ਟੋਰਾਂਟੋ, 17 ਅਕਤੂਬਰ (ਪੋਸਟ ਬਿਊਰੋ) : ਘਾਟੇ ਨੂੰ ਖ਼ਤਮ ਕਰਨ ਤੇ ਫੰਡਿੰਗ ਸਬੰਧੀ ਹੋਰਨਾਂ ਚੁਣੌਤੀਆਂ ਨੂੰ ਧਿਆਨ ਵਿੱਚ ਰੱਖਦਿਆਂ ਹੋਇਆਂ ਓਨਟਾਰੀਓ ਸਰਕਾਰ ਪ੍ਰੋਵਿੰਸ ਭਰ ਵਿੱਚ ਨਿੱਕੇ ਤੇ ਦਰਮਿਆਨੇ ਆਕਾਰ ਵਾਲੇ ਹਸਪਤਾਲਾਂ ਨੂੰ ਵਧੇਰੇ ਫੰਡ ਮੁਹੱਈਆ ਕਰਵਾ ਰਹੀ ਹੈ।
ਸਿਹਤ ਮੰਤਰੀ ਕ੍ਰਿਸਟੀਨ ਐਲੀਅਟ ਦਾ ਕਹਿਣਾ ਹੈ ਕਿ ਇਸ ਸਾਲ 90 ਹਸਪਤਾਲਾਂ ਦੀ ਮਦਦ ਕਰਨ ਲਈ ਪ੍ਰੋਵਿੰਸ 68 ਮਿਲੀਅਨ ਡਾਲਰ ਖਰਚ ਕਰੇਗੀ। ਉਨ੍ਹਾਂ ਆਖਿਆ ਕਿ ਪ੍ਰੋਵਿੰਸ ਦੇ ਮੌਜੂਦਾ ਫੰਡਿੰਗ ਫਾਰਮੂਲੇ ਕਾਰਨ ਨਿੱਕੀਆਂ ਫੈਸਿਲਿਟੀਜ਼ ਨੂੰ ਕਾਫੀ ਨੁਕਸਾਨ ਹੋਇਆ ਹੈ ਤੇ ਇਸ ਮੁੱਦੇ ਨੂੰ ਹੱਲ ਕਰਨ ਦਾ ਲਈ ਸਰਕਾਰ ਵੱਲੋਂ ਚੁੱਕਿਆ ਇਹ ਪਹਿਲਾ ਕਦਮ ਹੈ।
ਇਸ ਫੰਡਿੰਗ ਨਾਲ 66 ਨਿੱਕੇ ਹਸਪਤਾਲਾਂ ਨੂੰ ਫੰਡਿੰਗ ਵਿੱਚ ਇੱਕ ਫੀ ਸਦੀ ਵਾਧਾ ਹੋਵੇਗਾ। ਬਾਕੀ 23 ਦਰਮਿਆਨੇ ਆਕਾਰ ਵਾਲੇ ਹਸਪਤਾਲਾਂ ਨੂੰ 1.5 ਫੀ ਸਦੀ ਵਾਧਾ ਮਿਲੇਗਾ। ਜਿ਼ਕਰਯੋਗ ਹੈ ਕਿ ਆਪਣੇ ਬਜਟ ਵਿੱਚ ਸਰਕਾਰ ਨੇ ਇਹ ਐਲਾਨ ਕੀਤਾ ਸੀ ਕਿ ਉਹ ਇਸ ਸਾਲ ਹਸਪਤਾਲ ਬਜਟ ਲਈ 384 ਮਿਲੀਅਨ ਡਾਲਰ ਵਧੇਰੇ ਖਰਚ ਕਰੇਗੀ।