ਟੋਰਾਂਟੋ, 14 ਨਵੰਬਰ (ਪੋਸਟ ਬਿਊਰੋ) : ਵੀਰਵਾਰ ਸਵੇਰੇ ਨੌਰਥ ਯੌਰਕ ਵਿੱਚ ਇੱਕ ਕਾਰੋਬਾਰੀ ਅਦਾਰੇ ਵਿੱਚ ਮਾਰੇ ਗਏ ਡਾਕੇ ਦੌਰਾਨ ਦੋ ਵਿਅਕਤੀਆਂ ਨੂੰ ਗੋਲੀ ਲੱਗੀ। ਇਹ ਜਾਣਕਾਰੀ ਟੋਰਾਂਟੋ ਪੁਲਿਸ ਨੇ ਦਿੱਤੀ।
ਐਲਨੈੱਸ ਸਟਰੀਟ ਤੇ ਮੈਗਨੈਟਿਕ ਡਰਾਈਵਰ ਦੇ ਇੰਡਸਟਰੀਅਲ ਏਰੀਆ ਵਿੱਚ ਸਥਿਤ ਇੱਕ ਕੰਪਨੀ ਦੀ ਇਮਾਰਤ ਵਿੱਚ ਸਵੇਰੇ 10:00 ਵਜੇ ਚੱਲੀਆਂ ਗੋਲੀਆਂ ਤੋਂ ਬਾਅਦ ਐਮਰਜੰਸੀ ਅਮਲੇ ਨੂੰ ਸੱਦਿਆ ਗਿਆ। ਟੋਰਾਂਟੋ ਪੁਲਿਸ ਚੀਫ ਮਾਰਕ ਸਾਂਡਰਸ ਨੇ ਪੱਤਰਕਾਰਾਂ ਨਾਲ ਗੱਲਬਾਤ ਕਰਦਿਆਂ ਦੱਸਿਆ ਕਿ ਮੌਕੇ ਉੱਤੇ ਪਹੁੰਚਣ ਉੱਤੇ ਅਸੀਂ ਵੇਖਿਆ ਕਿ ਇੱਕ ਮਹਿਲਾ ਨੂੰ ਗੋਲੀ ਲੱਗੀ ਹੋਈ ਸੀ। ਫਾਇਰਫਾਈਟਰਜ਼ ਉਸ ਨੂੰ ਇਮਾਰਤ ਵਿੱਚੋਂ ਬਾਹਰ ਲੈ ਕੇ ਆ ਰਹੇ ਸਨ ਤੇ ਉਸ ਨੂੰ ਫੌਰਨ ਟਰੌਮਾ ਸੈਂਟਰ ਭੇਜਿਆ ਗਿਆ।
ਅਗਲੇਰੀ ਜਾਂਚ ਤੋਂ ਪਤਾ ਲੱਗਿਆ ਕਿ ਇਸ ਦੌਰਾਨ ਹੀ ਇੱਕ ਹੋਰ ਵਿਅਕਤੀ ਨੂੰ ਗੋਲੀ ਲੱਗੀ ਸੀ ਤੇ ਉਹ ਆਪਣੇ ਆਪ ਹੀ ਯੌਰਕ ਰੀਜਨ ਦੇ ਹਸਪਤਾਲ ਪਹੁੰਚ ਗਿਆ। ਯੌਰਕ ਪੁਲਿਸ ਦੀ ਮਦਦ ਨਾਲ ਹੁਣ ਉਸ ਵਿਅਕਤੀ ਨੁੰ ਵੀ ਟੋਰਾਂਟੋ ਦੇ ਹੀ ਟਰੌਮਾ ਸੈਂਟਰ ਵਿੱਚ ਦਾਖਲ ਕਰਵਾਇਆ ਗਿਆ ਹੈ। ਸਾਂਡਰਸ ਨੇ ਦੱਸਿਆ ਕਿ ਇੱਕ ਹੋਰ ਵਿਅਕਤੀ ਇਸ ਗੋਲੀਕਾਂਡ ਨੂੰ ਦੇਖਣ ਤੋਂ ਬਾਅਦ ਦਹਿਲ ਗਿਆ ਤੇ ਲੱਗਦਾ ਹੈ ਕਿ ਉਸ ਨੂੰ ਐਨਜ਼ਾਇਟੀ ਅਟੈਕ ਹੋ ਗਿਆ।
ਜਾਂਚਕਾਰਾਂ ਅਨੁਸਾਰ ਦੋ ਮਸ਼ਕੂਕ ਇਸ ਇਮਾਰਤ ਵਿੱਚ ਪਹੁੰਚੇ ਤੇ ਉਨ੍ਹਾਂ ਕੁੱਝ ਮੰਗ ਕੀਤੀ ਤੇ ਫਿਰ ਗੋਲੀਆਂ ਚਲਾ ਕੇ ਲੋਕਾਂ ਨੂੰ ਜ਼ਖ਼ਮੀ ਕਰ ਦਿੱਤਾ। ਸਾਂਡਰਸ ਨੇ ਆਖਿਆ ਕਿ ਚਸ਼ਮਦੀਦਾਂ ਵੱਲੋਂ ਦਿੱਤੀ ਗਈ ਜਾਣਕਾਰੀ ਅਨੁਸਾਰ ਜ਼ਾਹਿਰਾ ਤੌਰ ਉੱਤੇ ਨਜ਼ਰ ਆ ਰਿਹਾ ਸੀ ਕਿ ਇਹ ਡਾਕਾ ਹੀ ਸੀ। ਉਨ੍ਹਾਂ ਆਖਿਆ ਕਿ ਇੰਜ ਲੱਗਦਾ ਹੈ ਕਿ ਜਾਣਬੁੱਝ ਕੇ ਇਸ ਕਾਰੋਬਾਰੀ ਅਦਾਰੇ ਨੂੰ ਹੀ ਨਿਸ਼ਾਨਾ ਬਣਾਇਆ ਗਿਆ ਕਿਉਂਕਿ ਮਸ਼ਕੂਕ ਸਿੱਧਾ ਇਸ ਇਮਾਰਤ ਵਿੱਚ ਹੀ ਪਹੁੰਚੇ। ਅਜੇ ਤੱਕ ਮਸ਼ਕੂਕਾਂ ਦੇ ਸਬੰਧ ਵਿੱਚ ਪੁਲਿਸ ਵੱਲੋਂ ਕੋਈ ਵੇਰਵੇ ਜਾਰੀ ਨਹੀਂ ਕੀਤੇ ਗਏ ਹਨ।