ਸਾਲ 2005 'ਚ ਫਿਲਮ ‘ਚਾਂਦ ਸਾ ਰੌਸ਼ਨ ਚਿਹਰਾ’ ਨਾਲ ਬਾਲੀਵੁੱਡ ਵਿੱਚ ਆਪਣਾ ਕਰੀਅਰ ਸ਼ੁਰੂ ਕਰਨ ਵਾਲੀ ਤਮੰਨਾ ਭਾਟੀਆ ਨੇ ਪਹਿਲਾਂ ਬਾਲੀਵੁੱਡ ਵਿੱਚ ਸਿੱਕਾ ਨਾ ਚੱਲਣ ਕਾਰਨ ਸਾਊਥ ਫਿਲਮ ਨਗਰੀ ਦਾ ਰੁਖ਼ ਕਰ ਲਿਆ, ਜਿੱਥੇ ਅੱਜ ਉਹ ਸਭ ਤੋਂ ਹਿੱਟ ਹੀਰੋਇਨਾਂ 'ਚੋਂ ਇੱਕ ਹੈ। ਉਸ ਨੇ ਸਾਲ 2013 ਵਿੱਚ ਫਿਲਮ ‘ਹਿੰਮਤਵਾਲਾ’ ਨਾਲ ਬਾਲੀਵੁੱਡ 'ਚ ਵਾਪਸੀ ਕੀਤੀ ਅਤੇ ਉਦੋਂ ਤੋਂ ਲੈ ਕੇ ਕਈ ਹਿੰਦੀ ਫਿਲਮਾਂ ਦਾ ਹਿੱਸਾ ਬਣ ਚੁੱਕੀ ਹੈ। ਖਾਸ ਗੱਲ ਇਹ ਕਿ ਲਗਭਗ ਡੇਢ ਦਹਾਕੇ ਲੰਬੇ ਆਪਣੇ ਕਰੀਅਰ ਦੌਰਾਨ ਉਸ ਨੇ ਕਦੇ ਆਪਣੇ ਸਿਧਾਂਤਾਂ ਨੂੰ ਨਹੀਂ ਤੋੜਿਆ। ਉਸ ਬਾਰੇ ਜੋ ਗੱਲ ਬਿਲਕੁਲ ਨਹੀਂ ਬਦਲੀ, ਉਹ ਇਹ ਕਿ ਕਿਸੇ ਫਿਲਮ ਨੂੰ ਸਾਈਨ ਕਰਦੇ ਸਮੇਂ ਉਸ ਦੇ ਕਾਂਟ੍ਰੈਕਟ ਦੀ ਸ਼ਰਤ। ਤਮੰਨਾ ਨੇ ਕਰੀਅਰ ਦੀ ਸ਼ੁਰੂਆਤ 'ਚ ਹੀ ਆਪਣੇ ਕਾਂਟ੍ਰੈਕਟ 'ਚ ਸ਼ਰਤ ਰੱਖੀ ਸੀ ਕਿ ਉਹ ਆਨਸਕਰੀਨ ਕਿੱਸ ਨਹੀਂ ਕਰੇਗੀ।
ਪਿੱਛੇ ਜਿਹੇ ਤੇਲਗੂ ਅਤੇ ਹਿੰਦੀ ਵਿੱਚ ਰਿਲੀਜ਼ ਫਿਲਮ ‘ਸੇ ਰਾ ਨਰਸਿਮਹਾ ਰੈੱਡੀ’ ਵਿੱਚ ਅਮਿਤਾਬ ਬੱਚਨ ਅਤੇ ਚਿਰੰਜੀਵੀ ਵਰਗੇ ਵੱਡੇ ਸਿਤਾਰਿਆਂ ਨਾਲ ਨਜ਼ਰ ਆਈ ਤਮੰਨਾ ਦੀ ਝੋਲੀ ਫਿਲਮਾਂ ਨਾਲ ਭਰੀ ਪਈ ਹੈ। ਬਾਲੀਵੁੱਡ ਵਿੱਚ ਉਹ ਫਿਲਮ ‘ਬੋਲੇ ਚੂੜੀਆਂ' ਵਿੱਚ ਨਜ਼ਰ ਆਏਗੀ ਤਾਂ ਸਾਊਥ ਦੀਆਂ ਕੁਝੇ ਵੱਡੀਆਂ ਫਿਲਮਾਂ ਵਿੱਚ ਵੀ ਕੰਮ ਕਰ ਰਹੀ ਹੈ। ਪੇਸ਼ ਹਨ ਉਸ ਨਾਲ ਗੱਲਬਾਤ ਦੇ ਮੁੱਖ ਅੰਸ਼ :
* ਤੁਸੀਂ ਪਿੱਛੇ ਜਿਹੇ ਫਿਰ ਕਿਹਾ ਹੈ ਕਿ ਤੁਸੀਂ ਪਰਦੇ 'ਤੇ ਕਿਸਿੰਗ ਨਹੀਂ ਕਰੋਗੇ? ਇਸ ਬਾਰੇ ਕੁਝ ਦੱਸੋ?
