ਓਟਵਾ, 29 ਨਵੰਬਰ (ਪੋਸਟ ਬਿਊਰੋ) : ਜਸਟਿਨ ਟਰੂਡੋ ਤੇ ਕ੍ਰਿਸਟੀਆ ਫਰੀਲੈਂਡ ਓਟਵਾ ਵਿੱਚ ਮੈਕਸਿਕੋ ਦੇ ਉੱਘੇ ਡਿਪਲੋਮੈਟ ਨਾਲ ਮੁਲਾਕਾਤ ਕਰਨਗੇ। ਜਿ਼ਕਰਯੋਗ ਹੈ ਕਿ ਨਵੇਂ ਨੌਰਥ ਅਮੈਰੀਕਨ ਫਰੀ ਟਰੇਡ ਅਗਰੀਮੈਂਟ ਦੀ ਮਨਜ਼ੂਰੀ ਲਈ ਕੋਸਿ਼ਸ਼ਾਂ ਤੇਜ਼ ਕਰ ਦਿੱਤੀਆਂ ਗਈਆਂ ਹਨ।
ਪ੍ਰਧਾਨ ਮੰਤਰੀ ਤੇ ਡਿਪਟੀ ਪ੍ਰਧਾਨ ਮੰਤਰੀ ਇਸ ਟਰੇਡ ਡੀਲ ਲਈ ਨਿਯੁਕਤ ਮੈਕਸਿਕੋ ਦੇ ਉੱਘੇ ਡਿਪਲੋਮੈਟ ਜੀਜ਼ਸ ਸੀਡ ਨਾਲ ਅੱਜ ਸਵੇਰੇ ਮੁਲਾਕਾਤ ਕਰਨਗੇ। ਇੱਥੇ ਦੱਸਣਾ ਬਣਦਾ ਹੈ ਕਿ ਤਿੰਨਾਂ ਦੇਸ਼ਾਂ ਨੇ ਭਾਵੇਂ ਯੂਨਾਈਟਿਡ ਮੈਕਸਿਕੋ ਕੈਨੇਡਾ ਅਗਰੀਮੈਂਟ ਉੱਤੇ ਸਹੀ ਪਾ ਦਿੱਤੀ ਹੈ ਪਰ ਇਸ ਡੀਲ ਨੂੰ ਅਮਲੀ ਰੂਪ ਦੇਣ ਤੋਂ ਪਹਿਲਾਂ ਸਬੰਧਤ ਲੈਜਿਸਲੇਚਰਜ਼ ਤੋਂ ਮਨਜ਼ੂਰ ਹੋਣਾ ਬਹੁਤ ਜ਼ਰੂਰੀ ਹੈ ਤੇ ਹੁਣ ਤੱਕ ਇਸ ਡੀਲ ਨੂੰ ਸਿਰਫ ਮੈਕਸਿਕੋ ਵੱਲੋਂ ਹੀ ਹਰੀ ਝੰਡੀ ਦਿੱਤੀ ਗਈ ਹੈ।
ਇਹ ਡੀਲ ਫਿਲਹਾਲ ਅਮਰੀਕਾ ਵਿੱਚ ਸਿਰੇ ਨਹੀਂ ਚੜ੍ਹ ਸਕੀ ਜਿੱਥੇ ਕਾਂਗਰਸ ਵਿੱਚ ਡੈਮੋਕ੍ਰੈਟਸ ਲੇਬਰ ਤੇ ਐਨਵਾਇਰਮੈਂਟ ਮਾਪਦੰਡਾਂ ਲਈ ਸਖ਼ਤ ਮਾਪਦੰਡ ਅਪਨਾਉਣ ਲਈ ਦਬਾਅ ਪਾ ਸਕਦੇ ਹਨ। ਬਹੁਤੀ ਸਮੱਸਿਆ ਅਮਰੀਕਾ ਤੇ ਮੈਕਸਿਕੋ ਵਿੱਚ ਹੈ ਪਰ ਕੈਨੇਡਾ ਹਾਲਾਤ ਨੂੰ ਸਾਜ਼ਗਾਰ ਬਣਾਉਣ ਵਿੱਚ ਅਹਿਮ ਭੂਮਿਕਾ ਨਿਭਾਅ ਸਕਦਾ ਹੈ। ਅਮਰੀਕੀ ਅਧਿਕਾਰੀਆਂ ਵੱਲੋਂ ਅਮਰੀਕੀ ਥੈਂਕਸਗਿਵਿੰਗ, ਜੋ ਕਿ ਕੱਲ੍ਹ ਸੀ, ਤੱਕ ਇਸ ਡੀਲ ਨੂੰ ਸਿਰੇ ਚੜ੍ਹਾਉਣ ਲਈ ਗੱਲ ਵੀ ਕੀਤੀ ਗਈ ਸੀ।