ਤਿੰਨ ਪਾਰਟੀਆਂ ਰਲ ਕੇ ਬਣਾ ਸਕਦੀਆਂ ਹਨ ਸਰਕਾਰ
ਓਟਵਾ, 14 ਅਕਤੂਬਰ (ਪੋਸਟ ਬਿਊਰੋ) : ਇਹ ਤਾਂ ਹੁਣ ਸਪਸ਼ਟ ਹੋ ਚੁੱਕਿਆ ਹੈ ਕਿ ਜਗਮੀਤ ਸਿੰਘ ਨੇ ਹਰ ਕੈਨੇਡੀਅਨ ਦੇ ਮਨ ਵਿੱਚ ਥਾਂ ਬਣਾਈ ਹੈ। ਜਗਮੀਤ ਸਿੰਘ ਦੀ ਇਸ ਚੜ੍ਹਾਈ ਬਾਰੇ ਜੋ ਕੁਮੈਂਟੇਟਰ ਆਖ ਰਹੇ ਹਨ ਇੱਥੇ ਅਸੀਂ ਉਹ ਸਾਂਝਾ ਕਰਨ ਜਾ ਰਹੇ ਹਾਂ।
ਨੈਨੋਜ਼ ਰਿਸਰਚ ਦੇ ਨਿੱਕ ਨੈਨੋਜ਼ ਦਾ ਕਹਿਣਾ ਹੈ ਕਿ ਅਸੀਂ ਚੋਣ ਸਰਵੇਖਣਾਂ ਵਿੱਚ ਜਗਮੀਤ ਸਿੰਘ ਦੀ ਚੜ੍ਹਾਈ ਵੇਖ ਰਹੇ ਹਾਂ ਤੇ ਇਸ ਦੇ ਨਾਲ ਹੀ ਤਰਜੀਹੀ ਤੌਰ ਉੱਤੇ ਕੈਨੇਡੀਅਨਾਂ ਦੇ ਹਰਮਨਪਿਆਰੇ ਪ੍ਰਧਾਨ ਮੰਤਰੀ ਵਜੋਂ ਵੀ ਉਨ੍ਹਾਂ ਦੀ ਚੜ੍ਹਤ ਬਰਕਰਾਰ ਹੈ। ਇੰਜ ਲੱਗ ਰਿਹਾ ਹੈ ਕਿ ਜਿਵੇਂ ਜਿਵੇਂ ਵੱਧ ਤੋਂ ਵੱਧ ਕੈਨੇਡੀਅਨ ਜਗਮੀਤ ਸਿੰਘ ਨੂੰ ਜਾਣ ਰਹੇ ਹਨ ਓਨਾ ਹੀ ਉਹ ਉਨ੍ਹਾਂ ਨੂੰ ਵਧੇਰੇ ਪਸੰਦ ਕਰ ਰਹੇ ਹਨ। ਉਨ੍ਹਾਂ ਇਹ ਵੀ ਆਖਿਆ ਕਿ ਐਨਡੀਪੀ ਦੀ ਇਸ ਚੜ੍ਹਤ ਨੂੰ ਭਾਵੇਂ ਸੱਭ ਮਹਿਸੂਸ ਕਰ ਰਹੇ ਹਨ ਪਰ ਮੁੱਖ ਧਾਰਾ ਦੀਆਂ ਦੋਵੇਂ ਪਾਰਟੀਆਂ ਇਸ ਤੋਂ ਇਨਕਾਰੀ ਹਨ।
ਸੀਬੀਸੀ ਦੇ ਐਰਿਕ ਗ੍ਰੇਨੀਅਰ ਦਾ ਕਹਿਣਾ ਹੈ ਕਿ ਇਸ ਸਮੇਂ ਐਨਡੀਪੀ ਦੀ ਚੜ੍ਹਤ ਨੂੰ ਮਹਿਸੂਸ ਕੀਤਾ ਜਾ ਸਕਦਾ ਹੈ। ਇੰਜ ਲੱਗ ਰਿਹਾ ਹੈ ਕਿ ਲਿਬਰਲ ਤੇ ਕੰਜ਼ਰਵੇਟਿਵ ਆਪਣਾ ਆਧਾਰ ਗੁਆ ਰਹੇ ਹਨ ਜਦਕਿ ਚੋਣ ਕੈਂਪੇਨ ਦੇ ਆਖਰੀ ਹਫਤੇ ਦਾਖਲ ਹੋਣ ਉੱਤੇ ਐਨਡੀਪੀ ਦੀ ਪਕੜ ਮਜ਼ਬੂਤ ਹੋ ਚੁੱਕੀ ਹੈ। ਗ੍ਰੇਨੀਅਰ ਦਾ ਕਹਿਣਾ ਹੈ ਕਿ ਭਾਵੇਂ ਲਿਬਰਲਾਂ ਤੇ ਕੰਜ਼ਰਵੇਟਿਵਾਂ ਦੀ ਪਕੜ ਢਿੱਲੀ ਪੈ ਰਹੀ ਹੈ ਪਰ ਫਿਰ ਵੀ ਉਹ ਐਨਡੀਪੀ ਨੂੰ ਸਖ਼ਤ ਮੁਕਾਬਲਾ ਦੇਣਗੇ। ਉਨ੍ਹਾਂ ਆਖਿਆ ਕਿ ਹੁਣ ਜਦੋਂ ਕਿ ਦੋਵਾਂ ਪਾਰਟੀਆਂ ਨੂੰ ਹੀ 33 ਫੀ ਸਦੀ ਤੋਂ ਘੱਟ ਸਮਰਥਨ ਮਿਲ ਰਿਹਾ ਹੈ ਤਾਂ ਅਜਿਹੇ ਵਿੱਚ ਬਹੁਗਿਣਤੀ ਸਰਕਾਰ ਬਣਦੀ ਨਜ਼ਰ ਨਹੀਂ ਆ ਰਹੀ। ਈਕੋਜ਼ ਰਿਸਰਚ ਦੇ ਫਰੈਂਕ ਗ੍ਰੇਵਜ਼ ਦਾ ਦਾਅਵਾ ਹੈ ਕਿ ਐਨਡੀਪੀ ਦੀ ਪਕੜ ਯਕੀਨਨ ਮਜ਼ਬੂਤ ਹੋਈ ਹੈ ਤੇ ਬਲਾਕ ਕਿਊਬਿਕੁਆ ਵੀ ਉੱਪਰ ਉੱਠੀ ਹੈ। ਪਰ ਉਨ੍ਹਾਂ ਮੁਤਾਬਕ ਸੀਪੀਸੀ ਦੀ ਪਕੜ ਢਿੱਲੀ ਪਈ ਹੈ ਤੇ ਉਸ ਨੂੰ ਘੱਟ ਸੀਟਾਂ ਮਿਲਣ ਦੀ ਸੰਭਾਵਨਾ ਹੈ।
ਐਬੇਕਸ ਡਾਟਾ ਅਨੁਸਾਰ ਜਗਮੀਤ ਸਿੰਘ ਦਾ ਕਿਰਦਾਰ ਨਿਖਰ ਕੇ ਸਾਹਮਣੇ ਆਇਆ ਹੈ ਤੇ ਸ਼ੀਅਰ ਨੂੰ ਇਸ ਨਾਲ ਨੁਕਸਾਨ ਹੋ ਸਕਦਾ ਹੈ। ਟੋਰਾਂਟੋ ਸਨ ਦੇ ਬ੍ਰਾਇਨ ਲਿਲੀ ਦਾ ਮੰਨਣਾ ਹੈ ਕਿ ਵੇਗ ਨੂੰ ਰੋਕਣ ਬਹੁਤ ਔਖਾ ਹੁੰਦਾ ਹੈ ਤੇ ਜਗਮੀਤ ਸਿੰਘ ਦੇ ਵੇਗ ਨੂੰ ਰੋਕਿਆ ਜਾਣਾ ਵੀ ਸੰਭਵ ਨਹੀਂ ਹੈ। ਕੋਰਸ ਰੇਡੀਓ ਦੇ ਚਾਰਲਸ ਐਡਲਰ ਅਨੁਸਾਰ ਕੈਨੇਡਾ ਨੂੰ ਜਗਮੀਤ ਸਿੰਘ ਦੇ ਰੂਪ ਵਿੱਚ ਨਵਾਂ ਸਿਆਸੀ ਰਾਕ ਸਟਾਰ ਮਿਲ ਗਿਆ ਹੈ। ਟੂ ਕਲੋਸ ਟੁ ਕਾਲ ਦੇ ਬ੍ਰਾਇਨ ਬ੍ਰੈਗਟ ਦਾ ਕਹਿਣਾ ਹੈ ਕਿ ਭੂਗੋਲਿਕ ਤੌਰ ਉੱਤੇ ਲਿਬਰਲਾਂ ਲਈ ਰੁਝਾਨ ਕਾਫੀ ਨਕਾਰਾਤਮਕ ਹੈ ਜਦਕਿ ਐਨਡੀਪੀ ਲਈ ਇਹ ਕਾਫੀ ਸਕਾਰਾਤਮਕ ਹੈ। ਕੰਜ਼ਰਵੇਟਿਵਾਂ ਲਈ ਵੀ ਇਹ ਰੁਝਾਨ ਕਾਫੀ ਨਕਾਰਾਤਮਕ ਹੈ।
ਗਲੋਬਲ ਨਿਊਜ਼ ਦੇ ਕੀਥ ਬਾਲਡਰੇਅ ਦਾ ਮੰਨਣਾ ਹੈ ਕਿ ਜਗਮੀਤ ਸਿੰਘ ਬਹੁਤ ਹੀ ਵਧੀਆ ਕੈਂਪੇਨਰ ਹਨ ਤੇ ਸਾਰੇ ਆਗੂਆਂ ਨਾਲੋਂ ਵੱਧ ਦਮਖਮ ਰੱਖਦੇ ਹਨ। ਕੈਂਪੇਨ ਰਿਸਰਚ ਦੇ ਨਿੱਕ ਕੁਵਾਲਿਸ ਨੇ ਆਖਿਆ ਕਿ ਐਨਡੀਪੀ ਆਗੂ ਵਜੋਂ ਜਗਮੀਤ ਸਿੰਘ ਵੱਲੋਂ ਕੀਤੇ ਜਾ ਰਹੇ ਕੰਮ ਨੂੰ 50 ਫੀ ਸਦੀ ਕੈਨੇਡੀਅਨ ਮਨਜ਼ੂਰੀ ਦੇ ਚੁੱਕੇ ਹਨ। ਐਬੇਕਸ ਡਾਟਾ ਦੇ ਬਰੂਸ ਐਂਡਰਸਨ ਤੇ ਡੇਵਿਡ ਕੋਲੇਟੋ ਅਨੁਸਾਰ ਸਿਆਸੀ ਪਿੜ ਵਿੱਚ ਜਗਮੀਤ ਸਿੰਘ ਦਾ ਕੱਦ ਕਾਫੀ ਉੱਚਾ ਹੋਇਆ ਹੈ।