ਅੰਮ੍ਰਿਤਸਰ, 1 ਦਸੰਬਰ (ਪੋਸਟ ਬਿਊਰੋ)- ਵਿਆਹ ਦਾ ਝਾਂਸਾ ਦੇ ਕੇ ਸਰੀਰਕ ਸੰਬੰਧ ਬਣਾਉਣ ਪਿੱਛੋਂ ਫਿਰ ਵਿਆਹ ਤੋਂ ਇਨਕਾਰ ਕਰਨ ਵਾਲੇ ਨੌਜਵਾਨ ਉੱਤੇ ਬਲਾਤਕਾਰ ਦਾ ਕੇਸ ਦਰਜ ਹੋਣ ਲੱਗਾ ਤਾਂ ਉਸ ਨੇ ਵਿਆਹ ਦਾ ਸਮਝੌਤਾ ਕਰਨ ਦੀ ਗੱਲ ਕਹਿ ਕੇ ਪੁਲਸ ਕਾਰਵਾਈ ਰੁਕਵਾ ਲਈ। ਕੱਲ੍ਹ ਦੁਲਹਨ ਹੱਥਾਂ 'ਚ ਮਹਿੰਦੀ ਲਾ ਕੇ ਲਾਲ ਜੋੜੇ ਵਿੱਚ ਸਜੀ ਬੈਠੀ ਰਹੀ, ਪਰ ਨਾ ਬਾਰਾਤ ਪਹੁੰਚੀ ਅਤੇ ਨਾ ਲਾੜਾ। ਥਾਣਾ ਬੀ ਡਵੀਜ਼ਨ ਵਿੱਚ ਨਵੀਂ ਸ਼ਿਕਾਇਤ ਦਰਜ ਕੀਤੀ ਗਈ ਹੈ। ਥਾਣਾ ਇੰਚਾਰਜ ਗੁਰਵਿੰਦਰ ਸਿੰਘ ਨੇ ਦੱਸਿਆ ਕਿ ਲਛਮਣਸਰ ਚੌਕ ਦੇ ਰੋਹਿਤ ਸਹਿਗਲ ਦੇ ਖਿਲਾਫ ਕੇਸ ਦਰਜ ਕੀਤਾ ਗਿਆ ਹੈ, ਪਰ ਦੋਸ਼ੀ ਦਾ ਮੋਬਾਈਲ ਬੰਦ ਹੈ, ਉਸ ਦੇ ਪਰਵਾਰ ਨਾਲ ਗੱਲਬਾਤ ਚੱਲ ਰਹੀ ਹੈ।
ਇਸ ਮਹਾਨਗਰ ਦੇ ਇੱਕ ਇਲਾਕੇ ਦੀ ਵਸਨੀਕ ਪੀੜਤਾ ਨੇ ਦੱਸਿਆ ਕਿ ਕੁਝ ਸਾਲ ਪਹਿਲਾਂ ਫੇਸਬੁਕ 'ਤੇ ਉਸ ਦੀ ਮੁਲਾਕਾਤ ਰੋਹਿਤ ਸਹਿਗਲ ਨਾਲ ਹੋਈ ਸੀ। ਰੋਹਿਤ ਨੇ ਪੀੜਤਾ ਨੂੰ ਦੱਸਿਆ ਕਿ ਉਹ ਫੈਕਟਰੀ ਦਾ ਮਾਲਕ ਹੈ ਤੇ ਉਸ ਤੋਂ ਬਿਨਾਂ ਨਹੀਂ ਰਹਿ ਸਕਦਾ। ਰੋਹਿਤ ਨੇ ਉਸ ਨੂੰ ਪਿਆਰ ਦੇ ਜਾਲ 'ਚ ਫਸਾਉਣਾ ਸ਼ੁਰੂ ਕਰ ਦਿੱਤਾ। ਮੌਕਾ ਪਾ ਕੇ ਉਸ ਨੇ ਉਸ ਨਾਲ ਸਰੀਰਕ ਸੰਬੰਧ ਬਣਾ ਲਏ। ਕੁਝ ਸਮਾਂ ਬਾਅਦ ਦੋਸ਼ੀ ਨੇ ਉਸ ਦਾ ਫੋਨ ਚੁੱਕਣਾ ਬੰਦ ਕਰ ਦਿੱਤਾ। ਜਦੋਂ ਉਸ ਨੂੰ ਜਾ ਕੇ ਮਿਲੀ ਤਾਂ ਉਸ ਨੇ ਦੱਸਿਆ ਕਿ ਉਹ ਵਿਆਹ ਨਹੀਂ ਕਰ ਸਕਦਾ, ਉਸ ਦੇ ਪਰਵਾਰ ਵਾਲੇ ਵਿਆਹ ਨੂੰ ਰਾਜ਼ੀ ਨਹੀਂ ਹਨ। ਪੀੜਤਾ ਨੇ ਸਾਰੀ ਗੱਲ ਆਪਣੇ ਪਰਵਾਰ ਨੂੰ ਦੱਸੀ ਤਾਂ ਪੁਲਸ ਕਮਿਸ਼ਨਰ ਸੁਖਚੈਨ ਸਿੰਘ ਗਿੱਲ ਨੂੰ ਸ਼ਿਕਾਇਤ ਕੀਤੀ ਗਈ। ਇਸ ਦੀ ਜਾਂਚ ਇੰਸਪੈਕਟਰ ਰਾਜਵਿੰਦਰ ਕੌਰ ਨੂੰ ਸੌਂਪੀ ਗਈ ਤਾਂ ਜਾਂਚ ਵਿੱਚ ਰੋਹਿਤ ਉਤੇ ਦੋਸ਼ ਸਾਬਤ ਹੋ ਗਏ। ਜਦੋਂ ਉਸ ਨੂੰ ਲੱਗਾ ਕਿ ਪੁਲਸ ਉਸ ਦੇ ਖਿਲਾਫ ਬਲਾਤਕਾਰ ਦਾ ਕੇਸ ਦਰਜ ਕਰੇਗੀ ਤਾਂ ਉਸ ਨੇ ਥਾਣੇ 'ਚ ਸਮਝੌਤਾ ਕੀਤਾ ਕਿ ਉਹ 30 ਨਵੰਬਰ ਨੂੰ ਇਸ ਕੁੜੀ ਨਾਲ ਵਿਆਹ ਕਰਵਾ ਲਵੇਗਾ। ਪੀੜਤਾ ਦੇ ਪਰਵਾਰ ਨੇ ਹੈਸੀਅਤ ਮੁਤਾਬਕ ਵਿਆਹ ਦਾ ਬੰਦੋਬਸਤ ਕਰ ਲਿਆ ਤੇ ਸਾਰਾ ਪਰਵਾਰ ਸ਼ੁੱਕਰਵਾਰ ਉਡੀਕਦਾ ਰਿਹਾ, ਪਰ ਨਾ ਲਾੜਾ ਬਰਾਤ ਲੈ ਕੇ ਨਹੀਂ ਪੁੱਜਾ।