- ਮੈਂ ਅੱਜ ਤੱਕ ਆਪਣੇ ਕਾਂਟ੍ਰੈਕਟ 'ਚ ਇਸ ਹਿੱਸੇ ਨੂੰ ਨਹੀਂ ਬਦਲਿਆ ਤੇ ਪਤਾ ਨਹੀਂ ਕਿਉਂ, ਪਰ ਮੈਂ ਜਦੋਂ ਤੋਂ ਕਰੀਅਰ ਸ਼ੁਰੂ ਕੀਤਾ, ਉਦੋਂ ਤੋਂ ਮੈਂ ਇਸ ਸ਼ਰਤ 'ਤੇ ਕਾਇਮ ਹਾਂ ਅਤੇ ਇਹ ਕਾਇਮ ਹੈ। ਇਸ 'ਚ ਕੋਈ ਤਬਦੀਲੀ ਨਹੀਂ ਆਈ।
* ਸੁਣਿਆ ਹੈ ਕਿ ਤੁਸੀਂ ਆਪਣੀ ਪਿਛਲੀ ਫਿਲਮ ਦੀ ਇੱਕ ਖਾਸ ਕਾਸਟਿਊਮ ਵਿੱਚ ਫਿੱਟ ਹੋਣ ਲਈ ਕਾਫੀ ਸਟਿ੍ਰਕਟ ਡਾਈਟ ਦੀ ਪਾਲਣਾ ਕੀਤੀ ਸੀ?
- ਜੀ ਹਾਂ, ਤਿੱਤਲੀ ਤੋਂ ਪ੍ਰੇਰਿਤ ਇਸ ਗ੍ਰੀਨ ਡ੍ਰੈੱਸ ਨੂੰ ਕਾਫੀ ਪਸੰਦ ਕੀਤਾ ਗਿਆ ਹੈ, ਪਰ ਮੈਨੂੰ ਇਸ ਡ੍ਰੈੱਸ ਵਿੱਚ ਫਿੱਟ ਆਉਣ ਲਈ ਕਾਫੀ ਮਿਹਨਤ ਕਰਨੀ ਪਈ। ਇਮਾਨਦਾਰੀ ਨਾਲ ਕਹਾਂ ਤਾਂ ਮੈਨੂੰ ਨਹੀਂ ਲੱਗਦਾ ਕਿ ਮੇਰੀ ਬਾਡੀ ਅਜਿਹੀ ਸੀ ਕਿ ਮੈਂ ਉਸ ਡ੍ਰੈੱਸ ਨੂੰ ਕੰਫਰਟੇਬਲ ਤਰੀਕੇ ਨਾਲ ਪਹਿਨ ਸਕਦੀ, ਇਸ ਲਈ ਮੈਂ ਆਪਣੀ ਡਾਈਟ ਵਿੱਚ ਤਬਦੀਲੀ ਕੀਤੀ ਤੇ ਭਾਰ ਘਟਾਇਆ, ਜਿਸ ਨਾਲ ਮੈਂ ਉਸ ਕਾਸਟਿਊਮ 'ਚ ਫਿੱਟ ਆ ਗਈ। ਮੈਨੂੰ ਲੱਗਾ ਕਿ ਜੇ ਮੈਂ ਨਾਰਮਲ ਸਾਈਜ਼ 'ਚ ਹੁੰਦੀ ਤਾਂ ਮੈਂ ਇੰਜ ਨਹੀਂ ਕਰਦੀ। ਉਂਝ ਮੈਂ ਫਿੱਟ ਰਹਿਣ ਲਈ ਰੈਗੂਲਰ ਕਸਰਤ ਕਰਦੀ ਹਾਂ। ਮੈਨੂੰ ਯੋਗਾ 'ਤੇ ਵੀ ਭਰੋਸਾ ਹੈ, ਇਸ ਲਈ ਮੈਂ ਨਿਯਮ ਨਾਲ ਯੋਗਾ ਵੀ ਕਰਦੀ ਹਾਂ।
* ਔਰਤਾਂ ਨਾਲ ਯੌਨ ਸ਼ੋਸ਼ਣ ਨੂੰ ਲੈ ਕੇ ਆਵਾਜ਼ਾਂ ਉਠਣ ਲੱਗੀਆਂ ਹਨ। ਤੁਹਾਨੂੰ ਕੀ ਲੱਗਦਾ ਹੈ ਕਿ ‘ਮੀ ਟੂ’ ਮੁਹਿੰਮ ਕਿੰਨੀ ਸਫਲ ਰਹੀ ਹੈ?
- ਮੈਂ ਮੀ ਟੂ ਮੁਹਿੰਮ ਹੇਠ ਆਪਣੀ ਕਹਾਣੀ ਸਾਂਝੀ ਕਰਨ ਵਾਲੀਆਂ ਅਤੇ ਆਵਾਜ਼ ਉਠਾਉਣ ਵਾਲੀਆਂ ਸਾਰੀਆਂ ਔਰਤਾਂ ਦੀ ਪ੍ਰਸ਼ੰਸਾ ਕਰਦੀ ਹਾਂ। ਆਪਣੇ ਸੁਭਾਅ ਕਾਰਨ ਮੈਂ ਕਦੇ ਇਸ ਤਰ੍ਹਾਂ ਦੀ ਕਿਸੇ ਘਟਨਾ ਦਾ ਸਾਹਮਣਾ ਨਹੀਂ ਕੀਤਾ, ਪਰ ਇਸ ਮੁਹਿੰਮ ਨਾਲ ਪੀੜਤ ਔਰਤਾਂ ਨੂੰ ਆਪਣੀ ਆਵਾਜ਼ ਬੁਲੰਦ ਕਰਨ ਦਾ ਇੱਕ ਮੰਚ ਮਿਲ ਗਿਆ ਹੈ, ਜੋ ਬਹੁਤ ਚੰਗੀ ਗੱਲ ਹੈ।
* ‘ਸੇ ਰਾਮ ਨਰਸਿਮਹਾ ਰੈੱਡੀ’ ਵਿੱਚ ਅਮਿਤਾਭ ਬੱਚਨ ਨਾਲ ਕੰਮ ਕਰਨ ਦਾ ਤਜਰਬਾ ਕਿਹੋ ਜਿਹਾ ਰਿਹਾ?
