲ ਦੀ 56'ਵੀਂ ਦੌੜ ਸੀ। ਆਮ ਤੌਰ 'ਤੇ ਇਹ ਦੌੜਾਂ ਅੱਜਕੱਲ੍ਹ ਕਿਲੋਮੀਟਰਾਂ ਵਿਚ ਦੌੜੀਆਂ ਜਾਂਦੀਆਂ ਹਨ ਪਰ 1921 ਵਿਚ ਸ਼ੁਰੂ ਹੋਈ ਪਿਛਲੇ 99 ਸਾਲਾਂ ਤੋਂ ਚੱਲੀ ਆ ਰਹੀ ਇਹ ਦੌੜ ਅਜੇ ਵੀ ਮੀਲਾਂ ਦੇ ਹਿਸਾਬ ਨਾਲ ਹੀ ਦੌੜੀ ਜਾਂਦੀ ਹੈ। ਅਗਲੇ ਸਾਲ 2020 ਵਿਚ ਇਹ ਇਸ ਸ਼ਹਿਰ ਵਿਚ ਦੌੜੀ ਜਾਣ ਵਾਲੀ 100'ਵੀ ਦੌੜ ਹੋਵੇਗੀ। ਇਸ ਵਿਚ 10 ਮੀਲ ਦੌੜਨ ਵਾਲੇ ਪਹਿਲੇ, ਦੂਸਰੇ ਅਤੇ ਤੀਸਰੇ ਨੰਬਰ 'ਤੇ ਆਉਣ ਵਾਲਿਆਂ ਨੂੰ ਕ੍ਰਮਵਾਰ 600 ਡਾਲਰ, 400 ਡਾਲਰ ਅਤੇ 200 ਡਾਲਰ ਦੇ ਨਕਦ ਇਨਾਮ ਦਿੱਤੇ ਗਏ। ਏਸੇ ਤਰ੍ਹਾਂ ਇਸ ਦੌਰਾਨ ਚਾਰ ਮੀਲ ਲੰਮੀ ਦੌੜ ਦੌੜਨ ਵਾਲਿਆਂ ਵਿਚ ਪਹਿਲੇ ਅਤੇ ਦੂਸਰੇ ਨੰਬਰ 'ਤੇ ਆਉਣ ਵਾਲਿਆਂ ਨੂੰ ਕ੍ਰਮਵਾਰ 200 ਡਾਲਰ ਅਤੇ 100 ਡਾਲਰ ਨਕਦ ਇਨਾਮ ਮਿਲੇ। ਇਸ ਦੇ ਨਾਲ ਹੀ ਹਰ ਸਾਲ ਵਾਂਗ ਇਸ ਸਾਲ ਵੀ ਪ੍ਰਬੰਧਕਾਂ ਵੱਲੋਂ 5,000 ਡਾਲਰ ਵਾਏ.ਐੱਮ.ਸੀ.ਏ. 'ਸਟਰੌਂਗ ਕਿੱਡਜ਼ ਕੈਂਪੇਨ' ਲਈ ਦਾਨ ਕੀਤੇ ਗਏ।
10 ਕਿਲੋਮੀਟਰ ਇਹ ਦੌੜ ਦੌੜਨ ਵਾਲੇ 477 ਦੌੜਾਕਾਂ ਵਿਚ 284 ਮਰਦ ਅਤੇ 193 ਔਰਤਾਂ ਸ਼ਾਮਲ ਸਨ। ਸੰਜੂ ਗੁਪਤਾ ਇਸ ਵਿਚ 267'ਵੇਂ ਸਥਾਨ 'ਤੇ ਰਿਹਾ ਅਤੇ ਇਸ ਦੇ ਲਈ ਉਸ ਨੇ ਇਕ ਘੰਟਾ 54 ਮਿੰਟ ਅਤੇ 26 ਸਕਿੰਟ ਦਾ ਸਮਾਂ ਲਿਆ। ਇਨ੍ਹਾਂ ਦੌੜਾਂ ਉਸ ਦੇ ਲਈ ਕਿਸੇ ਸਥਾਨ ਦੀ ਏਨੀ ਮਹੱਤਤਾ ਨਹੀਂ ਹੈ ਜਿੰਨੀ ਇਨ੍ਹਾਂ ਵਿਚ ਉਤਸ਼ਾਹ-ਪੂਰਵਕ ਸ਼ਮੂਲੀਅਤ ਕਰਨ ਦੀ ਹੈ। ਇਸ ਤੋਂ ਤਿੰਨ ਦਿਨਾਂ ਬਾਅਦ ਹੀ 29 ਦਸੰਬਰ ਦਿਨ ਐਤਵਾਰ ਉਸ ਨੇ 'ਪੈਕੇਸ ਰਾਇਲਜ਼' ਟੋਰਾਂਟੋ ਵਿਖੇ ਹੋਈ ਪੰਜ ਕਿਲੋਮੀਟਰ '35'ਵੀਂ ਸਲਾਨਾ ਰੈਜ਼ੋਲੂਸ਼ਨ ਰੱਨ' ਵਿਚ ਭਾਗ ਲਿਆ ਜੋ ਉਸ ਦੀ ਇਸ ਸਾਲ ਦੀ 57'ਵੀ' ਦੌੜ ਸੀ।
ਸੰਜੂ ਇਸ ਸਾਲ ਦੇ ਅਖ਼ੀਰਲੇ ਦਿਨ 31 ਦਸੰਬਰ ਨੂੰ ਦੋ ਦੌੜਾਂ ਵਿਚ ਹਿੱਸਾ ਲੈ ਰਿਹਾ ਹੈ। ਪਹਿਲੀ ਦੌੜ ਸ਼ਾਮ ਦੇ ਪੰਜ ਵਜੇ ਨੌਰਥ ਵਾਲੇ ਪਾਸੇ ਪੈਂਦੇ ਸ਼ਹਿਰ ਔਰੋਰਾ ਵਿਖੇ ਹੋਵੇਗੀ ਅਤੇ ਦੂਸਰੀ ਰਾਤ ਦੇ ਬਾਰਾਂ ਵਜੇ ਟੋਰਾਂਟੋ ਦੀ ਮਸ਼ਹੂਰ ਸੀ.ਐਨ.ਈ. ਗਰਾਊਂਡ ਦੇ ਨੇੜਲੇ 'ਲਿਬਰਟੀ ਵਿਲੇਜ' ਤੋਂ ਸਾਲ 2019 ਦੇ ਆਖ਼ਰੀ ਪਹਿਰ ਦੇ ਅਖ਼ੀਰਲੇ ਵਿਚ ਸ਼ੁਰੂ ਹੋਵੇਗੀ ਅਤੇ ਨਵੇਂ ਸਾਲ 2020 ਦੇ ਪਹਿਲੇ ਪਹਿਰ ਵਿਚ ਸਮਾਪਤ ਹੋਵੇਗੀ। ਇਹ ਦੌੜ ਉਸ ਦੀ ਇਸ ਸਾਲ ਦੀ 59'ਵੀ" ਦੌੜ ਹੋਵੇਗੀ ਜੋ ਉਸ ਦੇ ਇਸ ਸਾਲ ਦੇ 55 ਦੌੜਾਂ ਦੇ ਟੀਚੇ ਤੋਂ ਚਾਰ ਵਧੇਰੇ ਹੈ।