ਰਾਮਨਗਰ (ਉਤਰਾਖੰਡ), 1 ਦਸੰਬਰ (ਪੋਸਟ ਬਿਊਰੋ)- ਰਾਮਨਗਰ ਤੋਂ ਬਾਗੇਸ਼ਵਰ ਜਾਂਦੀ ਇੱਕ ਯਾਤਰੀ ਬਸ 'ਤੇ ਹਾਥੀ ਨੇ ਹਮਲਾ ਕਰ ਕੇ ਇੱਕ ਅਧਿਆਪਕ ਨੂੰ ਮਾਰ ਦਿੱਤਾ ਹੈ। ਹਮਲਾਵਰ ਹਾਥੀ ਨੇ ਖਾਣੇ ਦੀ ਭਾਲ ਵਿੱਚ ਬਸ ਦੀ ਖਿੜਕੀ ਅਤੇ ਦਰਵਾਜ਼ੇ ਦੇ ਸ਼ੀਸ਼ੇ ਤੋੜ ਕੇ ਬਸ ਵਿੱਚ ਹਾਹਾਕਾਰ ਮਚਾ ਦਿੱਤੀ। ਇਸ ਦੌਰਾਨ ਮਚੀ ਭਾਜੜ ਵਿੱਚ ਕਈ ਯਾਤਰੀ ਜ਼ਖਮੀ ਹੋ ਗਏ। ਯਾਤਰੀਆਂ ਨੇ ਬਸ ਦੀਆਂ ਖਿੜਕੀਆਂ ਤੋਂ ਛਾਲਾਂ ਮਾਰ ਕੇ ਜਾਨਾਂ ਬਚਾਈਆਂ।
ਕੱਲ੍ਹ ਸਵੇਰੇ ਪੰਜ ਵਜੇ ਇੱਕ ਬਸ ਰਾਮਨਗਰ ਤੋਂ ਬਾਗੇਸ਼ਵਰ ਲਈ ਰਵਾਨਾ ਹੋਈ। ਕਰੀਬ ਤੀਹ ਕਿਲੋਮੀਟਰ ਦੂਰ ਕਾਲਗੜ੍ਹ ਜੰਗਲ ਡਵੀਜ਼ਨ ਦੇ ਮਨਰਾਲ ਰੇਂਜ ਦੇ ਕਾਰਬੇਟ ਟਾਈਗਰ ਰਿਜ਼ਰਵ ਵਿੱਚ ਕਾਠ ਕੀ ਨਾਵ ਪਿੰਡ ਦੇ ਕੋਲ ਸੜਕ ਕੰਢੇ ਦੀਆਂ ਜੰਗਲੀ ਝਾੜੀਆਂ ਵਿੱਚ ਲੁਕੇ ਇੱਕ ਹਾਥੀ ਨੇ ਬਸ ਦਾ ਰਸਤਾ ਰੋਕ ਦਿੱਤਾ। ਬਸ ਚਾਲਕ ਪੂਰਨ ਚੰਦਰ ਮੌਲੇਖੀ ਹੜਬੜਾਹਟ ਵਿੱਚ ਛੱਡ ਕੇ ਭੱਜ ਗਿਆ। ਗੁੱਸੇ ਵਿੱਚ ਆਏ ਹਾਥੀ ਨੇ ਬਸ ਦੇ ਅਗਲੇ ਸ਼ੀਸ਼ੇ ਨੂੰ ਸੁੰਢ ਨਾਲ ਤੋੜ ਦਿੱਤਾ ਅਤੇ ਬਸ ਦੀ ਅਗਲੀ ਸੀਟ 'ਤੇ ਬੈਠੇ ਹੋਏ ਜੀ ਆਈ ਸੀ ਇੰਟਰ ਕਾਲਜ, ਨੇੇਵਲ ਸਲਟ ਅਲਮੋੜਾ ਦੇ ਸੰਸਕ੍ਰਿਤ ਦੇ ਲੈਕਚਰਾਰ ਗਿਰੀਸ਼ ਚੰਦਰ ਪਾਂਡੇ ਵਾਸੀ ਰਾਮਨਗਰ ਨੂੰ ਮਾਰ ਦਿੱਤਾ। ਭਾਜੜ ਵਿੱਚ ਕਈ ਯਾਤਰੀ ਬੁਰੀ ਤਰ੍ਹਾਂ ਜ਼ਖਮੀ ਹੋ ਗਏ।