ਇਸਲਾਮਾਬਾਦ, 10 ਅਕਤੂਬਰ (ਪੋਸਟ ਬਿਊਰੋ)- ਜੰਮੂ-ਕਸ਼ਮੀਰ ਬਾਰੇ ਭਾਰਤ ਅਤੇ ਪਾਕਿ ਦੇ ਵਿੱਚ ਤਨਾਤਨੀ ਜਾਰੀ ਹੈ। ਪਾਕਿਸਤਾਨੀ ਪ੍ਰਧਾਨ ਮੰਤਰੀ ਇਮਰਾਨ ਖਾਨ ਲਗਾਤਾਰ ਦੁਨੀਆਂ ਭਰ ਵਿੱਚ ਇਸ ਮੁੱਦੇ ਨੂੰ ਚੁੱਕਣ ਦੀ ਕੋਸ਼ਿਸ਼ ਕਰ ਰਹੇ ਹੈ, ਪਰ ਭਾਰਤ ਨੇ ਦੁਨੀਆਂ ਨੂੰ ਆਪਣਾ ਰੁਖ ਸਾਫ ਕਰ ਦਿੱਤਾ ਹੈ।
ਇਸ ਦੌਰਾਨ ਮੁਸਲਿਮ ਦੇਸ਼ਾਂ ਦੀ ਏਕਤਾ ਦੀ ਗੱਲ ਕਰਨ ਵਾਲੇ ਇਮਰਾਨ ਖਾਨ ਨੂੰ ਇੱਕ ਵੱਡਾ ਅਵਾਰਡ ਮਿਲ ਗਿਆ ਹੈ। ਜਾਰਡਨ ਦੀ ਇੱਕ ਸੰਸਥਾ ਰਾਇਲ ਇਸਲਾਮਿਕ ਸਟ੍ਰੈਟੇਜਿਕ ਸੈਂਟਰ ਨੇ ਇਮਰਾਨ ਖਾਨ ਨੂੰ ‘ਮੁਸਲਿਮ ਮੈਨ ਆਫ ਦ ਈਅਰ' ਦੇ ਅਵਾਰਡ ਨਾਲ ਨਵਾਜਿਆ ਹੈ। ਇਮਰਾਨ ਨੂੰ ਮਿਲਿਆ ਇਹ ਸਨਮਾਨ ਉਦੋਂ ਸਾਹਮਣੇ ਆਇਆ ਹੈ ਜਦੋਂ ਯੂ ਐੱਨ ਵਿੱਚ ਉਨ੍ਹਾਂ ਨੇ ਇੱਕ ਵਾਰ ਫਿਰ ਜੇਹਾਦ ਦੀ ਗੱਲ ਕੀਤੀ ਸੀ। ਇਸ ਸੰਸਥਾ ਨੇ ਇਮਰਾਨ ਖਾਨ ਦੇ ਨਾਲ ਅਮਰੀਕੀ ਨੇਤਾ ਰਾਸ਼ਿਦਾ ਤੈਲਬ ਨੂੰ ਵੀ ‘ਵੂਮੈਨ ਆਫ ਦ ਈਅਰ' ਦਾ ਅਵਾਰਡ ਦਿੱਤਾ ਹੈ।
ਵਰਨਣ ਯੋਗ ਹੈ ਕਿ ਇੱਕ ਤਰਫ ਇਮਰਾਨ ਖਾਨ ਨੂੰ ਇਹ ਸਨਾਨ ਮਿਲਿਆ ਹੈ, ਦੂਸਰੇ ਪਾਸੇ ਪਿੱਛਲੇ ਦਿਨੀਂ ਉਨ੍ਹਾਂ ਦੇ ਯੂ ਐੱਨ ਓ ਵਿੱਚ ਦਿੱਤੇ ਭਾਸ਼ਣ ਵਿੱਚ ਉਨ੍ਹਾਂ ਨੇ ਦੁਨੀਆਂ ਦੇ ਸਾਹਮਣੇ ਇੱਕ ਤਰ੍ਹਾਂ ਦਾ ਐਟਮੀ ਯੁੱਧ ਦੀ ਧਮਕੀ ਦੇ ਦਿੱਤੀ ਸੀ। ਇਮਰਾਨ ਨੇ ਆਪਣੇ ਸੰਬੋਧਨ ਵਿੱਚ ਕਿਹਾ ਸੀ ਕਿ ਜੇ ਕਸ਼ਮੀਰ ਮਾਮਲੇ ਉਤੇ ਦੁਨੀਆਂ ਨੇ ਦਖਲ ਨਹੀਂ ਦਿੱਤਾ, ਤਾਂ ਕਾਫੀ ਮੁਸ਼ਕਲ ਹੋ ਸਕਦੀ ਹੈ ਕਿਉਂਕਿ ਭਾਰਤ ਅਤੇ ਪਾਕਿ ਦੋ ਐਟਮ ਬੰਬ ਵਾਲੇ ਦੇਸ਼ ਹਨ, ਜੇ ਟਕਰਾਅ ਹੋਇਆ ਤਾਂ ਬਹੁਤ ਬੁਰਾ ਹੋਵੇਗਾ।