ਫਟੀਆਂ ਅੱਡੀਆਂ ਵੇਖਣ ਨੂੰ ਬਦਸੂਰਤ ਲੱਗਦੀਆਂ ਹੀ ਹਨ, ਨਾਲ ਇਨ੍ਹਾਂ ਵਿੱਚ ਦਰਦ ਵੀ ਹੋਣ ਲੱਗਦਾ ਹੈ। ਉਂਝ ਤਾਂ ਬਾਜ਼ਾਰ ਵਿੱਚ ਕਈ ਤਰ੍ਹਾਂ ਦੀਆਂ ਕਰੀਮਾਂ, ਲੋਸ਼ਨ ਮਿਲ ਜਾਂਦੇ ਹਨ, ਪਰ ਇਨ੍ਹਾਂ ਨਾਲ ਖਾਸ ਫਰਕ ਨਜ਼ਰ ਨਹੀਂ ਪੈਂਦਾ। ਅਜਿਹੇ ਵਿੱਚ ਕੁਝ ਘਰੇਲੂ ਨੁਸਖੇ ਵਰਤ ਕੇ ਵੀ ਇਸ ਸਮੱਸਿਆ ਤੋਂ ਛੁਟਕਾਰਾ ਪਾਇਆ ਜਾ ਸਕਦਾ ਹੈ।
ਬਨਸਪਤੀ ਤੇਲ- ਫਟੀਆਂ ਅੱਡੀਆਂ ਨੂੰ ਠੀਕ ਕਰਨ ਲਈ ਬਨਸਪਤੀ ਤੇਲ ਦਾ ਇਸਤੇਮਾਲ ਕਰ ਸਕਦੇ ਹੋ। ਇਸ ਲਈ ਸਭ ਤੋਂ ਪਹਿਲਾਂ ਪੈਰਾਂ ਨੂੰ ਚੰਗੀ ਤਰ੍ਹਾਂ ਨਾਲ ਸਾਬਣ ਨਾਲ ਧੋ ਲਓ ਅਤੇ ਰਗੜੋ। ਫਿਰ ਇਸ ਨੂੰ ਤੌਲੀਏ ਨਾਲ ਸਾਫ ਕਰ ਕੇ ਅੱਡੀਆਂ 'ਤੇ ਤੇਲ ਲਗਾਓ ਅਤੇ ਜੁਰਾਬਾਂ ਪਹਿਨ ਲਓ। ਇਸ ਪ੍ਰਕਿਰਿਆ ਨੂੰ ਰਾਤ ਨੂੰ ਸੌਣ ਤੋਂ ਪਹਿਲਾਂ ਕਰੋ। ਸਵੇਰੇ ਤੁਹਾਡੀਆਂ ਅੱਡੀਆਂ ਕਾਫੀ ਨਰਮ ਹੋ ਜਾਣਗੀਆਂ। ਇਸ ਤੋਂ ਇਲਾਵਾ ਨਾਰੀਅਲ ਦਾ ਤੇਲ ਵੀ ਇਸਤੇਮਾਲ ਕਰ ਸਕਦੇ ਹੋ।
ਚੌਲਾਂ ਦਾ ਆਟਾ- ਇਸ ਲਈ ਦੋ ਚਮਚ ਚੌਲਾਂ ਦੇ ਆਟੇ ਵਿੱਚ ਇੱਕ ਚਮਚ ਸ਼ਹਿਦ ਅਤੇ ਦੋ ਚਮਚ ਜੈਤੁਨ ਦਾ ਤੇਲ ਮਿਲਾ ਕੇ ਪੇਸਟ ਬਣਾ ਲਓ। ਫਿਰ ਇਸ ਨੂੰ ਅੱਡੀਆਂ 'ਤੇ ਲਾ ਕੇ ਰਗੜ ਲਓ। ਸੁੱਕਣ ਤੋਂ ਬਾਅਦ ਪੈਰਾਂ ਨੂੰ ਧੋ ਲਓ। ਹਫਤੇ ਵਿੱਚ ਦੋ-ਤਿੰਨ ਵਾਰ ਇਸ ਲੇਪ ਦੀ ਵਰਤੋਂ ਕਰਨ ਨਾਲ ਅੱਡੀਆਂ ਕੋਮਲ ਹੋ ਜਾਣਗੀਆਂ ਅਤੇ ਸੁੱਕਾਪਣ ਵੀ ਦੂਰ ਹੋਵੇਗਾ।
ਨਿੰਮ- ਅੱਡੀਆਂ ਫਟਣ ਦੇ ਨਾਲ ਉਨ੍ਹਾਂ 'ਤੇ ਖਾਰਿਸ਼ ਹੋਣ ਲੱਗਦੀ ਹੈ। ਅਜਿਹੇ ਵਿੱਚ ਇੱਕ ਕੌਲੀ ਵਿੱਚ ਨਿੰਮ ਦੀਆਂ ਪੱਤੀਆਂ ਨੂੰ ਪੀਹ ਕੇ ਉਸ ਵਿੱਚ ਤਿੰਨ ਚਮਚ ਹਲਦੀ ਮਿਲਾ ਕੇ ਅੱਡੀਆਂ 'ਤੇ ਲਾ ਲਓ। ਦੋ ਘੰਟੇ ਲਗਾਉਣ ਦੇ ਬਾਅਦ ਪੈਰਾਂ ਨੂੰ ਧੋ ਲਓ ਅਤੇ ਚੰਗੀ ਤਰ੍ਹਾਂ ਨਾਲ ਸਾਫ ਕਰ ਲਓ।
ਨਿੰਬੂ-ਇਸ ਲਈ ਅੱਧੀ ਬਾਲਟੀ ਗਰਮ ਪਾਣੀ ਵਿੱਚ ਦੋ ਚਮਚ ਨਿੰਬੂ ਨਿਚੋੜ ਲਓ ਅਤੇ ਇਸ ਵਿੱਚ ਪੈਰਾਂ ਨੂੰ 15 ਮਿੰਟ ਲਈ ਭਿਉਂ ਕੇ ਰੱਖੋ। ਇਸ ਦੌਰਾਨ ਪਿਊਮਿਕ ਸਟੋਨ ਨਾਲ ਅੱਡੀਆਂ ਨੂੰ ਰਗੜੇ ਤਾਂ ਕਿ ਡੈਡ ਸਕਿਨ ਨਿਕਲ ਜਾਵੇ। ਫਿਰ ਪੈਰਾਂ ਨੂੰ ਬਾਹਰ ਕੱਢ ਕੇ ਸਾਫ ਪਾਣੀ ਨਾਲ ਧੋ ਲਓ ਅਤੇ ਤੌਲੀਏ ਨਾਲ ਸਾਫ ਕਰ ਲਓ। ਇਸ ਨਾਲ ਅੱਡੀਆਂ ਨਰਮ ਹੋ ਜਾਂਦੀਆਂ ਹਨ।