ਪਾਣੀਪਤ, 18 ਨਵੰਬਰ (ਪੋਸਟ ਬਿਊਰੋ)- ਜੀ ਐੱਸ ਟੀ ਰਿਫੰਡ ਅਤੇ ਵੈਟ ਨਾਲ ਸੰਬੰਧਤ ਸੀ-ਫਾਰਮ ਘੋਟਾਲੇ ਵਿੱਚ ਪਹਿਲੀ ਵਾਰ ਸੇਲ ਟੈਕਸ ਅਫਸਰਾਂ ਉੱਤੇ ਕੇਸ ਦਰਜ ਹੋਣ ਜਾ ਰਿਹਾ ਹੈ।
ਅਸਲ ਵਿੱਚ ਸੀ-ਫਾਰਮ ਘੋਟਾਲੇ ਵਿੱਚ ਸਰਕਾਰ ਨੇ ਪਾਣੀਪਤ ਸੇਲ ਟੈਕਸ ਵਿਭਾਗ ਵਿੱਚ ਈ ਟੀ ਓ (ਐਕਸਾਈਜ਼ ਐਂਡ ਟੈਕਸੇਸ਼ਨ ਆਫੀਸਰ) ਰਹਿ ਚੁੱਕੇ ਦਿਵਿਕ ਸ਼ਰਮਾ ਅਤੇ ਇੰਸਪੈਕਟਰ ਇੰਦਰਾਵਤੀ ਦੇ ਨਾਲ ਐਡਵੋਕੇਟ ਗੋਵਿੰਦ ਸ਼ਰਮਾ ਉੱਤੇ ਕੇਸ ਦਰਜ ਕਰਨ ਦੀ ਮਨਜ਼ੂਰੀ ਦਿੱਤੀ ਹੈ। ਸੇਲ ਟੈਕਸ ਵਿਭਾਗ ਦੀ ਜਾਂਚ ਵਿੱਚ ਦੋਸ਼ੀ ਪਾਏ ਜਾਣ ਦੇ ਬਾਅਦ ਇਨ੍ਹਾਂ 'ਤੇ ਕੇਸ ਦਰਜ ਕਰਨ ਦੇ ਲਈ ਮੁੱਖ ਮੰਤਰੀ ਤੋਂ ਮਨਜ਼ੂਰੀ ਮੰਗੀ ਸੀ। ਐਕਸਾਈਜ਼ ਅਤੇ ਅਤੇ ਟੈਕਸ ਕਮਿਸ਼ਨਰ ਤੇ ਵਿਭਾਗ ਦੇ ਵਿਸ਼ੇਸ਼ ਸੈਕਟਰੀ ਡਾਕਟਰ ਅਮਿਤ ਅਗਰਵਾਲ ਨੇ ਇਸ ਦੀ ਪੁਸ਼ਟੀ ਕੀਤੀ ਹੈ। ਡਾਕਟਰ ਅਗਰਵਾਲ ਨੇ ਕਿਹਾ ਕਿ ਪਾਣੀਪਤ ਐਕਸਾਈਜ਼ ਅਤੇ ਟੈਕਸ ਵਿਭਾਗ ਨੂੰ ਇਸ ਬਾਰੇ ਮੇਲ ਵੀ ਭੇਜ ਦਿੱਤੀ ਗਈ ਹੈ। ਪਾਣੀਪਤ ਨਾਲ ਜੁੜੇ ਇੱਕ ਅਧਿਕਾਰੀ ਨੇ ਮੇਲ ਮਿਲਣ ਦੀ ਪੁਸ਼ਟੀ ਕੀਤੀ। ਦੋਵੇਂ ਅਫਸਰ ਈ ਟੀ ਓ ਦਿਵਿਕ ਸ਼ਰਮਾ ਅਤੇ ਇੰਸਪੈਕਟਰ ਇੰਦਰਾਵਤੀ ਇਸ ਮਾਮਲੇ ਵਿੱਚ ਪਹਿਲਾਂ ਹੀ ਸਸਪੈਂਡ ਕੀਤੇ ਜਾ ਚੁੱਕੇ ਹਨ।