ਓਸਲੋ, 12 ਅਕਤੂਬਰ (ਪੋਸਟ ਬਿਊਰੋ)- ਇਥੋਪੀਆ ਦੇ ਪ੍ਰਧਾਨ ਮੰਤਰੀ ਅਬੀ ਅਹਿਮਦ ਨੂੰ ਕੱਲ੍ਹ 2019 ਦੇ ‘ਨੋਬਲ ਸ਼ਾਂਤੀ ਇਨਾਮ’ ਨਾਲ ਸਨਮਨਿਤ ਕੀਤਾ ਗਿਆ। ਜੂਰੀ ਨੇ ਦੱਸਿਆ ਕਿ ਅਲੀ ਨੂੰ ਸ਼ਾਂਤੀ ਅਤੇ ਅੰਤਰਰਾਸ਼ਟਰੀ ਸਹਿਯੋਗ ਹਾਸਲ ਕਰਨ ਦੀਆਂ ਕੋਸ਼ਿਸ਼ਾਂ ਲਈ ਅਤੇ ਵਿਸ਼ੇਸ਼ ਰੂਪ ਨਾਲ ਗੁਆਂਢੀ ਦੇਸ਼ ਇਰੀਟ੍ਰੀਆ ਨਾਲ ਸਰਹੱਦੀ ਸੰਘਰਸ਼ ਮੁਕਾਉਣ ਲਈ ਉਨ੍ਹਾਂ ਦੇ ਫੈਸਲਾਕੁੁਨ ਪਹਿਲ ਲਈ ਇਸ ਇਨਾਮ ਨਾਲ ਸਨਮਾਨਿਤ ਕੀਤਾ ਗਿਆ ਹੈ।
43 ਸਾਲ ਦੇ ਅਬੀ ਅਹਿਮਦ ਨੂੰ ਇਥੋਪੀਆ ਦਾ ‘ਨੈਲਸਨ ਮੰਡਲਾ' ਵੀ ਕਿਹਾ ਜਾਂਦਾ ਹੈ। ਅਪ੍ਰੈਲ 2018 'ਚ ਨਬੀ ਅਹਿਮਦ ਇਥੋਪੀਆ ਦੇ ਪ੍ਰਧਾਨ ਮੰਤਰੀ ਬਣਦਿਆਂ ਸਾਰ ਅਫਰੀਕੀ ਦੇਸ਼ਾਂ ਵਿੱਚ ਸਭ ਤੋਂ ਨੌਜਵਾਨ ਰਾਸ਼ਟਰੀ ਆਗੂ ਬਣ ਗਏ ਅਤੇ ਉਨ੍ਹਾਂ ਨੇ ਇਥੋਪੀਆ 'ਚ ਕਈ ਸੁਧਾਰ ਸ਼ੁਰੂ ਕਰ ਦਿੱਤੇ।ਪ੍ਰਧਾਨ ਮੰਤਰੀ ਬਣਨ ਦੇ 100 ਦਿਨਾਂ ਅੰਦਰ ਅਬੀ ਨੇ ਐਮਰਜੈਂਸੀ ਹਟਾਈ ਅਤੇ ਹਜ਼ਾਰਾਂ ਵਿਰੋਧੀ ਵਰਕਰਾਂ ਨੂੰ ਜੇਲ੍ਹ ਤੋਂ ਰਿਹਾਅ ਕੀਤਾ। ਸਭ ਤੋਂ ਮਹੱਤਵਪੂਰਨ ਪਹਿਲ ਉਨ੍ਹਾਂ ਨੇ ਆਪਣੇ ਕੱਟੜ ਵਿਰੋਧੀ ਦੇਸ਼ ਇਰੀਟ੍ਰੀਆ ਨਾਲ ਖੂਨੀ ਸੰਘਰਸ਼ ਖਤਮ ਕਰਨ ਲਈ ਕੀਤੀ। ਜਲਾਈ 2018 'ਚ ਇਥੋਪੀਆ ਤੇ ਇਰੀਟ੍ਰੀਆ ਵਿਚਾਲੇ 22 ਸਾਲ ਪੁਰਾਣੀ ਲੜਾਈ ਦੇ ਅੰਤ 'ਚ ਅਹਿਮ ਭੂਮਿਕਾ ਨਿਭਾਉਣ ਦੇ ਚੱਲਦਿਆਂ ਅਬੀ ਅਹਿਮਦ ਅਲੀ ਨੂੰ ਇਸ ਪੁਰਸਕਾਰ ਨਾਲ ਸਨਮਾਨਿਤ ਕੀਤਾ ਗਿਆ ਹੈ।