ਇਨ੍ਹੀਂ ਦਿਨੀਂ ਫਿਲਮਾਂ ਦੇ ਸੀਕਵਲ ਬਣਨਾ ਆਮ ਗੱਲ ਹੋ ਗਈ ਹੈ। ਕਈ ਫਿਲਮਾਂ ਦੀ ਫਰੈਂਚਾਈਜ਼ੀ ਫਿਲਮਾਂ ਬਣ ਰਹੀਆਂ ਹਨ, ਉਥੇ ਕੁਝ ਕਲਾਕਾਰ ਆਪਣੀਆਂ ਫਿਲਮਾਂ ਦੇ ਸੀਕਵਲ ਜਾਂ ਰੀਮੇਕ ਬਣਦੇ ਵੀ ਦੇਖਣਾ ਚਾਹੁੰਦੇ ਹਨ। ਅਜੈ ਦੇਵਗਨ ਦੀ ਫਿਲਮ ‘ਦੀਵਾਨਗੀ’ ਦਾ ਨਿਰੇਦਸ਼ਨ ਕਰਨ ਵਾਲੇ ਅਨੀਸ ਬਜ਼ਮੀ ਇਸ ਸਾਈਕਾਲੋਜੀਕਲ ਥ੍ਰਿਲਰ ਦੀ ਸੀਕਵਲ ਬਣਾਉਣਾ ਚਾਹੁੰਦੇ ਹਨ। ਲਗਾਤਾਰ ਕਾਮੇਡੀ ਫਿਲਮਾਂ ਬਣਾ ਰਹੇ ਅਨੀਸ ਬਜ਼ਮੀ ਦਾ ਕਹਿਣਾ ਹੈ ਕਿ ਉਹ ਇਸ ਫਿਲਮ ਦਾ ਦੂਸਰਾ ਪਾਰਟ ਬਣਾਉਣ ਦੀ ਯੋਜਨਾ ਬਣਾ ਰਹੇ ਹਨ।
‘ਦੀਵਾਨਗੀ’ ਸਾਲ 2002 ਵਿੱਚ ਰਿਲੀਜ਼ ਹੋਈ ਸੀ, ਜਿਸ ਵਿੱਚ ਅਕਸ਼ੈ ਖੰਨਾ, ਉਰਮਿਲਾ ਮਾਤੋਂਡਕਰ ਅਤੇ ਅਜੇ ਦੇਵਗਨ ਮੁੱਖ ਭੂਮਿਕਾ ਵਿੱਚ ਸਨ। ਇਸ ਫਿਲਮ ਵਿੱਚ ਅਜੈ ਦੇਵਗਨ ਨਕਾਰਾਤਮਕ ਭੂਮਿਕਾ ਵਿੱਚ ਸਨ, ਜਿਸ ਨੂੰ ਕਾਫੀ ਪਸੰਦ ਕੀਤਾ ਗਿਆ ਸੀ। ‘ਦੀਵਾਨਗੀ 2’ ਦੀਆਂ ਤਿਆਰੀਆਂ ਬਾਰੇ ਅਨੀਸ ਬਜ਼ਮੀ ਦਾ ਕਹਿਣਾ ਹੈ ਕਿ ਜੇ ‘ਦੀਵਾਨਗੀ 2’ ਬਣੀ ਤਾਂ ਉਸ ਫਿਲਮ ਵਿੱਚ ਅਜੇ ਦਾ ਹੋਣਾ ਯਕੀਨੀ ਹੈ। ਉਸ ਦੇ ਇਲਾਵਾ ਇਹ ਫਿਲਮ ਕੋਈ ਹੋਰ ਨਹੀਂ ਕਰ ਸਕਦਾ ਹੈ। ਫਿਲਮ ਬਣਾਉਣ ਦੀ ਯੋਜਨਾ ਬਾਰੇ ਅਨੀਸ ਨੇ ਦੱਸਿਆ ਕਿ ਪਿੱਛੇ ਜਿਹੇ ਹੈਦਰਾਬਾਦ ਵਿੱਚ ਅਜੈ ਨਾਲ ਉਨ੍ਹਾਂ ਦੀ ਮੁਲਾਕਾਤ ਹੋਈ ਸੀ। ਅਨੀਸ ਕਹਿੰਦੇ ਹਨ ਕਿ ਅਜੇ ਦੇ ਉਸ ਕਿਰਦਾਰ ਨੂੰ 17 ਸਾਲ ਹੋ ਗਏ ਹਨ। ਉਹ ਕਿਰਦਾਰ ਪਹਿਲਾਂ ਤੋਂ ਵੱਧ ਖਤਰਨਾਕ ਹੋ ਚੁੱਕਾ ਹੋਵੇਗਾ, ਪਹਿਲਾਂ ਤੋਂ ਜ਼ਿਆਦਾ ਬੁੱਧੀਮਾਨ ਅਤੇ ਚਾਲਾਕ ਹੋ ਚੁੱਕਾ ਹੋਵੇਗਾ। ਇਸ ਲਈ ਉਹ ਕਿਰਦਾਰ ਦਿਲਚਸਪ ਬਣੇਗਾ।