ਕਿੰਗਸਟਨ, 2 ਦਸੰਬਰ (ਪੋਸਟ ਬਿਊਰੋ) : ਕਿੰਗਸਟਨ ਵਿੱਚ 30 ਗੱਡੀਆ ਦੇ ਆਪਸ ਵਿੱਚ ਟਕਰਾਉਣ ਕਾਰਨ ਨੋਵਾ ਸਕੋਸ਼ੀਆ ਤੋਂ ਇੱਕ 33 ਸਾਲਾ ਵਿਅਕਤੀ ਦੀ ਮੌਤ ਹੋ ਗਈ ਜਦਕਿ ਕਈ ਹੋਰ ਜ਼ਖ਼ਮੀ ਹੋ ਗਏ।
ਇਹ ਘਟਨਾ ਜੌਇਸਵਿੱਲੇ ਰੋਡ ਦੀ ਐਗਜਿ਼ਟ ਨੇੜੇ ਹਾਈਵੇਅ 401 ਉੱਤੇ ਦੁਪਹਿਰੇ 3:30 ਵਜੇ ਪੱਛਮ ਵਾਲੀਆਂ ਲੇਨਜ਼ ਉੱਤੇ ਵਾਪਰੀ। ਓਨਟਾਰੀਓ ਪ੍ਰੋਵਿੰਸ਼ੀਅਲ ਪੁਲਿਸ ਵੱਲੋਂ ਹਾਦਸੇ ਵਿੱਚ ਮਾਰੇ ਗਏ ਵਿਅਕਤੀ ਦੀ ਪਛਾਣ ਮੈਥਿਊ ਰੌਬਰਟ ਜੈਮੀਸਨ ਵਜੋਂ ਕੀਤੀ ਗਈ। ਇਹ ਹਾਦਸਾ ਐਤਵਾਰ ਨੂੰ ਵਾਪਰਿਆ।
ਫੌਂਟੋਨੈਕ ਕਾਊਂਟੀ ਪੈਰਾਮੈਡਿਕਸ ਦਾ ਕਹਿਣਾ ਹੈ ਕਿ ਹਾਦਸੇ ਤੋਂ ਤੁਰੰਤ ਬਾਅਦ ਹੀ ਵੱਡੀ ਗਿਣਤੀ ਵਿੱਚ ਰੈਸਕਿਊ ਕ੍ਰੀਊ ਮੌਕੇ ਉੱਤੇ ਪਹੁੰਚਿਆ। ਮੌਕੇ ਉੱਤੇ ਹੀ 16 ਵਿਅਕਤੀਆਂ ਦਾ ਇਲਾਜ ਕੀਤਾ ਗਿਆ ਤੇ ਫਿਰ ਉਨ੍ਹਾਂ ਨੂੰ ਹਸਪਤਾਲ ਪਹੁੰਚਾਇਆ ਗਿਆ। ਇਨ੍ਹਾਂ ਵਿੱਚੋਂ ਤਿੰਨ ਦੀ ਹਾਲਤ ਨਾਜ਼ੁਕ ਦੱਸੀ ਜਾਂਦੀ ਹੈ। ਇੱਕ ਵਿਅਕਤੀ ਨੂੰ ਮੌਕੇ ਉੱਤੇ ਹੀ ਇਲਾਜ ਤੋਂ ਬਾਅਦ ਘਰ ਭੇਜ ਦਿੱਤਾ ਗਿਆ।
ਸੜਕ ਉੱਤੇ ਫਸੇ ਹੋਏ ਹੋਰਨਾਂ ਲੋਕਾਂ ਨੂੰ ਕਿੰਗਸਟਨ ਦੇ ਹੀ ਇੱਕ ਵਾਰਮਿੰਗ ਸੈਂਟਰ ਵਿੱਚ ਭੇਜਿਆ ਗਿਆ। ਹਾਈਵੇਅ 401 ਜੌਇਸਵਿੱਲੇ ਐਗਜਿ਼ਟ 632 ਤੋਂ ਹਾਈਵੇਅ 15 ਤੱਕ ਹਾਦਸੇ ਦੀ ਜਾਂਚ ਲਈ ਬੰਦ ਕੀਤਾ ਗਿਆ ਹੈ। ਰਾਤ ਭਰ 15 ਸੈਂਟੀਮੀਟਰ ਬਰਫਬਾਰੀ ਹੋਣ ਦੀ ਸੰਭਾਵਨਾ ਦੇ ਚੱਲਦਿਆਂ ਵਿੰਟਰ ਵੈਦਰ ਐਡਵਾਈਜ਼ਰੀ ਕਿੰਗਸਟਨ ਵਿੱਚ ਅਜੇ ਵੀ ਜਾਰੀ ਹੈ।