ਫਿਰੋਜ਼ਪੁਰ, 18 ਨਵੰਬਰ (ਪੋਸਟ ਬਿਊਰੋ)- ਜ਼ਿਲ੍ਹਾ ਫਿਰੋਜ਼ਪੁਰ ਪੁਲਸ ਦੇ ਥਾਣਾ ਕੁੱਲਗੜ੍ਹੀ ਪੁਲਸ ਵੱਲੋਂ ਚੋਰੀ ਦਾ ਸ਼ਿਕਾਰ ਹੋਏ ਬਿਜਲੀ ਵਿਭਾਗ ਦੇ ਮੁਲਾਜ਼ਮ ਨੂੰ ਇਨਸਾਫ ਦੁਆਉਣ ਦੀ ਥਾਂ ਥਾਣੇ ਲਿਜਾ ਕੇ ਅਣਮਨੁੱਖੀ ਤਸੱਦਦ ਕਰਨ ਦੇ ਮਾਮਲੇ 'ਚ ਹਾਈ ਕੋਰਟ ਨੇ ਸਖਤੀ ਵਿਖਾਉਂਦੇ ਹੋਏ ਸੈਕਟਰੀ ਪੰਜਾਬ ਸਰਕਾਰ, ਡੀ ਜੀ ਪੀ ਪੰਜਾਬ, ਐਸ ਐਸ ਪੀ ਫਿਰੋਜ਼ਪੁਰ, ਡੀ ਐਸ ਪੀ ਸਬ-ਡਵੀਜ਼ਨ ਦਿਹਾਤੀ ਫਿਰੋਜ਼ਪੁਰ ਅਤੇ ਐਸ ਐਚ ਓ ਥਾਣਾ ਕੁੱਲਗੜ੍ਹੀ ਨੂੰ ਨੋਟਿਸ ਭੇਜ ਕੇ 31 ਜਨਵਰੀ 2020 ਨੂੰ ਪੇਸ਼ ਹੋਣ ਦਾ ਹੁਕਮ ਦਿੱਤਾ ਹੈ।
ਪਟੀਸ਼ਨ ਕਰਤਾ ਗੁਰਬਿੰਦਰ ਸਿੰਘ ਪੁੱਤਰ ਨਿਰਮਲ ਸਿੰਘ ਪਿੰਡ ਮੱਲਵਾਲ ਕਦੀਮ ਫਿਰੋਜ਼ਪੁਰ ਨੇ ਦੱਸਿਆ ਕਿ ਉਹ ਬਿਜਲੀ ਮਹਿਕਮੇ 'ਚ ਸਹਾਇਕ ਲਾਈਨਮੈਨ ਹੈ ਅਤੇ 9 ਅਗਸਤ ਸਵੇਰੇ ਸਾਢੇ 9 ਵਜੇ ਕੰਮ 'ਤੇ ਗਿਆ ਅਤੇ ਉਸ ਦੇ ਮਾਪੇ ਜ਼ਿਲ੍ਹੇ ਮੋਗਾ 'ਚ ਦਵਾਈ ਲੈਣ ਗਏ ਸਨ ਅਤੇ ਪਤਨੀ ਤੇ ਬੱਚੇ ਸਕੂਲ ਚਲੇ ਗਏ। ਮਾਪਿਆਂ ਨੇ ਦੁਪਹਿਰ ਘਰ ਆ ਕੇ ਵੱਖਿਆ ਤਾਂ ਅਣਪਛਾਤੇ ਚੋਰਾਂ ਨੇ ਚੋਰੀ ਕੀਤੀ ਹੋਈ ਸੀ। ਉਸ ਦੇ ਪਿਤਾ ਨੇ ਮੁਹਾਲੀ ਰਹਿੰਦੇ ਉਸ ਦੇ ਛੋਟੇ ਭਰਾ ਪਰਮਿੰਦਰ ਸਿੰਘ ਨੂੰ ਫੋਨ ਕਰਕੇ ਸਾਰੀ ਘਟਨਾ ਦੀ ਜਾਣਕਾਰੀ ਦਿੱਤੀ, ਜਿਸ 'ਤੇ ਪਰਮਿੰਦਰ ਸਿੰਘ ਨੇ ਚੋਰੀ ਬਾਰੇ ਥਾਣਾ ਕੁੱਲਗੜ੍ਹੀ ਦੇ ਮੁਨਸ਼ੀ ਗੁਰਮੀਤ ਸਿੰਘ ਨੂੰ ਫੋਨ ਕਰਕੇ ਸਾਰੀ ਘਟਨਾ ਤੋਂ ਜਾਣੂ ਕਰਾਇਆ। ਪੁਲਸ ਨੂੰ ਢੁਕਵੀਂ ਕਾਰਵਾਈ ਨਾ ਕਰਦੇ ਵੇਖ ਉਸ ਦੇ ਛੋਟੇ ਭਰਾ ਪਰਮਿੰਦਰ ਸਿੰਘ ਨੇ ਇੱਕ ਫੋਨ ਡੀ ਐਸ ਪੀ ਸਤਨਾਮ ਸਿੰਘ ਅਤੇ ਮੁਨਸ਼ੀ ਗੁਰਮੀਤ ਸਿੰਘ ਨੂੰ ਕਰਕੇ ਮੌਕੇ 'ਤੇ ਪੁਲਸ ਨੂੰ ਭੇਜਣ ਨੂੰ ਕਿਹਾ। ਦੁਪਹਿਰ ਸਮੇਂ ਉਸ ਦੇ ਘਰ ਆਏ ਇੰਸਪੈਕਟਰ ਜਸਵਿੰਦਰ ਸਿੰਘ, ਅਸਿਸਟੈਂਟ ਸਬ ਇੰਸਪੈਕਟਰ ਜਗੀਰ ਸਿੰਘ, ਹਵਾਲਦਾਰ ਬਲਦੇਵ ਸਿੰਘ ਅਤੇ ਹੋਰ ਹੋਮਗਾਰਡ ਦੇ ਜਵਾਨ ਪਟੀਸ਼ਨ ਕਰਤਾ ਨੂੰ ਥਾਣਾ ਕੁੱਲਗੜ੍ਹੀ ਵਿੱਚ ਤਿੰਨ ਵਜੇ ਸ਼ਾਮ ਨੂੰ ਲੈ ਗਏ ਤੇ ਰਾਤ ਸਾਢੇ ਅੱਠ-ਨੌ ਵਜੇ ਤੱਕ ਉਸ ਨਾਲ ਦੋਸ਼ੀਆਂ ਵਾਂਗ ਵਰਤਾਓ ਕਰਦੇ ਹੋਏ ਉਸ ਨਾਲ ਤੀਜੇ ਦਰਜੇ ਦੀ ਮਾਰਕੁੱਟ ਕੀਤੀ। ਮੁਹਾਲੀ ਤੋਂ ਆਏ ਉਸ ਦੇ ਛੋਟੇ ਭਰਾ ਪਰਮਿੰਦਰ ਸਿੰਘ ਅਤੇ ਹੋਰਾਂ ਨੇ ਉਸ ਨੂੰ ਇਲਾਜ ਲਈ ਫਿਰੋਜ਼ਪੁਰ ਦੇ ਸਿਵਲ ਹਸਪਤਾਲ ਦਾਖਲ ਕਰਾਇਆ, ਜਿੱਥੇ ਉਸ ਦਾ ਇਲਾਜ 9 ਅਗਸਤ ਤੋਂ 14 ਤੱਕ ਚੱਲਦਾ ਰਿਹਾ। ਥਾਣਾ ਕੁੱਲਗੜ੍ਹੀ ਪੁਲਸ ਨੇ ਚੋਰੀ ਬਾਰੇ 11 ਅਗਸਤ ਨੂੰ ਅਣਪਛਾਤੇ ਚੋਰਾਂ ਵਿਰੁੱਧ ਮਾਮਲਾ ਵੀ ਦਰਜ ਕੀਤਾ ਸੀ। ਗੁਰਵਿੰਦਰ ਸਿੰਘ ਨੇ ਆਪਣੇ ਨਾਲ ਅਣਮਨੁੱਖੀ ਤਸ਼ੱਦਦ ਦਾ ਇਨਸਾਫ ਲੈਣ ਲਈ ਮੁੁੱਖ ਮੰਤਰੀ, ਏ ਡੀ ਜੀ ਪੀ ਕ੍ਰਾਈਮ, ਆਈ ਜੀ ਅਤੇ ਹੋਰ ਪੁਲਸ ਅਧਿਕਾਰੀਆਂ ਨੂੰ ਪੱੱਤਰ ਭੇਜੇ। ਦੋਸ਼ੀ ਪੁਲਸ ਅਧਿਕਾਰੀਆਂ ਵਿਰੁੱਧ ਕਾਰਵਾਈ ਲਈ ਹਾਈ ਕੋਰਟ 'ਚ ਦਾਇਰ ਪਟੀਸ਼ਨ ਉੱਤੇ ਸਿੰਗਲ ਬੈਂਚ ਦੇ ਜਸਟਿਸ ਤੇਜਿੰਦਰ ਸਿੰਘ ਢੀਂਡਸਾ ਦੀ ਅਦਾਲਤ ਨੇ ਦੂਸਰੀ ਧਿਰ ਨੂੰ ਆਪਣਾ ਪੱਖ ਰੱਖਣ ਦਾ ਆਦੇਸ਼ ਦਿੱਤਾ ਹੈ।