ਟੋਰਾਂਟੋ, 6 ਨਵੰਬਰ (ਪੋਸਟ ਬਿਊਰੋ) : ਕਥਿਤ ਤੌਰ ਉੱਤੇ ਚੋਣ ਖਰਚਿਆਂ ਦੀ ਉਲੰਘਣਾਂ ਦੇ ਮਾਮਲੇ ਵਿੱਚ ਟੋਰਾਂਟੋ ਸਿਟੀ ਕਾਉਂਸਲਰ ਜਿੰਮ ਕੈਰਿਆਨਿਸ ਨੂੰ ਅਹੁਦੇ ਤੋਂ ਹਟਾ ਦਿੱਤਾ ਗਿਆ ਹੈ।
ਬੁੱਧਵਾਰ ਨੂੰ ਜਾਰੀ ਕੀਤੀ ਗਈ ਨਿਊਜ਼ ਰਲੀਜ਼ ਵਿੱਚ ਸਿਟੀ ਨੇ ਆਖਿਆ ਕਿ ਵਾਰਡ 22 ਤੋਂ ਕਾਉਂਸਲਰ ਜਿੰਮ ਕੈਰਿਆਨਿਸ ਨੇ 2018 ਦੀਆਂ ਚੋਣਾਂ ਤੋਂ ਬਾਅਦ ਪਾਰਟੀ ਤੇ ਹੋਰਨਾਂ ਚੀਜ਼ਾਂ ਉੱਤੇ 32,083.50 ਡਾਲਰ ਖਰਚ ਕੀਤੇ। ਜਿਸ ਕਾਰਨ ਖਰਚੇ ਦੀ ਹੱਦ 25,962.70 ਡਾਲਰ ਤੱਕ ਵੱਧ ਗਈ। ਨਿਊਜ਼ ਰਲੀਜ਼ ਵਿੱਚ ਆਖਿਆ ਗਿਆ ਕਿ ਮਿਉਂਸਪਲ ਇਲੈਕਸ਼ਨਜ਼ ਐਕਟ ਤਹਿਤ ਹਰੇਕ ਉਮੀਦਵਾਰ ਨੂੰ 2018 ਦੀਆਂ ਚੋਣਾਂ ਲਈ ਵਿੱਤੀ ਸਟੇਟਮੈਂਟ ਦੇਣੀ ਜ਼ਰੂਰੀ ਹੈ। ਇਸ ਐਕਟ ਤਹਿਤ ਉਮੀਦਵਾਰਾਂ ਨੂੰ ਚੋਣਾਂ ਵਿੱਚ ਘੱਟ ਤੋਂ ਘੱਟ ਖਰਚਾ ਕਰਨ ਦੀ ਇਜਾਜ਼ਤ ਹੈ। 2018 ਵਿੱਚ ਵਾਰਡ 22 ਲਈ ਪਾਰਟੀਆਂ ਵੱਲੋਂ ਖਰਚ ਕੀਤੇ ਜਾਣ ਲਈ ਇਹ ਟੋਟਲ 61,207.95 ਡਾਲਰ ਸੀ।
ਬੁੱਧਵਾਰ ਸ਼ਾਮ ਨੂੰ ਬਿਆਨ ਜਾਰੀ ਕਰਕੇ ਕੈਰਿਆਨਿਸ ਨੇ ਆਖਿਆ ਕਿ ਕਿਸੇ ਵੀ ਤਰ੍ਹਾਂ ਦੀ ਗਲਤੀ ਨੂੰ ਠੀਕ ਕਰਨ ਲਈ ਉਹ ਸੌਲੀਸਿਟਰ ਤੇ ਆਡੀਟਰ ਨਾਲ ਕੰਮ ਕਰ ਰਹੇ ਹਨ। ਉਨ੍ਹਾਂ ਆਖਿਆ ਕਿ ਇਹ ਸੱਭ ਕਿਸੇ ਗਲਤੀ ਜਾਂ ਭੁਲੇਖੇ ਕਾਰਨ ਹੋਇਆ ਹੈ ਤੇ ਉਨ੍ਹਾਂ ਨੂੰ ਪਤਾ ਹੈ ਕਿ ਇੱਕ ਵਾਰੀ ਗਲਤੀ ਸਾਹਮਣੇ ਆਉਣ ਤੋਂ ਬਾਅਦ ਕਲਰਕ ਆਪਣਾ ਫੈਸਲਾ ਬਦਲ ਲਵੇਗੀ। ਜਿ਼ਕਰਯੋਗ ਹੈ ਕਿ ਸਾਬਕਾ ਲਿਬਰਲ ਐਮਪੀ ਕੈਰਿਆਨਿਸ 2014 ਤੋਂ ਹੀ ਸਿਟੀ ਕਾਉਂਸਲ ਵਿੱਚ ਕੰਮ ਕਰ ਰਹੇ ਹਨ। ਉਹ ਸਕਾਰਬੌਰੋ-ਐਗਿਨਕੋਰਟ ਤੋਂ ਨੁਮਾਇੰਦਗੀ ਕਰਦੇ ਹਨ ਤੇ 2018 ਵਿੱਚ ਉਨ੍ਹਾਂ ਨੌਰਮ ਕੈਲੀ ਨੂੰ ਹਰਾਇਆ ਸੀ।
ਮੀਡੀਆ ਨਾਲ ਗੱਲ ਕਰਦਿਆਂ ਸਿਟੀ ਆਫ ਟੋਰਾਂਟੋ ਦੇ ਬੁਲਾਰੇ ਬਰੈਡ ਰੌਸ ਨੇ ਆਖਿਆ ਕਿ ਵਾਰਡ 22 ਦੀ ਸੀਟ ਨੂੰ ਖਾਲੀ ਹੀ ਐਲਾਨਿਆ ਗਿਆ ਹੈ ਤੇ ਇਹ ਉਦੋਂ ਤੱਕ ਖਾਲੀ ਰਹੇਗੀ ਜਦੋਂ ਤੱਕ ਅਦਾਲਤ ਫੈਸਲਾ ਨਹੀਂ ਦਿੰਦੀ। ਉਨ੍ਹਾਂ ਆਖਿਆ ਕਿ ਇਸ ਮਾਮਲੇ ਵਿੱਚ ਕੈਰਿਆਨਿਸ ਨੂੰ ਲੀਗਲ ਕਾਉਂਸਲ ਦੀ ਮਦਦ ਲੈਣੀ ਚਾਹੀਦੀ ਹੈ ਤੇ ਹੋਰ ਬਦਲ ਤਲਾਸ਼ਣੇ ਚਾਹੀਦੇ ਹਨ। ਟੋਰਾਂਟੋ ਦੇ ਮੇਅਰ ਜੌਹਨ ਟੋਰੀ ਨੇ ਇਸ ਘਟਨਾ ਨੂੰ ਹੈਰਾਨੀ ਵਾਲੀ ਤੇ ਸਾਕਿੰਗ ਦੱਸਿਆ। ਉਨ੍ਹਾਂ ਆਖਿਆ ਕਿ ਕਾਉਂਸਲਰ ਕੈਰਿਆਨਿਸ ਨੇ ਸਿਟੀ ਹਾਲ ਵਿੱਚ ਰਹਿ ਕੇ ਪਿਛਲੇ ਪੰਜ ਸਾਲਾਂ ਵਿੱਚ ਸਕਾਰਬੌਰੋ ਤੇ ਐਗਿਨਕੋਰਟ ਵਾਸੀਆਂ ਦੀ ਖੂਭ ਸੇਵਾ ਕੀਤੀ ਹੈ। ਉਨ੍ਹਾਂ ਆਖਿਆ ਕਿ ਉਹ ਯਕੀਨੀ ਬਣਾਉਣਗੇ ਕਿ ਸਿਟੀ ਵੱਲੋਂ ਇਨ੍ਹਾਂ ਲੋਕਾਂ ਦੀ ਸੇਵਾ ਵਿੱਚ ਕੋਈ ਕਮੀ ਨਾ ਆਵੇ।