ਫਰੀਦਾਬਾਦ, 1 ਦਸੰਬਰ (ਪੋਸਟ ਬਿਊਰੋ)- ਕਸ਼ਮੀਰੀ ਡਰਾਈਵਰ ਨੂੰ ਪਾਕਿਸਤਾਨੀ ਕਹਿ ਕੇ ਬੇਰਹਿਮੀ ਨਾਲ ਤੀਹ ਮਿੰਟ ਤੱਕ ਕੁੱਟਣ ਅਤੇ ਤੀਹ ਹਜ਼ਾਰ ਰੁਪਏ ਖੋਹਣ ਵਾਲੇ ਟਰੈਫਿਕ ਪੁਲਸ ਦੇ ਏ ਐੱਸ ਆਈ ਧਰਮਵੀਰ ਦੇ ਖਿਲਾਫ ਕੇਸ ਦਰਜ ਕਰ ਕੇ ਉਸ ਨੂੰ ਗ੍ਰਿਫਤਾਰ ਕਰ ਲਿਆ ਗਿਆ ਹੈ। ਘਟਨਾ ਸਮੇਂ ਮੌਕੇ 'ਤੇ ਮੌਜੂਦ ਦੋ ਹੈਡ ਕਾਂਸਟੇਬਲ ਸਮੇਤ ਚਾਰ ਪੁਲਸ ਮੁਲਾਜ਼ਮਾਂ ਨੂੰ ਸਸਪੈਂਡ ਕਰ ਦਿੱਤਾ ਤੇ ਤਿੰਨ ਹੋਮਗਾਰਡਾਂ ਨੂੰ ਡਿਊਟੀ ਤੋਂ ਹਟਾ ਕੇ ਉਨ੍ਹਾਂ ਖਿਲਾਫ ਕਾਰਵਾਈ ਲਈ ਲਿਖਿਆ ਗਿਆ ਹੈ। ਇਸ ਘਟਨਾ ਨੂੰ ਪੁਲਸ ਹੈੱਡ ਕੁਆਰਟਰ ਵਿੱਚ ਗੰਭੀਰਤਾ ਨਾਲ ਲਿਆ ਗਿਆ ਹੈ।
ਡਰਾਈਵਰ ਨੇ ਟਰੈਫਿਕ ਪੁਲਸ ਦੀ ਇਸ ਗੁੰਡਾਗਰਦੀ ਦਾ ਵੀਡੀਓ ਸੋਸ਼ਲ ਮੀਡੀਆ 'ਤੇ ਵਾਇਰਲ ਕੀਤਾ। ਇਸ ਪਿੱਛੋਂ ਪੁਲਸ ਅਧਿਕਾਰੀ ਹਰਕਤ ਵਿੱਚ ਆਏ ਤੇ ਡਰਾਈਵਰ ਦੀ ਤਲਾਸ਼ ਕੀਤੀ। ਪੀੜਤ ਡਰਾਈਵਰ ਮੁਹੰਮਦ ਮਕਬੂਲ ਜੇ ਐਂਡ ਕੇ ਦੇ ਕੁਲਗਾਂਵ ਜ਼ਿਲੇ ਦਾ ਰਹਿਣ ਵਾਲਾ ਹੈ। ਉਹ ਕੋਲਕਾਤਾ ਤੋਂ ਮਾਲ ਟਰੱਕ ਵਿੱਚ ਲੱਦ ਕੇ ਇਸ ਰਸਤੇ ਸ੍ਰੀਨਗਰ ਜਾ ਰਹੇ ਸਨ। ਮੌਜਪੁਰ ਟੋਲ ਪਲਾਜ਼ਾ ਨੇੜੇ ਟਰੈਫਿਕ ਪੁਲਸ ਮੁਲਾਜ਼ਮਾਂ ਨੇ ਉਨ੍ਹਾਂ ਨੂੰ ਰੋਕ ਕੇ ਪਹਿਲਾਂ ਟਰੱਕ ਦਾ 18 ਹਜ਼ਾਰ ਰੁਪਏ ਦਾ ਚਲਾਨ ਕੀਤਾ। ਫਿਰ ਤੀਹ ਹਜ਼ਾਰ ਰੁਪਏ ਖੋਹ ਲਏ। ਪੁਲਸ ਬਚਾਅ ਵਿੱਚ ਪੀੜਤ ਡਰਾਈਵਰ 'ਤੇ ਚਲਾਨ ਦਾ ਵਿਰੋਧ ਕਰਦੇ ਹੋਏ ਕੁੱਟਮਾਰ ਕਰਨ ਤੇ ਸਿਪਾਹੀ ਦਾ ਗਲਾ ਫੜਨ ਦਾ ਦੋਸ਼ ਲਾ ਰਹੀ ਹੈ।
ਪੀੜਤ ਡਰਾਈਵਰ ਮੁਹੰਮਦ ਨੇ ਦੱਸਿਆ ਕਿ ਉਹ ਮੂਲ ਰੂਪ ਤੋਂ ਜੰਮੂ-ਕਸ਼ਮੀਰ ਦੇ ਕੁਲਗਾਂਵ ਜ਼ਿਲੇ ਦਾ ਵਸਨੀਕ ਹੈ ਅਤੇ 13 ਨਵੰਬਰ ਨੂੰ ਉਹ ਕਸ਼ਮੀਰ ਤੋਂ ਸੇਬ ਟਰੱਕ ਵਿੱਚ ਲੋਡ ਕਰ ਕੇ ਕੋਲਕਾਤਾ ਲਈ ਨਿਕਲੇ ਸਨ। ਉਸ ਦੇ ਨਾਲ ਦੋ ਹੋਰ ਸਾਥੀ ਆਦਿਲ ਅਤੇ ਸਮੀਰ ਸਨ। ਕੋਲਕਾਤਾ ਵਿੱਚ ਸੇਬ ਖਾਲੀ ਕਰ ਕੇ ਉਥੋਂ 21 ਨਵੰਬਰ ਨੂੰ ਸ੍ਰੀਨਗਰ ਦੇ ਲਈ ਐਚ ਐਮ ਟੀ ਦਾ ਮਾਲ ਲੋਡ ਕਰ ਕੇ ਹਾਈਵੇ ਦੇ ਰਸਤੇ ਸ੍ਰੀਨਗਰ ਜਾ ਰਹੇ ਸਨ। ਸ਼ੁੱਕਰਵਾਰ ਸਵੇਰੇ ਉਹ ਛਾਂਇਸਾ ਥਾਣਾ ਖੇਤਰ ਵਿੱਚ ਮੌਜਪੁਰ ਟੋਲ ਪਲਾਜ਼ਾ ਦੇ ਨੇੜੇ ਪਹੁੰਚੇ ਤਾਂ ਉਨ੍ਹਾਂ ਦੇ ਨਾਲ ਇਹ ਘਟਨਾ ਹੋਈ ਸੀ।