ਅੰਮਿ੍ਰਤਸਰ, 7 ਦਸੰਬਰ (ਪੋਸਟ ਬਿਊਰੋ)- ਤਰਨ ਤਾਰਨ ਪੁਲਿਸ ਨੇ ਅਨੂਪ ਸਿੰਘ ਦੇ ਫਰਜ਼ੀ ਕਤਲ ਦੀ ਗੁੱਥੀ ਸੁਲਝਾ ਲਈ ਹੈ। ਅਨੂਪ ਸਿੰਘ ਨੇ ਇਕ ਕਰੋੜ ਰੁਪਏ ਤੋਂ ਵੱਧ ਦਾ ਕਰਜ਼ਾ ਮੁਆਫ ਕਰਾਉਣ ਅਤੇ ਜੀਵਨ ਬੀਮਾ ਦੇ ਲਾਭ ਹਾਸਲ ਕਰਨ ਦੇ ਮਨੋਰਥ ਨਾਲ ਆਪਣੇ ਕਤਲ ਦੀ ਝੂਠੀ ਕਹਾਣੀ ਘੜੀ ਸੀ।ਇਸ ਮਾਮਲੇ ਵਿੱਚ ਸਿੱਧੇ ਤੌਰ ਤੇ ਸ਼ਾਮਲ ਤਿੰਨ ਮੁੱਖ ਦੋਸ਼ੀਆਂ ਨੂੰ ਵੀ ਪੁਲਿਸ ਨੇ ਗਿ੍ਰਫਤਾਰ ਕਰ ਲਿਆ ਹੈ।ਪੁਲਿਸ ਵਲੋਂ ਅਨੂਪ ਸਿੰਘ ਦੇ ਪਿਤਾ ਸਮੇਤ ਹੋਰ ਪਰਿਵਾਰਕ ਮੈਂਬਰਾਂ ਦੀ ਇਸ ਮਾਮਲੇ ਵਿੱਚ ਭੂਮਿਕਾ ਦੀ ਪੜਤਾਲ ਕੀਤੀ ਜਾ ਰਹੀ ਹੈ।
5 ਦਸੰਬਰ ਦੀ ਸਵੇਰ ਥਾਣਾ ਹਰੀਕੇ ਦੇ ਐਸਐਚਓ ਨੂੰ ਸੂਚਨਾ ਮਿਲੀ ਸੀ ਕਿ ਹਰੀਕੇ - ਪੱਟੀ ਰੋਡ ਦੇ ਕਿਨਾਰੇ ਇੱਕ ਸੜੀ ਹੋਈ ਲਾਸ਼ ਪਈ ਹੈ। ਪੀਬੀ 02 ਸੀਵੀ 9351 ਨੰਬਰ ਵਾਲੀ ਇੱਕ ਸ਼ੈਵਰਲੇ ਕਾਰ ਲਾਸ਼ ਦੇ ਕੋਲ ਖੜ੍ਹੀ ਮਿਲੀ, ਅਤੇ ਕਾਰ ਦੇ ਡਰਾਈਵਰ ਵਾਲੇ ਪਾਸੇ ਦਾ ਦਰਵਾਜ਼ਾ ਖੁੱਲ੍ਹਾ ਸੀ।
ਲਾਸ਼ ਦੀ ਜਾਂਚ ਕਰਨ ‘ਤੇ ਇਹ ਤੱਥ ਸਾਹਮਣੇ ਆਏ ਕਿ ਪੀੜਤ ਦੇ ਸ਼ਰੀਰ ‘ਤੇ ਤੇਲ ਪਾਉਣ ਤੋਂ ਬਾਅਦ ਇਸਨੂੰ ਸਾੜਿਆ ਗਿਆ ਸੀ। ਪੀੜਤ ਦਾ ਪੇਟ ਅਤੇ ਪੇਟ ਤੋਂ ਥੱਲੇ ਵਾਲੇ ਹਿੱਸੇ ਦੇ ਅੰਗ ਸਰੀਰ ਤੋਂ ਵੱਖ ਹੋ ਗਏ ਸਨ। ਘਟਨਾ ਵਾਲੀ ਥਾਂ ਤੋਂ ਆਧਾਰ ਕਾਰਡ, ਪੈਨ ਕਾਰਡ, ਏ.ਟੀ.ਐਮ ਕਾਰਡ ਅਤੇ ਕੁਝ ਫੋਟੋਆਂ ਬਰਾਮਦ ਹੋਈਆਂ, ਜਿਸਦੀ ਲਾਸ਼ ਨੇੜੇ ਪਈ ਸੀ, ਜਿਸ ਕਾਰਨ ਇਸਦੀ ਪਛਾਣ ਅਨੂਪ ਸਿੰਘ ਪੁੱਤਰ ਤਰਲੋਕ ਸਿੰਘ ਵਾਸੀ 75, ਵਾਹਿਗੁਰੂ ਸਿਟੀ , ਝਬਾਲ ਰੋਡ, ਅੰਮਿ੍ਰਤਸਰ ਵਜੋਂ ਕੀਤੀ ਗਈ। ਪਾਰਕ ਕੀਤੀ ਸ਼ੇਵਰਲੇਟ ਕਾਰ ਵਿਚੋਂ ਤੇਲ ਦੀ ਇਕ ਬੋਤਲ ਵੀ ਬਰਾਮਦ ਕੀਤੀ ਗਈ ਸੀ ।