ਮਾਂਟਰੀਅਲ, 19 ਨਵੰਬਰ (ਪੋਸਟ ਬਿਊਰੋ) : ਕਿਸੇ ਸਮਝੌਤੇ ਉੱਤੇ ਪਹੁੰਚਣ ਲਈ ਅੱਧੀ ਰਾਤ ਤੱਕ ਦੀ ਮਿਥੀ ਹੋਈ ਸਮਾਂ ਸੀਮਾਂ ਦੇ ਬਾਵਜੂਦ ਡੀਲ ਸਿਰੇ ਨਾ ਚੜ੍ਹਨ ਕਾਰਨ 3200 ਕੈਨੇਡੀਅਨ ਨੈਸ਼ਨਲ ਰੇਲਵੇ ਕੰਡਕਟਰਜ਼, ਟਰੇਨਪਰਸਨਜ਼ ਤੇ ਯਾਰਡ ਵਰਕਰਜ਼ ਹੜਤਾਲ ਉੱਤੇ ਚਲੇ ਗਏ ਹਨ।
ਰੇਲਵ ਨਾਲ ਸਬੰਧਤ ਕਰਮਚਾਰੀਆਂ ਦੀ ਨੁਮਾਇੰਦਗੀ ਕਰਨ ਵਾਲੀ ਯੂਨੀਅਨ ਦ ਟੀਮਸਟਰਜ਼ ਕੈਨੇਡਾ ਰੇਲ ਕਾਨਫਰੰਸ ਨੇ ਵੀਕੈਂਡ ਉੱਤੇ 72 ਘੰਟਿਆਂ ਦਾ ਨੋਟਿਸ ਦਿੱਤਾ ਸੀ। ਯੂਨੀਅਨ ਦੇ ਬੁਲਾਰੇ ਕ੍ਰਿਸਟੋਫਰ ਮੌਨੈੱਟ ਦਾ ਕਹਿਣਾ ਹੈ ਕਿ ਕਿਸੇ ਸਮਝੌਤੇ ਉੱਤੇ ਅੱਪੜਨ ਦੀ ਆਸ ਵਿੱਚ ਉਹ ਅਜੇ ਵੀ ਸੀਐਨ ਨਾਲ ਗੱਲਬਾਤ ਕਰ ਰਹੇ ਹਨ ਅਤੇ ਇਸ ਲੇਬਰ ਵਿਵਾਦ ਨੂੰ ਜਲਦ ਤੋਂ ਜਲਦ ਖਤਮ ਕਰਨਾ ਚਾਹੁੰਦੇ ਹਨ।
ਯੂਨੀਅਨ ਨੇ ਆਖਿਆ ਕਿ ਦੇਸ਼ ਦੇ ਤਿੰਨ ਵੱਡੇ ਸ਼ਹਿਰਾਂ ਵਿੱਚ ਪੈਸੰਜਰ ਰੇਲ ਸੇਵਾ ਇਸ ਹੜਤਾਲ ਨਾਲ ਪ੍ਰਭਾਵਿਤ ਨਹੀਂ ਹੋਵੇਗੀ। ਇਹ ਆਖਿਆ ਗਿਆ ਕਿ ਟੋਰਾਂਟੋ ਵਿੱਚ ਗੋ ਟਰਾਂਜਿ਼ਟ, ਮਾਂਟਰੀਅਲ ਵਿੱਚ ਐਗਜੋ਼ ਤੇ ਵੈਨਕੂਵਰ ਵਿੱਚ ਵੈਸਟ ਕੋਸਟ ਐਕਸਪ੍ਰੈੱਸ ਦੀਆਂ ਸੇਵਾਵਾਂ ਉੱਤੇ ਕੋਈ ਅਸਰ ਨਹੀਂ ਪਵੇਗਾ। ਵਰਕਰਜ਼, ਜਿਹੜੇ 23 ਜੁਲਾਈ ਤੋਂ ਬਿਨਾਂ ਕਿਸੇ ਕਾਂਟਰੈਕਟ ਦੇ ਹਨ, ਦਾ ਕਹਿਣਾ ਹੈ ਕਿ ਉਹ ਕੰਮ ਦੇ ਲੰਮੇਂ ਘੰਟਿਆਂ, ਥਕਾਵਟ ਤੇ ਕੰਮ ਦੇ ਖਤਰਨਾਕ ਹਾਲਾਤ ਨੂੰ ਲੈ ਕੇ ਚਿੰੰਤਤ ਹਨ।
ਇਹ ਵਿਵਾਦ ਸ਼ੁੱਕਰਵਾਰ ਨੂੰ ਉਦੋਂ ਹੋਰ ਵੱਧ ਗਿਆ ਜਦੋਂ ਸੀਐਨ ਨੇ ਇਸ ਗੱਲ ਦੀ ਪੁਸ਼ਟੀ ਕੀਤੀ ਕਿ ਨੌਰਥ ਅਮੈਰਿਕਾ ਦੇ ਕਮਜ਼ੋਰ ਅਰਥਚਾਰੇ ਕਾਰਨ ਅਤੇ ਮੰਗ ਘਟਣ ਕਾਰਨ ਰੇਲਵੇਅ ਦੇਸ਼ ਭਰ ਵਿੱਚ ਕਰਮਚਾਰੀਆਂ ਦੀ ਛੁੱਟੀ ਕਰੇਗੀ।