ਯੂ ਐਨ, 29 ਨਵੰਬਰ (ਪੋਸਟ ਬਿਊਰੋ)- ਸੰਸਾਰ ਪੱਧਰ 'ਤੇ ਪਰਵਾਸੀਆਂ ਦੀ ਗਿਣਤੀ 'ਚ ਭਾਰਤ ਪਹਿਲੇ ਨੰਬਰ ਉੱਤੇ ਕਾਇਮ ਹੈ। ਭਾਰਤੀ ਮੂਲ ਦੇ ਲੋਕਾਂ ਦੀ ਗਿਣਤੀ ਦੁਨੀਆ ਦੇ ਵੱਖ-ਵੱਖ ਦੇਸ਼ 'ਚ ਕੁੱਲ ਇੱਕ ਕਰੋੜ 75 ਲੱਖ ਹੈ। ਇਸ ਤੋਂ ਇਲਾਵਾ ਘਰ ਪੈਸੇ ਭੇਜਣ ਵਾਲਿਆਂ ਵਿੱਚ ਵੀ ਭਾਰਤੀਆਂ ਦਾ ਨੰਬਰ ਪਹਿਲਾ ਹੈ।
ਯੂ ਐਨ ਓ ਦੀ ਏਜੰਸੀ ਮੁਤਾਬਕ ‘ਗਲੋਬਲ ਮਾਈਗ੍ਰੇਸ਼ਨ ਰਿਪੋਰਟ 2020' ਦੱਸਦੀ ਹੈ ਕਿ ਆਪਣੇ ਅਸਲ ਦੇਸ਼ ਤੋਂ ਬਾਹਰ ਹੋਰਨਾਂ ਮੁਲਕਾਂ 'ਚ ਫੈਲੇ ਤੇ ਰਹਿ ਰਹੇ ਪਰਵਾਸੀਆਂ ਦੀ ਕੁੱਲ ਗਿਣਤੀ 27 ਕਰੋੜ ਹੈ। ਇਨ੍ਹਾਂ ਦੀ ਪਹਿਲੀ ਪਸੰਦ ਅਮਰੀਕਾ ਹੈ ਤੇ ਗਿਣਤੀ ਪੰਜ ਕਰੋੜ ਤੋਂ ਵੱਧ ਹੈ। ਉਂਜ ਇਹ ਦੁਨੀਆ ਦੀ ਕੁੱਲ ਆਬਾਦੀ ਦਾ ਬਹੁਤ ਛੋਟਾ ਹਿੱਸਾ ਹੈ ਅਤੇ 96.5 ਫੀਸਦੀ ਆਬਾਦੀ ਆਪਣੇ ਜਨਮ ਵਾਲੇ ਦੇਸ਼ਾਂ ਵਿੱਚ ਹੀ ਰਹਿੰਦੀ ਹੈ। ਕੁੱਲ ਪਰਵਾਸੀਆਂ ਦਾ ਅੱਧਾ ਹਿੱਸਾ ਯੂਰਪ ਤੇ ਉਤਰੀ ਅਮਰੀਕਾ ਵਿੱਚ ਰਹਿੰਦਾ ਹੈ। ਇਨ੍ਹਾਂ ਵਿੱਚ 52 ਫੀਸਦੀ ਪੁਰਸ਼ ਹਨ। ਦੋ-ਤਿਹਾਈ ਹਿੱਸਾ ਕੰਮ ਦੀ ਭਾਲ ਵਿੱਚ ਹੈ।
ਪਰਵਾਸੀਆਂ ਦੀ ਗਿਣਤੀ ਦੇ ਮਾਮਲੇ 'ਚ ਭਾਰਤ ਤੋਂ ਬਾਅਦ ਮੈਕਸਿਕੋ (ਇੱਕ ਕਰੋੜ 18 ਲੱਖ) ਅਤੇ ਚੀਨ (ਇੱਕ ਕਰੋੜ) ਦਾ ਨੰਬਰ ਹੈ। ਪਿੱਛੇ ਪਰਵਾਰਾਂ-ਰਿਸ਼ਤੇਦਾਰਾਂ ਨੂੰ ਪੈਸੇ ਭੇਜਣ ਵਿੱਚ ਚੀਨ ਦੂਜੇ ਅਤੇ ਮੈਕਸਿਕੋ ਤੀਜੇ ਨੰਬਰ 'ਤੇ ਹੈ। ਅਮਰੀਕਾ ਤੋਂ ਸਭ ਤੋਂ ਵੱਧ ਪੈਸੇ ਭੇਜੇ ਜਾਂਦੇ ਹਨ। ਦੂਜੇ ਨੰਬਰ ਉੱਤੇ ਯੂ ਏ ਈ ਅੇ ਤੀਜੇ ਨੰਬਰ ਉੱਤੇ ਸਾਊਦੀ ਅਰਬ ਵੀ ਪਰਵਾਸੀਆਂ ਦੀ ਪਸੰਦ ਹਨ। ਰਿਪੋਰਟ ਮੁਤਾਬਕ ਇਹ ਵਰਤਾਰਾ ਭਵਿੱਖ ਵਿੱਚ ਵੀ ਕਈ ਸਾਲਾਂ ਤੱਕ ਇਸੇ ਤਰ੍ਹਾਂ ਬਣਿਆ ਰਹੇਗਾ। ਵਿਕਾਸਸ਼ੀਲ ਦੇਸ਼ਾਂ ਵਿੱਚ ਆਬਾਦੀ ਦਾ ਵਾਧਾ ਭਵਿੱਖੀ ਪੀੜ੍ਹੀਆਂ 'ਤੇ ਪਰਵਾਸ ਲਈ ਦਬਾਅ ਬਣਾਏਗਾ। ਕੰਮਕਾਰ ਦੇ ਸਿਲਸਿਲੇ 'ਚ ਆਰਜ਼ੀ ਵਰਕਰ ਸਭ ਤੋਂ ਜ਼ਿਆਦਾ ਅਜੇ ਵੀ ਯੂ ਏ ਈ ਦਾ ਰੁਖ ਕਰਦੇ ਹਨ।