ਬਰੈਂਪਟਨ, 5 ਨਵੰਬਰ (ਪੋਸਟ ਬਿਊਰੋ)- ਬੀਤੇ ਕੱਲ੍ਹ ਬਰੈਂਪਟਨ ਦੇ ਕੈਸਲਮੋਰ ਇਲਾਕੇ ’ਚ ਮੈਕਵੀਨ ਅਤੇ ਡਾਵਿੰਚੀ ਸਟ੍ਰੀਟ ਨਜ਼ਦੀਕ ਇਕ ਸੜਕ ਹਾਦਸੇ ’ਚ 17 ਸਾਲ ਦਾ ਜੈ ਸਿੱਧੂ ਅਕਾਲ ਚਲਾਣਾ ਕਰ ਗਿਆ ਅਤੇ ਗੱਡੀ ਚਲਾ ਰਿਹਾ ਨੌਜਵਾਨ ਗੰਭੀਰ ਰੂਪ ’ਚ ਜ਼ਖਮੀ ਹੈ।ਇਹ ਹਾਦਸਾ ਕੱਲ੍ਹ ਰਾਤ 11 ਵਜੇ ਦੇ ਕਰੀਬ ਵਾਪਰਿਆ ਦੱਸਿਆ ਜਾ ਰਿਹਾ ਹੈ।ਮੈਕਵੀਨ ਡਰਾਇਵ ਉਤੇ ਤੇਜ਼ ਰਫ਼ਤਾਰ ਨਾਲ ਆ ਰਹੀ ਗੱਡੀ ਕੰਟ੍ਰੋਲ ਤੋਂ ਬਾਹਰੀ ਹੋ ਕੇ ਦਰੱਖਤ ਨਾਲ ਜਾ ਟਕਰਾਈ, ਜਿਥੇ ਜੈ ਸਿੱਧੂ ਦੀ ਮੌਕੇ ’ਤੇ ਹੀ ਮੌਤ ਹੋ ਗਈ ਤੇ ਗੱਡੀ ਚਲਾ ਰਹੇ ਨੌਜਵਾਨ ਨੂੰ ਗੰਭੀਰ ਜ਼ਖਮੀ ਰੂਪ ’ਚ ਹਸਪਤਾਲ ਪਹੁੰਚਾਇਆ ਗਿਆ।ਜੈ ਸਿੱਧੂ ਪੰਜਾਬੀ ਭਾਈਚਾਰੇ ’ਚ ਜਾਣੀ ਪਹਿਚਾਣੀ ਸ਼ਖਸੀਅਤ ਸਪ੍ਰੈਂਜਾ ਬੈਂਕੁਇਟ ਹਾਲ ਦੇ ਮਾਲਕ ਬਿੱਲਾ ਸਿੱਧੂ ਦੇ ਬੇਟੇ ਸਨ ਤੇ ਲੰਬੇ ਸਮੇਂ ਤੋਂ ਮੀਡੀਆ ’ਚ ਜਾਣੇ ਪਹਿਚਾਣੇ ਰਣਧੀਰ ਰਾਣਾ ਸਿੱਧੂ ਦਾ ਭਤੀਜਾ ਤੇ ਬਲਜੀਤ ਮੰਡ ਦਾ ਭਾਣਜਾ ਸੀ।ਇਸ ਖ਼ਬਰ ਦਾ ਪਤਾ ਲੱਗਣ ’ਤੇ ਸੰਸਾਰ ਭਰ ’ਚ ਕਬੱਡੀ ਨਾਲ ਜੁੜੀਆਂ ਖੇਡ ਸੰਸਥਾਵਾਂ ਤੇ ਮੀਡੀਆ ਗਰੁੱਪਸ ਵਲੋਂ ਪਰਿਵਾਰ ਨਾਲ ਦੁੱਖ ਦਾ ਇਜ਼ਹਾਰ ਕੀਤਾ ਜਾ ਰਿਹਾ ਹੈ।ਕੈਨੇਡਾ ਅਤੇ ਪੰਜਾਬ ਦੇ ਵੱਖ-ਵੱਖ ਸਿਆਸੀ ਆਗੂਆਂ ਵਲੋਂ ਇਸ ਦੁੱਖ ਦੀ ਘੜੀ ’ਚ ਪਰਿਵਾਰ ਨਾਲ ਖੜ੍ਹ ਕੇ ਉਨ੍ਹਾਂ ਦਾ ਦੁੱਖ ਵੰਡਾਇਆ ਜਾ ਰਿਹਾ ਹੈ।ਸਿੱਧੂ ਪਰਿਵਾਰ ਦਾ ਭਾਈਚਾਰੇ ’ਚ ਚੰਗਾ ਆਧਾਰ ਹੋਣ ਕਾਰਨ ਇਸ ਨੌਜਵਾਨ ਦੀ ਮੌਤ ’ਤੇ ਹਰ ਕਿਸੇ ਦੀਆਂ ਅੱਖਾਂ ਨਮ ਹਨ।ਮੀਡੀਆ ਨਾਲ ਗੱਲ ਕਰਦਿਆਂ ਰਣਧੀਰ ਰਾਣਾ ਨੇ ਦੱਸਿਆ ਕਿ ਉਨ੍ਹਾਂ ਦੀ 10 ਕੁ ਮਿੰਟ ਪਹਿਲਾਂ ਹੀ ਜੈ ਸਿੱਧੂ ਨਾਲ ਗੱਲਬਾਤ ਹੋਈ ਸੀ ਤੇ ਜੈ ਸਿੱਧੂ ਦਾ ਕਹਿਣਾ ਸੀ ਕਿ ਉਹ ਬੜੀ ਜਲਦੀ ਹੀ ਘਰ ਆ ਰਹੇ ਹਨ, ਪਰ ਰੱਬ ਦਾ ਭਾਣਾ ਐਸਾ ਵਰਤਿਆ ਕਿ ਹੁਣ ਉਹ ਕਦੇ ਘਰ ਨਹੀਂ ਆ ਸਕੇਗਾ।ਅਦਾਰਾ ਕੈਨੇਡੀਅਨ ਪੰਜਾਬੀ ਪੋਸਟ ਤੇ ਖ਼ਬਰਸਾਰ ਵਲੋਂ ਪਰਿਵਾਰ ਨਾਲ ਦੁੱਖ ਦਾ ਇਜ਼ਹਾਰ ਕੀਤਾ ਜਾਂਦਾ ਹੈ ਅਤੇ ਜੈ ਸਿੱਧੂ ਦੇ ਅੰਤਮ ਸੰਸਕਾਰ ਦਾ ਵੇਰਵਾ ਕੱਲ੍ਹ ਵਾਲੇ ਅਖ਼ਬਾਰ ’ਚ ਛਾਪਿਆ ਜਾਵੇਗਾ।