ਨਵੀਂ ਦਿੱਲੀ, 17 ਨਵੰਬਰ (ਪੋਸਟ ਬਿਊਰੋ)- ਸ਼ਿਵ ਸੈਨਾ ਨਾਲੋਂ ਨਾਤਾ ਟੁੱਟਣ ਪਿੱਛੋਂ ਭਾਜਪਾ ਦੀ ਕੋਸ਼ਿਸ਼ ਬ੍ਰਹਿਨ ਮੁੰਬਈ ਨਗਰ ਨਿਗਮ (ਬੀ ਐੱਮ ਸੀ) ਉੱਤੇ ਪਿਛਲੇ 25 ਸਾਲ ਦਾ ਸਿ਼ਵ ਸੈਨਾ ਦਾ ਕਬਜ਼ਾ ਤੋੜਨ ਦੀ ਹੈ। ਇਸ ਦਾ ਇੱਕ ਪ੍ਰਮੱਖ ਕਾਰਨ ਬਜਟ ਹੈ, ਜੋ ਲਗਭਗ 30,000 ਕਰੋੜ ਰੁਪਏ ਦਾ ਹੈ ਅਤੇ ਕਈ ਰਾਜਾਂ ਦੇ ਬਜਟ ਤੋਂ ਵੱਧ ਹੈ।
ਪਿਛਲੇ ਦਿਨੀਂ ਇਸ ਨਗਰ ਨਿਗਮ ਵਿੱਚ ਹੋਏ ਘੋਟਾਲੇ ਵਿੱਚ ਸ਼ਿਵ ਸੈਨਾ ਮੁਖੀ ਊਧਵ ਠਾਕਰੇ ਉੱਤੇ ਵੀ ਜਾਂਚ ਦਾ ਸੇਕ ਆ ਸਕਦਾ ਹੈ। ਇਸ ਲਈ ਕੇਂਦਰੀ ਜਾਂਚ ਏਜੰਸੀਆਂ ਨੇ ਕਾਰਵਾਈ ਸ਼ੁਰੂ ਕਰ ਦਿੱਤੀ ਹੈ। ਇਸ ਨਗਰ ਨਿਗਮ ਵਿੱਚ ਇਸ ਵਕਤ ਸ਼ਿਵ ਸੈਨਾ ਦੇ ਵਿਸ਼ਵਨਾਥ ਮਹਾਦੇਸ਼ਵਰ ਮੇਅਰ ਹਨ। ਉਨ੍ਹਾਂ ਦਾ ਢਾਈ ਸਾਲ ਦਾ ਕਾਰਜਕਾਲ ਸਤੰਬਰ 2019 ਵਿੱਚ ਖਤਮ ਹੋ ਗਿਆ ਸੀ, ਪਰ ਅਕਤੂਬਰ ਵਿੱਚ ਵਿਧਾਨ ਸਭਾ ਚੋਣਾਂ ਦੇ ਕਾਰਨ ਕਾਰਜਕਾਲ ਨਵੰਬਰ ਤੱਕ ਵਧਾ ਦਿੱਤਾ ਗਿਆ ਸੀ। ਭਾਜਪਾ ਦੇ ਚਰਚਿਤ ਨੇਤਾ ਕਿਰੀਟ ਸੋਮਈਆ ਨੇ ਬੀ ਐੱਮ ਸੀ ਘੋਟਾਲੇ ਵਿੱਚ ਸ਼ਿਵ ਸੈਨਾ ਮੁਖੀ ਊਧਵ ਠਾਕਰੇ 'ਤੇ ਦੋਸ਼ ਲਾਇਆ ਸੀ, ਪਰ ਓਦੋਂ ਸ਼ਿਵ ਸੈਨਾ ਤੋਂ ਸਮਰਥਨ ਲੈਣ ਦੀ ਮਜਬੂਰੀ ਵਿੱਚ ਊਧਵ ਦੀ ਨਾਰਾਜ਼ਗੀ ਤੋਂ ਬਚਣ ਦੇ ਲਈ ਭਾਜਪਾ ਹਾਈ ਕਮਾਨ ਨੇ ਲੋਕ ਸਭਾ ਚੋਣਾਂ ਵਿੱਚ ਕਿਰੀਟ ਦਾ ਟਿਕਟ ਕੱਟ ਦਿੱਤਾ। ਪਿੱਛੋਂ ਸਥਿਤੀ ਬਦਲ ਗਈ ਹੈ, ਇਸ ਲਈ ਕਿਰੀਟ ਸੋਮਾਈਆ ਦੇ ਪੁਰਾਣੇ ਦਸਤਾਵੇਜ਼ਾਂ ਨੂੰ ਕੱਢ ਕੇ ਉਸ ਨੂੰ ਨਵੇਂ ਸਿਰੇ ਤੋਂ ਸਿ਼ਵ ਸੈਨਾ ਦੇ ਮੁਖੀ ਊਧਵ ਠਾਕਰੇ ਦੇ ਖਿਲਾਫ ਹਥਿਆਰ ਬਣਾ ਕੇ ਵਰਤਿਆ ਜਾ ਰਿਹਾ ਹੈ।