ਲਹਿਰਾਗਾਗਾ, 1 ਦਸੰਬਰ (ਪੋਸਟ ਬਿਊਰੋ)- ਪਿਛਲੇ ਦਿਨੀਂ ਪਿੰਡ ਚੂਲੜ ਕਲਾਂ ਦੇ ਨੌਜਵਾਨ ਕਾਲਾ ਸਿੰਘ ਦੀ ਨਹਿਰ 'ਚੋਂ ਲਾਸ਼ ਮਿਲਣ ਪਿੱਛੋਂ ਬੇਸ਼ੱਕ ਮ੍ਰਿਤਕ ਦੀ ਪਤਨੀ ਗੋਲੋ ਕੌਰ ਨੇ ਹੋਰ ਲੋਕਾਂ ਨਾਲ ਮਿਲ ਕੇ ਲਹਿਰਾਗਾਗਾ-ਜਾਖਲ ਮੁੱਖ ਸੜਕ 'ਤੇ ਧਰਨਾ ਦੇ ਕੇ ਕਾਤਲਾਂ ਨੂੰ ਗ੍ਰਿਫਤਾਰ ਕਰਨ ਦੀ ਮੰਗ ਕੀਤੀ ਸੀ ਅਤੇ ਪੁਲਸ ਨੇ ਮ੍ਰਿਤਕ ਕਾਲਾ ਸਿੰਘ ਦੀ ਪਤਨੀ ਦੇ ਬਿਆਨਾਂ ਉੱਤੇ ਕੇਸ ਵੀ ਦਰਜ ਕਰ ਲਿਆ ਸੀ, ਪਰ ਕਹਾਣੀ ਪੁੱਠੀ ਪੈ ਗਈ ਹੈ।
ਜ਼ਿਲਾ ਪੁਲਸ ਮੁਖੀ ਡਾਕਟਰ ਸੰਦੀਪ ਗਰਗ ਦੀਆਂ ਹਦਾਇਤਾਂ ਉਤੇ ਡੀ ਐੱਸ ਪੀ ਬੂਟਾ ਸਿੰਘ ਗਿੱਲ ਦੀ ਅਗਵਾਈ ਹੇਠ ਪੁਲਸ ਟੀਮ ਇਸ ਕੇਸ ਨੂੰ ਹੱਲ ਕਰਨ ਵਿੱਚ ਗੰਭੀਰਤਾ ਨਾਲ ਲੱਗੀ ਹੋਈ ਸੀ। ਹਰ ਪੱਖੋਂ ਜਾਂਚ ਤੋਂ ਬਾਅਦ ਮ੍ਰਿਤਕ ਦੀ ਪਤਨੀ ਗੋਲੋ ਕੌਰ ਅਤੇ ਉਸ ਦੇ ਆਸ਼ਕ ਪਵਨ ਕੁਮਾਰ ਨੂੰ ਗ੍ਰਿਫਤਾਰ ਕਰ ਕੇ ਪੁਲਸ ਨੇ ਇਸ ਕਤਲ ਕਾਂਡ ਦਾ ਪਰਦਾ ਫਾਸ਼ ਕਰ ਦਿੱਤਾ ਹੈ। ਡੀ ਐਸ ਪੀ ਬੂਟਾ ਸਿੰਘ ਗਿੱਲ ਅਨੁਸਾਰ ਜਾਂਚ ਦੌਰਾਨ ਮ੍ਰਿਤਕ ਦੇ ਭਰਾ ਅਮਰੀਕ ਸਿੰਘ ਨੇ ਦੱਸਿਆ ਕਿ ਮੇਰੇ ਭਰਾ ਕਾਲਾ ਸਿੰਘ ਦੀ ਪਤਨੀ ਗੋਲੋ ਕੌਰ ਦੇ ਪਿੰਡ ਦੇ ਨੌਜਵਾਨ ਪਵਨ ਕੁਮਾਰ ਨਾਲ ਨਾਜਾਇਜ਼ ਸੰਬੰਧ ਸਨ ਅਤੇ ਮੇਰਾ ਭਰਾ ਉਸ ਨੂੰ ਇਸ ਕੰਮ ਤੋਂ ਰੋਕਦਾ ਸੀ, ਜਿਸ ਕਰ ਕੇ ਮੇਰੀ ਭਰਜਾਈ ਕਾਲਾ ਸਿੰਘ ਨੂੰ ਆਪਣੇ ਰਾਹ ਦਾ ਰੋੜਾ ਸਮਝਦੀ ਸੀ ਅਤੇ ਗੋਲੋ ਨੇ ਕਾਲਾ ਸਿੰਘ ਦੇ ਗੁੰਮ ਹੋਣ ਬਾਰੇ ਪੁਲਸ ਕੋਲ ਝੂਠੀ ਰਿਪੋਰਟ ਲਿਖਵਾਈ ਹੈ। ਮੇਰੇ ਭਰਾ ਦੀ ਲਾਸ਼ ਭਾਖੜਾ 'ਚੋਂ ਮਿਲੀ, ਪਰ ਮੇਰੀ ਭਰਜਾਈ ਨੇ ਆਪਣੇ ਆਸ਼ਕ ਪਵਨ ਕੁਮਾਰ ਨਾਲ ਮਿਲ ਕੇ ਮੇਰੇ ਭਰਾ ਕਾਲਾ ਸਿੰਘ ਨੂੰ ਕਤਲ ਕਰ ਕੇ ਲਾਸ਼ ਖੁਰਦ ਬੁਰਦ ਕਰਨ ਦੀ ਨੀਤ ਨਾਲ ਨਹਿਰ ਵਿੱਚ ਸੁੱਟੀ ਸੀ। ਡੀ ਐੱਸ ਪੀ ਗਿੱਲ ਨੇ ਕਿਹਾ ਕਿ ਮ੍ਰਿਤਕ ਦੇ ਭਰਾ ਦੀ ਪਤਨੀ ਗੋਲੋ ਕੌਰ ਅਤੇ ਉਸ ਦੇ ਆਸ਼ਕ ਪਵਨ ਕੁਮਾਰ ਨੂੰ ਗ੍ਰਿਫਤਾਰ ਕਰ ਲਿਆ ਗਿਆ ਹੈ।