ਜਿੱਥੇ ਕਈ ਹੀਰੋਇਨਾਂ ਸੋਸ਼ਲ ਮੀਡੀਆ 'ਤੇ ਟਰੋਲ ਹੋਣ ਦੇ ਕੇਸ ਬਾਰੇ ਚੁੱਪ ਰਹਿਣਾ ਠੀਕ ਸਮਝਦੀਆਂ ਹਨ, ਉਥੇ ਤਾਪਸੀ ਚੰਗੀ ਤਰ੍ਹਾਂ ਜਾਣਦੀ ਹੈ ਕਿ ਟਰੋਲਰਜ਼ ਨੂੰ ਕਿਸ ਤਰ੍ਹਾਂ ਸਬਕ ਸਿਖਾਉਣਾ ਹੈ। ਪਿੱਛੇ ਜਿਹੇ ਫਿਲਮ ‘ਸਾਂਢ ਕੀ ਆਂਖ’ ਵਿੱਚ ਨਜ਼ਰ ਆਈ ਤਾਪਸੀ ਆਪਣੀ ਹਾਜ਼ਰ ਜਵਾਬੀ ਕਰ ਕੇ ਵੀ ਪ੍ਰਸਿੱਧ ਹੋਈ ਹੈ। ਸਾਹਮਣੇ ਭਾਵੇਂ ਕੋਈ ਕਿਉਂ ਨਾ ਹੋਵੇ, ਉਹ ਆਪਣੀ ਗੱਲ ਪੂਰੀ ਬੇਬਾਕੀ ਨਾਲ ਰੱਖਣਾ ਜਾਣਦੀ ਹੈ। ਪਿਛਲੇ ਦਿਨੀਂ ਟਵਿੱਟਰ ਉੱਤੇ ਇੱਕ ਯੂਜ਼ਰ ਨੇ ਤਾਪਸੀ ਨੂੰ ਬਾਲੀਵੁੱਡ ਦੇ ਇਤਿਹਾਸ 'ਚ ਸਭ ਤੋਂ ‘ਪ੍ਰਾਬਲਮੈਟਿਕ’ ਹੀਰੋਇਨ ਕਿਹਾ। ਉਸ ਦਾ ਭਾਵ ਸੀ ਕਿ ਤਾਪਸੀ ਨੂੰ ਹਮੇਸ਼ਾ ਕਿਸੇ ਨਾ ਕਿਸੇ ਚੀਜ਼ ਤੋਂ ਸਮੱਸਿਆ ਰਹਿੰਦੀ ਹੈ। ਇਸ ਉਤੇ ਤਾਪਸੀ ਨੇ ਉਸ ਨੂੰ ਲੰਮੇ ਹੱਥੀਂ ਲੈਂਦੇ ਹੋਏ ਲਿਖਿਆ, ‘‘ਮੈਂ ਜਾਣਦੀ ਹਾਂ, ਮੇਰੇ ਮਾਤਾ ਪਿਤਾ ਵੀ ਮੈਨੂੰ ਮੁਸੀਬਤ ਸਮਝਦੇ ਹਨ। ਸਟੀਰੀਓ ਟਾਈਪਸ ਲਈ ਬਹੁਤ ਵੱਡੀ ਮੁਸੀਬਤ ਅਤੇ ਤੁਹਾਨੂੰ ਦੱਸਦੇ ਹੋਏ ਅਫਸੋਸ ਹੋ ਰਿਹਾ ਹੈ ਕਿ ਮੈਂ ਅੱਗੇ ਵੀ ਅਜਿਹੀ ਰਹਾਂਗੀ, ਇਸ ਲਈ ਉਮੀਦ ਕਰਦੀ ਹਾਂ ਕਿ ਤੁਸੀਂ ਆਪਣੀ ਸਹਿਣ ਦੀ ਸਮਰੱਥਾ ਨੂੰ ਵਧਾ ਲਓ।”
ਤਾਪਸੀ ਦੀ ਪਿਛਲੇ ਦਿਨੀਂ ਆਈ ਫਿਲਮ ‘ਸਾਂਢ ਕੀ ਆਂਖ' ਨੂੰ ਕਾਫੀ ਪਸੰਦ ਕੀਤਾ ਗਿਆ, ਜਿਸ ਵਿੱਚ ਤਾਪਸੀ ਤੋਂ ਇਲਾਵਾ ਭੂਮੀ ਪੇਡਨੇਕਰ ਵੀ ਸੀ। ਫਿਲਮ ਵਿੱਚ ਤਾਪਸੀ ਅਤੇ ਭੂਮੀ 60 ਸਾਲ ਦੀਆਂ ਸ਼ਾਰਪ-ਸ਼ੂਟਰ ਔਰਤਾਂ ਦੇ ਰੋਲ ਵਿੱਚ ਸਨ। ਇਸ ਦੇ ਲਈ ਉਨ੍ਹਾਂ ਨੇ ਮੇਕਅਪ ਦਾ ਸਹਾਰਾ ਲਿਆ, ਪਰ ਫਿਲਮ ਵਿੱਚ ਉਨ੍ਹਾਂ ਦੇ ਕਿਰਦਾਰਾਂ ਨੂੰ ਲੈ ਕੇ ਕੰਗਨਾ ਰਣੌਤ ਦੀ ਭੈਣ ਰੰਗੋਲੀ ਨੇ ਤਾਪਸੀ ਨੂੰ ਨਿਸ਼ਾਨਾ ਬਣਾਇਆ ਸੀ ਅਤੇ ਕਿਹਾ ਸੀ ਕਿ ਉਸ ਨੂੰ ਐਕਟਿੰਗ ਦੀ ‘ਏ' ਵੀ ਨਹੀਂ ਆਉਂਦੀ। ਇਸ 'ਤੇ ਤਾਪਸੀ ਨੇ ਜਵਾਬ ਦਿੰਦੇ ਹੋਏ ਕਿਹਾ ਕਿ ਹਾਂ ਨਹੀਂ ਆਉਂਦੀ, ਫਿਰ ਵੀ ਫਿਲਮਾਂ ਮਿਲ ਰਹੀਆਂ ਹਨ। ਡਾਇਰੈਕਟਰਾਂ ਨੂੰ ਪੁੱਛਣਾ ਚਾਹੀਦਾ ਹੈ ਕਿ ਉਹ ਮੇਰੇ ਕੋਲ ਕਿਉਂ ਆ ਰਹੇ ਹਨ। ਮੈਨੂੰ ਮੁਆਫ ਕਰਨਾ, ਪਰ ਚਾਰ ਫਿਲਮਾਂ ਮੈਂ ਸਾਈਨਾਂ ਕੀਤੀਆਂ ਹਨ, ਤੁਹਾਨੂੰ ਇਹ ਸਭ ਬਰਦਾਸ਼ਤ ਕਰਨਾ ਹੋਵੇਗਾ।