ਮੈਲਬੌਰਨ, 17 ਅਕਤੂਬਰ (ਪੋਸਟ ਬਿਊਰੋ)-ਅੰਤਰਰਾਸ਼ਟਰੀ ਭਾਰਤੀ ਵਿਦਿਆਰਥੀ ਨੂੰ ਟਰੱਕ ਹੇਠਾਂ ਦੇ ਕੇ ਮਾਰਨ ਵਾਲੇ ਟਰੱਕ ਡਰਾਈਵਰ ਨੂੰ ਛੇ ਸਾਲ ਦੀ ਜੇਲ੍ਹ ਹੋਈ ਹੈ। ਇਹ ਘਟਨਾ ਅਪ੍ਰੈਲ 2017 'ਚ ਓਦੋਂ ਵਾਪਰੀ ਜਦੋਂ ਵਿਸ਼ਾਲ ਮੰਹਤ ਆਪਣੀ ਕਾਰ ਦੇ ਕੋਲ ਖੜ੍ਹਾ ਸੀ ਅਤੇ ਉਸ ਦੇ ਉਲਟ ਪਾਸੇ ਤੋਂ ਆ ਰਹੇ ਸ਼ਰਾਬੀ ਟਰੱਕ ਡਰਾਈਵਰ ਨੇ ਉਸ ਦੀ ਕਾਰ 'ਤੇ ਟਰੱਕ ਚਾੜ੍ਹ ਦਿੱਤਾ ਅਤੇ ਉਸ ਦੀ ਮੌਤ ਹੋ ਗਈ। 34 ਸਾਲਾਂ ਦੇ ਦੋਸ਼ੀ ਡਰਾਈਵਰ ਨੂੰ, ਜੋ ਕਿ ਉਸ ਸਮੇਂ ਸ਼ਰਾਬੀ ਹਾਲਤ ' ਸੀ, ਪੁਲਸ ਨੇ ਹਿਰਾਸਤ ਵਿੱਚ ਲੈ ਲਿਆ ਸੀ।
ਅਦਾਲਤੀ ਕਾਰਵਾਈ 'ਚ ਦੱਸਿਆ ਗਿਆ ਕਿ ਜਦੋਂ ਟਰੱਕ ਦੀ ਤਲਾਸ਼ੀ ਲਈ ਤਾਂ ਕੁਝ ਬੀਅਰਾਂ ਦੇ ਕੇਨ ਖਾਲੀ ਅਤੇ ਭਰੇ ਮਿਲੇ ਸੀ। ਜੱਜ ਨੇ ਡਰਾਈਵਰ ਨੂੰ ਸਜ਼ਾ ਸੁਣਾਉਣ ਤੋਂ ਪਹਿਲਾਂ ਕਿਹਾ ਕਿ ਤੂੰ ਉਸ ਵਿਅਕਤੀ ਦੀ ਜਾਨ ਲਈ ਹੈ, ਜੋ ਦੂਸਰੇ ਦੇਸ਼ ਤੋਂ ਵਧੀਆ ਭਵਿੱਖ ਦਾ ਸੁਪਨਾ ਲੈ ਕੇ ਆਇਆ ਸੀ ਅਤੇ ਉਸ ਦੇ ਮਾਂ-ਬਾਪ ਨੂੰ ਉਸ 'ਤੇ ਕਈ ਉਮੀਦਾਂ ਸਨ। ਅਦਾਲਤ ਨੇ ਕਿਹਾ ਕਿ ਸ਼ਰਾਬ ਪੀ ਕੇ ਡਰਾਈਵਿੰਗ ਕਰਨਾ ਕਿਧਰ ਦੀ ਸਿਆਣਪ ਸੀ ਤੇ ਇਹ ਕਾਨੂੰਨ ਦੇ ਬਿਲਕੁਲ ਉਲਟ ਸੀ। ਇਸ ਅਦਾਲਤੀ ਕਾਰਵਾਈ ਨੂੰ ਮ੍ਰਿਤਕ ਦੇ ਵਾਰਸ਼ਾਂ ਵੱਲੋਂ ਵੀਡੀਓ ਕਾਨਫਰੰਸ ਰਾਹੀ ਦੇਖਿਆ ਗਿਆ। ਦੋਸ਼ੀ ਤਿੰਨ ਸਾਲ ਤੱਕ ਜੇਲ੍ਹ 'ਚ ਰਹੇਗਾ ਕਿਉਂਕਿ ਉਹ ਹਾਦਸੇ ਸਮੇਂ ਤੋਂ ਕੈਦ 'ਚ ਹੈ।