- ਉਹ ਅਜਿਹੇ ਕਲਾਕਾਰ ਹਨ, ਜਿਨ੍ਹਾਂ ਤੋਂ ਹਰ ਕੋਈ ਪ੍ਰੇਰਣਾ ਲੈਂਦਾ ਹੈ। ਉਹ ਸਕਰੀਨ 'ਤੇ ਆਉਂਦੇ ਹੀ ਜਾਦੂ ਜਿਹਾ ਕਰ ਦਿੰਦੇ ਹਨ। ਉਨ੍ਹਾਂ ਦਾ ਮੇਰੀ ਫਿਲਮ ਦਾ ਹਿੱਸਾ ਹੋਣਾ ਮੇਰੇ ਲਈ ਬਹੁਤ ਵੱਡੀ ਗੱਲ ਸੀ। ਜਦੋਂ ਤੁਸੀਂ ਕਿਸੇ ਅਜਿਹੇ ਐਕਟਰ ਨਾਲ ਫਿਲਮ ਕਰਦੇ ਹੋ, ਜਿਸ ਦੀਆਂ ਤੁਸੀਂ ਇੰਨੀਆਂ ਸਾਰੀਆਂ ਫਿਲਮਾਂ ਦੇਖੀਆਂ ਹੋਣ ਅਤੇ ਜਿਨ੍ਹਾਂ ਦਾ ਤੁਸੀਂ ਇੰਨਾ ਆਦਰ ਕਰਦੇ ਹੋ ਤਾਂ ਇਹ ਆਪਣੇ ਆਪ ਵਿੱਚ ਸਪੈਸ਼ਲ ਹੋ ਜਾਂਦਾ ਹੈ।
* ਆਪਣੀ ਅਗਲੀ ਹਿੰਦੀ ਫਿਲਮ ਬਾਰੇ ਦੱਸੋ?
- ਮੈਂ ਫਿਲਮ ‘ਬੋਲੇ ਚੂੜੀਆਂ’ ਵਿੱਚ ਨਵਾਜ਼ੂਦੀਨ ਸਿੱਦੀਕੀ ਦੇ ਆਪੋਜ਼ਿਟ ਕੰਮ ਕਰ ਰਹੀ ਹਾਂ। ਇਹ ਇੱਕ ਲਵ ਸਟੋਰੀ ਹੈ, ਮੈਂ ਇਸ ਫਿਲਮ ਦੀ ਕਾਫੀ ਸ਼ੂਟਿੰਗ ਕਰ ਲਈ ਹੈ। ਨਵਾਜ਼ੂਦੀਨ ਸਿੱਦੀਕੀ ਨਾਲ ਐਕਟਿੰਗ ਕਰਨਾ ਕਮਾਲ ਦਾ ਤਜਰਬਾ ਰਿਹਾ ਹੈ। ਉਹ ਕਮਾਲ ਦੇ ਕਲਾਕਾਰ ਹਨ। ਫਿਲਮ ਵਿੱਚ ਮੇਰਾ ਰੋਲ ਕਾਫੀ ਚੈਲੇਂਜਿੰਗ ਹੈ। ਇਸ ਫਿਲਮ ਦੀ ਕਹਾਣੀ ਬਹੁਤ ਰੌਚਕ ਲੱਗੀ ਅਤੇ ਇਸ ਲਈ ਮੈਂ ਇਸ ਨੂੰ ਸਵੀਕਾਰ ਕੀਤਾ ਹੈ।
* ਨਵਾਜ਼ ਅਤੇ ਤੁਸੀਂ ਦੋਵੇਂ ਹੀ ਐਕਟਿੰਗ 'ਚ ਮਾਹਰ ਹੋ ਤਾਂ ਸੈਟ 'ਤੇ ਕਿਹੋ ਜਿਹਾ ਮਾਹੌਲ ਸੀ?
- ਬਹੁਤ ਹੀ ਮਜ਼ੇਦਾਰ (ਹੱਸਦੇ ਹੋਏ) ਕਈ ਵਾਰ ਅਸੀਂ ਇੱਕ ਦੂਜੇ ਨੂੰ ਦੱਸਦੇ ਨਹੀਂ ਸੀ ਕਿ ਅਸੀਂ ਕੀ ਕਰਨਾ ਹੈ। ਇੱਕ ਤਰ੍ਹਾਂ ਇੱਕ ਦੂਜੇ ਲਈ ਸਾਡਾ ਸੰਦੇਸ਼ ਹੁੰਦਾ ਸੀ ਕਿ ਦੇਖੋ ਮੈਂ ਤੈਨੂੰ ਸਰਪ੍ਰਾਈਜ਼ ਦੇਣਾ ਹੈ, ਇਸ ਲਈ ਤਿਆਰ ਰਹਿਣਾ।