1970 ਅਤੇ ਅੱਸੀ ਦੇ ਦਹਾਕੇ ਵਿੱਚ ਫਿਲਮਕਾਰ ਰਿਸ਼ੀਕੇਸ਼ ਮੁਖਰਜੀ ਦੀਆਂ ਕਾਮੇਡੀ ਫਿਲਮਾਂ ਬੜੀਆਂ ਹਿੱਟ ਸਨ। ਯਾਮੀ ਗੌਤਮ ਨੂੰ ਲੱਗਦਾ ਹੈ ਕਿ ਫਿਲਮਾਂ ਦੀ ਉਨ੍ਹਾਂ ਦੀ ਸ਼ੈਲੀ ਪਰਤ ਰਹੀ ਹੈ ਕਿਉਂਕਿ ਕੰਟੈਂਟ ਅਤੇ ਹਾਸੇ 'ਤੇ ਜ਼ਿਆਦਾ ਜ਼ੋਰ ਦਿੱਤਾ ਜਾ ਰਿਹਾ ਹੈ। ਛੇਤੀ ਹੀ ਫਿਲਮ ‘ਬਾਲਾ' ਵਿੱਚ ਨਜ਼ਰ ਆਉਣ ਵਾਲੀ ਯਾਮੀ ਅਨੁਸਾਰ ਉਹ ‘ਚੁਪਕੇ ਚੁਪਕੇ’ ਅਤੇ ‘ਗੋਲਮਾਲ’ ਵਰਗੀਆਂ ਰਿਸ਼ੀਕੇਸ਼ ਜੀ ਦੀਆਂ ਫਿਲਮਾਂ ਦੀ ਬਹੁਤ ਵੱਡੀ ਪ੍ਰਸ਼ੰਸਕ ਰਹੀ ਹੈ ਤੇ ਉਸ ਨੂੰ ਇਸ 'ਤੇ ਕਾਫੀ ਹੈਰਾਨੀ ਹੈ ਕਿ ਉਨ੍ਹਾਂ ਦੀ ਸ਼ੈਲੀ 2019 ਵਿੱਚ ਇੱਕ ਨਵੇਂ ਤਰੀਕੇ ਨਾਲ ਸ਼ਾਨਦਾਰ ਵਾਪਸੀ ਕਰ ਰਹੀ ਹੈ।
ਯਾਮੀ ਨੇ ਕਿਹਾ, ‘‘ਕਿਉਂਕਿ ਅੱਜ ਕਹਾਣੀਆਂ ਦਾ ਦਾਇਰਾ ਇੰਨਾ ਵਿਸ਼ਾਲ ਹੋ ਗਿਆ ਹੈ, ਇਨ੍ਹੀਂ ਦਿਨੀਂ ਵੱਖ-ਵੱਖ ਤਰ੍ਹਾਂ ਦੀਆਂ ਫਿਲਮਾਂ ਕੰਮ ਕਰਦੀਆਂ ਦਿੱਸ ਸਕਦੀਆਂ ਹਨ। ਇਹ ਚੰਗੀ ਗੱਲ ਹੈ ਕਿ ਕਿਸੇ ਵੀ ਫਿਲਮ ਦੇ ਪੂਰੀ ਤਰ੍ਹਾਂ ਕੰਮ ਕਰਨ ਦੀ ਗਾਰੰਟੀ ਨਹੀਂ ਹੁੰਦੀ। ਆਮ ਜਨਜੀਵਨ ਨਾਲ ਜੁੜੀਆਂ ਲੋਕਾਂ ਦੀਆਂ ਕਹਾਣੀਆਂ ਵਿੱਚ ਮੈਨੂੰ ਕਾਫੀ ਸੰਭਾਵਨਾਵਾਂ ਨਜ਼ਰ ਆਉਂਦੀਆਂ ਹਨ। ਅਸੀਂ ਕਹਿ ਸਕਦੇ ਹਾਂ ਕਿ ਏਦਾਂ ਦੀਆਂ ਕਹਾਣੀਆਂ ਵਿੱਚ ਇੱਕ ਤਰ੍ਹਾਂ ਦਾ ਜਾਦੂ ਅਤੇ ਆਕਰਸ਼ਣ ਹੁੰਦਾ ਹੈ।” ਪਿਛਲੀ ਵਾਰ ‘ਉੜੀ' ਵਿੱਚ ਨਜ਼ਰ ਆਈ ਯਾਮੀ ਦਾ ਕਹਿਣਾ ਹੈ ਕਿ ਆਮ ਲੋਕਾਂ ਨੂੰ ਹੀਰੋ ਦੇ ਰੂਪ ਵਿੱਚ ਪੇਸ਼ ਕਰਨ ਵਾਲੇ ਕਿਰਦਾਰਾਂ ਨਾਲ ਦਰਸ਼ਕ ਬਿਹਤਰ ਢੰਗ ਨਾਲ ਲਗਾਅ ਮਹਿਸੂਸ ਕਰ ਸਕਦੇ ਹਨ।