ਕੁਸ਼ੀਨਗਰ, 13 ਅਕਤੂਬਰ (ਪੋਸਟ ਬਿਊਰੋ)- ਜ਼ਿਲੇ ਵਿੱਚ ਲਗਭਗ ਚਾਰ ਸਾਲ ਤੋਂ ਲਿਵ ਇਨ ਰਿਲੇਸ਼ਨਸ਼ਿਪ 'ਚ ਰਹਿ ਰਹੇ ਐੱਸ ਡੀ ਐੱਮ ਦਿਨੇਸ਼ ਕੁਮਾਰ ਅਤੇ ਰੇਨੂੰ ਲਈ ਸ਼ੁੱਕਰਵਾਰ ਅੱਧੀ ਰਾਤ ਨੂੰ ਪਡਰੌਨਾ ਸ਼ਹਿਰ ਦਾ ਗਾਇਤਰੀ ਮੰਦਰ ਖੁੱਲ੍ਹਵਾਇਆ ਗਿਆ ਅਤੇ ਦੋ ਐੱਸ ਡੀ ਐੱਮ ਦੀ ਮੌਜੂਦਗੀ ਵਿੱਚ ਉਨ੍ਹਾਂ ਦਾ ਵਿਆਹ ਹੋਇਆ। ਇਹੀ ਨਹੀਂ, ਵਿਆਹ ਤੋਂ ਬਾਅਦ ਰਾਤ ਨੂੰ ਹੀ ਰਜਿਸਟਰਾਰ ਦਫਤਰ ਖੁੱਲ੍ਹਵਾ ਕੇ ਵਿਆਹ ਦੀ ਰਜਿਸਟੇਰਸ਼ਨ ਵੀ ਕੀਤੀ ਗਈ।
ਪਤਾ ਲੱਗਾ ਹੈ ਕਿ ਖੱਡਾ ਦੇ ਸਾਬਕਾ ਐੱਸ ਡੀ ਐੱਮ ਰਹੇ ਦਿਨੇਸ਼ ਕੁਮਾਰ ਦੀ ਮਹੀਨਾ ਕੁ ਪਹਿਲਾਂ ਬਦਲੀ ਹੋ ਗਈ ਸੀ। ਸ਼ੁੱਕਰਵਾਰ ਉਹ ਜ਼ਿਲ੍ਹਾ ਹੈੱਡਕੁਆਰਟਰ ਆਏ ਸਨ। ਇਸੇ ਦੌਰਾਨ ਉਨ੍ਹਾਂ ਨਾਲ ਚਾਰ ਸਾਲ ਤੋਂ ਰਹਿਣ ਵਾਲੀ ਰੇਨੂੰ ਵੀ ਦਫਤਰ ਪਹੁੰਚ ਗਈ। ਉਸ ਨੇ ਉਥੇ ਮੌਜੂਦ ਅਫਸਰਾਂ ਨੂੰ ਪੂਰੀ ਜਾਣਕਾਰੀ ਦੇ ਕੇ ਵਿਆਹ ਕਰਨ ਦੀ ਇੱਛਾ ਪ੍ਰਗਟਾਈ। ਉਸ ਵੇਲੇ ਉਸ ਨੂੰ ਸਮਝਾ-ਬੁਝਾ ਕੇ ਮਾਮਲੇ ਨੂੰ ਸ਼ਾਂਤ ਕਰਨ ਦੀ ਕੋਸ਼ਿਸ਼ ਕੀਤੀ ਗਈ, ਪਰ ਗੱਲ ਨਾ ਬਣੀ। ਅਖੀਰ ਰਾਤ ਅੱਠ ਵਜੇ ਰਜਿਸਟਰਾਰ ਦਫਤਰ ਖੁੱਲ੍ਹਵਾ ਕੇ ਵਿਆਹ ਦੀ ਰਜਿਸਟੇਰਸ਼ਨ ਕਰਵਾਈ ਗਈ, ਜਦ ਕਿ ਰਾਤ 12 ਵਜੇ ਉਕਤ ਮੰਦਰ ਖੁੱਲ੍ਹਵਾ ਕੇ ਦੋਵਾਂ ਦਾ ਵਿਆਹ ਰਸਮੀ ਤੌਰ ਉੱਤੇ ਵੀ ਕਰਵਾਇਆ ਗਿਆ।