ਓਟਵਾ, 12 ਦਸੰਬਰ (ਪੋਸਟ ਬਿਊਰੋ) : ਐਂਡਰਿਊ ਸ਼ੀਅਰ ਨੇ ਕੰਜ਼ਰਵੇਟਿਵ ਪਾਰਟੀ ਦੇ ਆਗੂ ਵਜੋਂ ਅਸਤੀਫਾ ਦੇ ਦਿੱਤਾ ਹੈ। ਕਈ ਹਫਤਿਆਂ ਤੱਕ ਅਜਿਹਾ ਕਰਨ ਦੀ ਉੱਠਦੀ ਰਹੀ ਮੰਗ ਨੂੰ ਟਾਲਣ ਤੋਂ ਬਾਅਦ ਆਖਿਰਕਾਰ ਸ਼ੀਅਰ ਨੇ ਅਸਤੀਫਾ ਦੇ ਹੀ ਦਿੱਤਾ। ਪਰ ਉਨ੍ਹਾਂ ਉਦੋਂ ਤੱਕ ਇਸ ਅਹੁਦੇ ਉੱਤੇ ਕਾਇਮ ਰਹਿਣ ਦਾ ਫੈਸਲਾ ਕੀਤਾ ਹੈ ਜਦੋਂ ਤੱਕ ਉਨ੍ਹਾਂ ਦਾ ਬਦਲ ਨਹੀਂ ਤਲਾਸ਼ ਲਿਆ ਜਾਂਦਾ।
ਵੀਰਵਾਰ ਸਵੇਰੇ ਪਾਰਲੀਆਮੈਂਟ ਹਿੱਲ ਉੱਤੇ ਕੰਜ਼ਰਵੇਟਿਵ ਕਾਕਸ ਨਾਲ ਮੁਲਾਕਾਤ ਕਰਨ ਤੋਂ ਬਾਅਦ ਹਾਊਸ ਆਫ ਕਾਮਨਜ਼ ਵਿੱਚ ਆਪਣੇ ਫੈਸਲੇ ਦਾ ਐਲਾਨ ਕਰਦਿਆਂ ਸ਼ੀਅਰ ਨੇ ਆਖਿਆ ਕਿ ਉਹ ਪਾਰਟੀ ਦੀ ਨੈਸ਼ਨਲ ਕਾਉਂਸਲ ਨੂੰ ਲੀਡਰਸਿ਼ਪ ਚੋਣ ਦਾ ਪ੍ਰਬੰਧ ਕਰਵਾਉਣ ਲਈ ਆਖਣਗੇ। ਸ਼ੀਅਰ ਨੇ ਆਖਿਆ ਕਿ ਆਪਣੇ ਅਸਤੀਫੇ ਬਾਰੇ ਫੈਸਲਾ ਕਰਨਾ ਉਨ੍ਹਾਂ ਵੱਲੋਂ ਲਿਆ ਗਿਆ ਹੁਣ ਤੱਕ ਦਾ ਸੱਭ ਤੋਂ ਮੁਸ਼ਕਲ ਫੈਸਲਾ ਰਿਹਾ। ਵੀਰਵਾਰ ਸ਼ਾਮ ਨੂੰ ਕੰਜ਼ਰਵੇਟਿਵ ਕਾਕਸ ਵੱਲੋਂ ਅਚਾਨਕ ਪਾਰਲੀਆਮੈਂਟ ਹਿੱਲ ਉੱਤੇ ਮੀਟਿੰਗ ਸੱਦੀ ਗਈ। ਕੰਜ਼ਰਵੇਟਿਵ ਕਾਕਸ ਚੇਅਰ ਟੌਮ ਕਮਾਇਕ ਅਨੁਸਾਰ ਇੱਕ ਘੰਟੇ ਤੋਂ ਵੀ ਘੱਟ ਸਮੇਂ ਤੱਕ ਬੰਦ ਦਰਵਾਜ਼ਾ ਮੀਟਿੰਗ ਕਰਨ ਤੋਂ ਬਾਅਦ ਕਾਕਸ ਨੇ ਸਰਬਸੰਮਤੀ ਨਾਲ ਇਹ ਵੋਟ ਕੀਤਾ ਕਿ ਅੰਤਰਿਮ ਆਗੂ ਵਜੋਂ ਸ਼ੀਅਰ ਆਪਣਾ ਬਦਲ ਮਿਲ ਜਾਣ ਤੱਕ ਇਸ ਅਹੁਦੇ ਉੱਤੇ ਬਣੇ ਰਹਿਣ।
ਇਹ ਸਵਾਲ ਉੱਠਣ ਕਿ ਕੀ ਸ਼ੀਅਰ ਨੂੰ ਹੀ ਕੰਜ਼ਰਵੇਟਿਵ ਆਗੂ ਬਣੇ ਰਹਿਣਾ ਚਾਹੀਦਾ ਹੈ ਜਾਂ ਫਿਰ ਕਾਕਸ ਨੂੰ ਉਸ ਤੋਂ ਬਿਨਾਂ ਕਿਸੇ ਨਵੇਂ ਚਿਹਰੇ ਨੂੰ ਮੌਕਾ ਦੇਣਾ ਚਾਹੀਦਾ ਹੈ, ਤੋਂ ਬਾਅਦ ਹੀ ਇਹ ਫੈਸਲਾ ਲਿਆ ਗਿਆ। ਸ਼ੀਅਰ ਨੇ ਆਖਿਆ ਕਿ ਕਿਸੇ ਇੱਕ ਵਿਅਕਤੀ ਨਾਲੋਂ ਪਾਰਟੀ ਜਿ਼ਆਦਾ ਅਹਿਮ ਹੈ ਤੇ ਕੰਜ਼ਰਵੇਟਿਵਾਂ ਨੂੰ ਕਿਸੇ ਅਜਿਹੇ ਸ਼ਖ਼ਸ ਦੀ ਲੋੜ ਹੈ ਜਿਹੜਾ 100 ਫੀ ਸਦੀ ਪਾਰਟੀ ਪ੍ਰਤੀ ਸਮਰਪਿਤ ਹੋਵੇ ਅਤੇ ਜਿਹੜਾ ਪਾਰਟੀ ਨੂੰ ਇੱਕਜੁੱਟ ਰੱਖ ਕੇ ਸਰਕਾਰ ਬਣਾਉਣ ਉੱਤੇ ਧਿਆਨ ਕੇਂਦਰਿਤ ਕਰ ਸਕੇ।
ਕੰਜ਼ਰਵੇਟਿਵ ਪਾਰਟੀ ਦੇ ਐਗਜੈ਼ਕਟਿਵ ਡਾਇਰੈਕਟਰ ਡਸਟਿਨ ਵੈਨ ਵੁਗਟ ਅਨੁਸਾਰ ਇਸ ਹਫਤੇ ਦੇ ਸ਼ੁਰੂ ਤੋਂ ਹੀ ਸ਼ੀਅਰ ਨੇ ਆਪਣੇ ਸਟਾਫ ਮੈਂਬਰਾਂ ਨੂੰ ਅਸਤੀਫਾ ਦੇਣ ਦੇ ਆਪਣੇ ਫੈਸਲੇ ਬਾਰੇ ਦੱਸਣਾ ਸੁ਼ਰੂ ਕਰ ਦਿੱਤਾ ਸੀ। ਅਗਲੀ ਚੋਣ ਕੈਂਪੇਨ ਵਿੱਚ ਕੰਜ਼ਰਵੇਟਿਵ ਆਗੂ ਨਾ ਰਹਿਣ ਬਾਰੇ ਜਿਵੇਂ ਹੀ ਸ਼ੀਅਰ ਨੇ ਐਲਾਨ ਕੀਤਾ ਤਾਂ ਉਨ੍ਹਾਂ ਦੇ ਕਾਕਸ ਮੈਂਬਰਾਂ ਨੇ ਉਨ੍ਹਾਂ ਨਾਲ ਹੱਥ ਮਿਲਾਉਣੇ ਸ਼ੁਰੂ ਕਰ ਦਿੱਤੇ ਤੇ ਉਨ੍ਹਾਂ ਨੂੰ ਜੱਫੀਆਂ ਪਾਉਣੀਆਂ ਸ਼ੁਰੂ ਕਰ ਦਿੱਤੀਆਂ। ਇਸ ਤੋਂ ਬਾਅਦ ਹੀ ਵਿਰੋਧੀ ਧਿਰ ਦੇ ਆਗੂਆਂ ਤੇ ਪ੍ਰਧਾਨ ਮੰਤਰੀ ਜਸਟਿਨ ਟਰੂਡੋ ਨੇ ਪ੍ਰਤੀਕਿਰਿਆ ਪ੍ਰਗਟਾਈ। ਉਨ੍ਹਾਂ ਦੇ ਸਿਆਸੀ ਵਿਰੋਧੀਆਂ ਨੇ ਸਮਰਪਣ ਭਾਵਨਾ ਤੇ ਸੇਵਾ ਲਈ ਸ਼ੀਅਰ ਦਾ ਧੰਨਵਾਦ ਕੀਤਾ।
ਟਰੂਡੋ ਨੇ ਆਖਿਆ ਕਿ ਔਖੇ ਤੇ ਮਾੜੇ ਵੇਲਿਆਂ ਵਿੱਚ ਬਹੁਤ ਹੀ ਰਹਿਮਦਿਲੀ ਤੇ ਹੌਸਲੇ ਤੋਂ ਕੰਮ ਲਿਆ। ਉਨ੍ਹਾਂ ਸ਼ੀਅਰ ਦੇ ਅਗਲੇ ਸਫਰ ਲਈ ਉਨ੍ਹਾਂ ਨੂੰ ਸੁ਼ੱਭਕਾਮਨਾਵਾਂ ਵੀ ਦਿੱਤੀਆਂ। ਇਹ ਵੀ ਪਤਾ ਲੱਗਿਆ ਹੈ ਕਿ ਕੰਜ਼ਰਵੇਟਿਵ ਫੰਡ ਸ਼ੀਅਰ ਦੇ ਓਟਵਾ ਵਿੱਚ ਪ੍ਰਾਈਵੇਟ ਸਕੂਲ ਵਿੱਚ ਪੜ੍ਹਦੇ ਬੱਚਿਆਂ ਦੀਆਂ ਫੀਸਾਂ ਲਈ ਵੀ ਵਰਤੇ ਗਏ। ਇਸ ਉੱਤੇ ਵੀ ਪਾਰਟੀ ਦੇ ਕਈ ਮੈਂਬਰਾਂ ਵੱਲੋਂ ਇਤਰਾਜ਼ ਪ੍ਰਗਟਾਇਆ ਗਿਆ। ਕੈਂਪੇਨ ਸ਼ੁਰੂ ਹੋਣ ਤੋਂ ਲੈ ਕੇ ਹੁਣ ਤੱਕ ਸ਼ੀਅਰ ਦੇ ਵੱਡੇ ਆਲੋਚਕ ਰਹੇ ਕੰਜ਼ਰਵੇਟਿਵ ਸੈਨੇਟਰ ਜੀਨ ਗਾਇ ਡੇਜੇਨਾਇਸ ਦਾ ਕਹਿਣਾ ਹੈ ਕਿ ਸ਼ੀਅਰ ਨੂੰ ਇਹ ਖਰਚਾ ਪਾਰਟੀ ਨੂੰ ਮੋੜਨਾ ਚਾਹੀਦਾ ਹੈ।