ਓਟਵਾ, 9 ਅਕਤੂਬਰ (ਪੋਸਟ ਬਿਊਰੋ) : ਕੰਜ਼ਰਵੇਟਿਵ ਇਹ ਨਹੀਂ ਆਖ ਰਹੇ ਕਿ ਉਹ ਆਪਣੀ ਫੈਡਰਲ ਕੈਂਪੇਨ ਦੌਰਾਨ ਇਮੀਗ੍ਰੇਸ਼ਨ ਤੇ ਸਰਹੱਦ ਦਾ ਮਸਲਾ ਉਠਾ ਰਹੇ ਹਨ। ਪਰ ਕੰਜ਼ਰਵੇਟਿਵ ਆਗੂ ਐਂਡਰਿਊ ਸ਼ੀਅਰ ਵੱਲੋਂ ਪੱਤਰਕਾਰਾਂ ਨੂੰ ਅਜਿਹੇ ਫੀਲਡ ਟਰਿੱਪ ਲਈ ਇੱਕਠਾ ਕੀਤਾ ਜਾ ਰਿਹਾ ਹੈ ਜਿਹੜਾ ਕਿਊਬਿਕ ਵਿੱਚ ਉਸ ਥਾਂ ਤੋਂ ਕੁੱਝ ਕਿਲੋਮੀਟਰ ਦੀ ਦੂਰੀ ਉੱਤੇ ਹੀ ਹੈ ਜਿੱਥੋਂ ਹਜ਼ਾਰਾਂ ਦੀ ਗਿਣਤੀ ਵਿੱਚ ਮਾਈਗ੍ਰੈਂਟਸ ਕੈਨੇਡਾ ਦਾਖਲ ਹੋਏ।
ਉਨ੍ਹਾਂ ਦਾ ਚੋਣ ਦੌਰਾ ਹੈਮਿੰਗਫੋਰਡ, ਕਿਊਬਿਕ ਦੀ ਉਸ ਹੱਦ ਤੱਕ ਜਾ ਰਿਹਾ ਹੈ ਜਿਹੜੀ ਅਮਰੀਕਾ ਦੇ ਨਾਲ ਲੱਗਦੀ ਹੈ, ਜਿੱਥੇ ਕੈਨੇਡਾ ਵਾਲੇ ਪਾਸੇ ਦੀ ਰੌਗਜ਼ਮ ਰੋਡ ਅਮਰੀਕਾ ਵਾਲੇ ਪਾਸੇ ਦੀ ਸੜਕ ਤੋਂ ਕੁੱਝ ਮੀਟਰ ਦੀ ਦੂਰੀ ਉੱਤੇ ਵੱਖ ਹੁੰਦੀ ਹੈ। ਫੈਡਰਲ ਸਰਕਾਰ ਦਾ ਕਹਿਣਾ ਹੈ ਕਿ ਪਿਛਲੇ ਦੋ ਸਾਲਾਂ ਵਿੱਚ ਲੱਗਭਗ 50,000 ਵਿਅਕਤੀ ਉੱਥੋਂ ਕੈਨੇਡਾ ਵਿੱਚ ਦਾਖਲ ਹੋਏ। ਕੈਨੇਡਾ ਆਉਣ ਤੋਂ ਬਾਅਦ ਬਹੁਤੇ ਮਾਈਗ੍ਰੈਂਟਸ ਵੱਲੋਂ ਪਨਾਹ ਲਈ ਦਾਅਵੇ ਕੀਤੇ ਗਏ।
ਪਰ ਕਾਨੂੰਨ ਦੇ ਇੱਕ ਮੋੜ ਨਾਲ ਹੀ ਹੋ ਸਕਦਾ ਹੈ ਕਿ ਉਨ੍ਹਾਂ ਮਾਈਗ੍ਰੈਂਟਸ, ਜਿਹੜੇ ਪਨਾਹ ਲੈਣ ਲਈ ਦਾਅਵੇ ਕਰ ਰਹੇ ਹਨ, ਨੂੰ ਅਮਰੀਕਾ ਪਰਤਣਾ ਪਵੇ। ਕੰਜ਼ਰਵੇਟਿਵ ਆਗੂਆਂ ਦਾ ਤਰਕ ਹੈ ਕਿ ਜਸਟਿਨ ਟਰੂਡੋ ਦੀ ਅਗਵਾਈ ਵਿੱਚ ਲਿਬਰਲਾਂ ਨੂੰ ਇਸ ਲਾਂਘੇ ਉੱਤੇ ਕੋਈ ਰੋਕ ਲਾਉਣੀ ਚਾਹੀਦੀ ਸੀ। ਹਾਲਾਂਕਿ ਸਰਹੱਦ ਨੂੰ ਮਜ਼ਬੂਤ ਬਣਾਏ ਬਿਨਾਂ ਇਹ ਸਪਸ਼ਟ ਨਹੀਂ ਹੈ ਕਿ ਇਹ ਸੰਭਵ ਕਿਸ ਤਰ੍ਹਾਂ ਹੈ।
ਇਸ ਦੌਰਾਨ, ਟਰੂਡੋ ਸਵੇਰੇ ਟੋਰਾਂਟੋ ਦੇ ਉੱਤਰਪੂਰਬ ਵਿੱਚ ਮਾਰਖਮ ਵਿੱਚ ਰੁਕਣਗੇ, ਜਿੱਥੇ ਲਿਬਰਲਾਂ ਨੂੰ ਕੁੱਝ ਕੁ ਸਬਅਰਬਨ ਸੀਟਾਂ ਹੱਥ ਲੱਗਣ ਦੀ ਆਸ ਹੈ। ਇਸ ਦੌਰਾਨ ਐਨਡੀਪੀ ਆਗੂ ਜਗਮੀਤ ਸਿੰਘ ਮਾਂਟਰੀਅਲ ਵਿੱਚ ਕੈਨੇਡੀਅਨ ਯੂਨੀਅਨ ਆਫ ਪਬਲਿਕ ਇੰਪਲਾਈਜ਼ ਦੇ ਇਜਲਾਸ ਨੂੰ ਸੰਬੋਧਨ ਕਰਨਗੇ। ਗ੍ਰੀਨ ਆਗੂ ਐਲਿਜ਼ਾਬੈੱਥ ਮੇਅ ਵੀ ਮਾਂਟਰੀਅਲ ਵਿੱਚ ਹੀ ਹੈ। ਇੱਥੇ ਉਹ ਗ੍ਰੀਨ ਪਾਰਟੀ ਦੇ ਡਿਪਟੀ ਆਗੂ ਡੈਨੀਅਲ ਗ੍ਰੀਨ ਦੇ ਨਾਲ ਕਿਊਬਿਕ ਕਲਚਰ ਦੇ ਨਾਲ ਨਾਲ ਕਿਫਾਇਤੀ ਘਰਾਂ ਸਬੰਧੀ ਐਲਾਨ ਕਰੇਗੀ।