ਵਾਸ਼ਿੰਗਟਨ, 14 ਅਕਤੂਬਰ (ਪੋਸਟ ਬਿਊਰੋ)- ਅਮਰੀਕਾ ਨੇ ਪਾਕਿਸਤਾਨ ਨੂੰ ਅੱਤਵਾਦ ਬਾਰੇ ਫਿਰ ਸਖ਼ਤ ਹਦਾਇਤ ਦਿੱਤੀ ਹੈ ਅਤੇ ਸਾਫ਼ ਕਿਹਾ ਹੈ ਕਿ ਪਾਕਿਸਤਾਨ ਨੂੰ ਆਪਣੀ ਜ਼ਮੀਨ ਤੋਂ ਅੱਤਵਾਦੀ ਸਰਗਰਮੀਂ ਵਾਲੇ ਟੋਲਿਆਂ ਨੂੰ ਰੋਕਣਾ ਚਾਹੀਦਾ ਹੈ ਅਤੇ ਇਸ ਦੇ ਨਾਲ ਹੀ ਮੁੰਬਈ ਅੱਤਵਾਦੀ ਹਮਲੇ ਦੇ ਮਾਸਟਰ ਮਾਈਂਡ ਹਾਫਿਜ਼ ਸਈਦ ਸਮੇਤ ਲਸ਼ਕਰ-ਏ-ਤਾਇਬਾ ਦੇ ਦੂਜੇ ਵੱਡੇ ਅੱਤਵਾਦੀਆਂ ਉੱਤੇ ਮੁਕੱਦਮਾ ਚਲਾਉਣਾ ਚਾਹੀਦਾ ਹੈ।
ਵਰਨਣ ਯੋਗ ਹੈ ਕਿ ਅਮਰੀਕਾ ਦਾ ਇਹ ਸਖ਼ਤ ਬਿਆਨ ਓਦੋਂ ਆਇਆ ਹੈ, ਜਦੋਂ ਪਾਕਿਸਤਾਨ ਉੱਤੇ ਅੱਤਵਾਦੀ ਫੰਡਿੰਗ ਦੇ ਕਾਰਨ ਫਾਈਨਾਂਸ਼ੀਅਲ ਐਕਸ਼ਨ ਟਾਸਕ ਫੋਰਸ (ਐੱਫ ਏ ਟੀ ਐੱਫ) ਦੀ ਕਾਲੀ ਸੂਚੀ ਵਿੱਚ ਪਾਏ ਜਾਣ ਦਾ ਖ਼ਤਰਾ ਮੰਡਲਾ ਰਿਹਾ ਹੈ। ਅਮਰੀਕੀ ਵਿਦੇਸ਼ ਵਿਭਾਗ ਦੀ ਦੱਖਣੀ ਤੇ ਮੱਧ ਏਸ਼ੀਆਈ ਬਿਊਰੋ ਦੀ ਮੁਖੀ ਐਲਿਸ ਵੇਲਸ ਨੇ ਪਾਕਿਸਤਾਨ ਵਿੱਚ ਲਸ਼ਕਰ-ਏ-ਤਾਇਬਾ ਅਤੇ ਜਮਾਤ-ਉਦ-ਦਾਵਾ ਦੇ ਚਾਰ ਸਿਖਰਲੇ ਅੱਤਵਾਦੀਆਂ ਦੀ ਗ੍ਰਿਫ਼ਤਾਰੀ ਦਾ ਸਵਾਗਤ ਕਰਦੇ ਹੋਏ ਕਿਹਾ, ‘ਜਿਵੇਂ ਪ੍ਰਧਾਨ ਮੰਤਰੀ ਇਮਰਾਨ ਖ਼ਾਨ ਨੇ ਕਿਹਾ ਹੈ ਕਿ ਪਾਕਿਸਤਾਨ ਨੂੰ ਆਪਣੇ ਭਵਿੱਖ ਲਈ ਆਪਣੀ ਜ਼ਮੀਨ ਤੋਂ ਚੱਲਦੀਆਂ ਅੱਤਵਾਦੀ ਜਮਾਤਾਂ ਨੂੰ ਰੋਕਣਾ ਪਵੇਗਾ, ਅਸੀਂ ਚਾਰ ਅੱਤਵਾਦੀਆਂ ਦੀ ਗ੍ਰਿਫ਼ਤਾਰੀ ਦੀ ਖ਼ਬਰ ਦਾ ਸਵਾਗਤ ਕਰਦੇ ਹਾਂ। ਲਸ਼ਕਰ ਦੇ ਹਮਲਿਆਂ ਦੇ ਪੀੜਤ ਇਸ ਦੇ ਹੱਕਦਾਰ ਹਨ ਕਿ ਉਹ ਲਸ਼ਕਰ ਸਰਗਣਾ ਹਾਫਿਜ਼ ਸਈਦ ਸਮੇਤ ਇਨ੍ਹਾਂਸਾਰੇ ਅੱਤਵਾਦੀਆਂ ਉੱਤੇ ਮੁਕੱਦਮਾ ਚਲਦਾ ਵੇਖਣ।
ਪਾਕਿਸਤਾਨ ਨੇ ਬੀਤੇ ਵੀਰਵਾਰ ਲਸ਼ਕਰ ਦੇ ਚਾਰ ਵੱਡੇ ਆਗੂਆਂ ਜ਼ਫਰ ਇਕਬਾਲ, ਯਾਹੀਆ ਅਜੀਜ਼, ਮੁਹੰਮਦ ਅਸ਼ਰਫ ਅਤੇ ਅਬਦੁਲ ਸਲਾਮ ਨੂੰ ਗ੍ਰਿਫ਼ਤਾਰ ਕੀਤਾ ਸੀ। ਉਂਜ ਉਸ ਦਾ ਇਹ ਇਤਿਹਾਸ ਹੈ ਕਿ ਵਿਖਾਵੇ ਲਈ ਅੱਤਵਾਦੀਆਂ ਨੂੰ ਫੜਦਾ ਤੇ ਫਿਰ ਛੱਡ ਦਿੰਦਾ ਹੈ। ਵੇਲਸ ਨੇ ਪਾਕਿਸਤਾਨ ਨੂੰ ਪਿਛਲੇ ਮਹੀਨੇ ਵੀ ਕਿਹਾ ਸੀ। ਉਸ ਸਮੇਂ ਉਨ੍ਹਾਂ ਕਿਹਾ ਸੀ ਕਿ ਪਾਕਿਸਤਾਨ ਨੂੰ ਹਾਫਿਜ਼ ਸਈਦ ਤੇ ਮਸੂਦ ਅਜ਼ਹਰ ਜਿਹੇ ਅੱਤਵਾਦੀਆਂ ਖ਼ਿਲਾਫ਼ ਮੁਕੱਦਮਾ ਚਲਾਉਣਾ ਚਾਹੀਦਾ ਹੈ।