ਟੋਰਾਂਟੋ, 9 ਅਕਤੂਬਰ (ਪੋਸਟ ਬਿਊਰੋ) : ਤਿੰਨ ਵੱਡੀਆਂ ਫੈਡਰਲ ਪਾਰਟੀਆਂ ਵੱਲੋਂ ਇਹ ਵਾਅਦਾ ਕੀਤਾ ਗਿਆ ਹੈ ਕਿ ਜੇ ਉਹ ਸੱਤਾ ਉੱਤੇ ਕਾਬਜ ਹੁੰਦੀਆਂ ਹਨ ਤਾਂ ਉਹ ਯੂਨੀਵਰਸਲ ਫਾਰਮਾਕੇਅਰ ਲੈ ਕੇ ਆਉਣਗੀਆਂ। ਹਾਲਾਂਕਿ ਯੂਨੀਵਰਸਲ ਫਾਰਮਾਕੇਅਰ ਲਈ ਉਨ੍ਹਾਂ ਦੀਆਂ ਯੋਜਨਾਵਾਂ ਤੇ ਲਾਗਤ ਵੱਖੋ ਵੱਖਰੀ ਹੈ। ਪ੍ਰਿਸਕ੍ਰਾਈਬਡ ਦਵਾਈਆਂ ਨੂੰ ਜੇ ਇਸ ਤਹਿਤ ਕਵਰ ਕੀਤਾ ਜਾਂਦਾ ਹੈ ਤਾਂ ਇਸ ਨਾਲ ਘੱਟ ਆਮਦਨ ਵਾਲੇ ਘੱਟੋ ਘੱਟ ਇੱਕ ਮਿਲੀਅਨ ਕੈਨੇਡੀਅਨਾਂ ਦਾ ਫਾਇਦਾ ਹੋਵੇਗਾ। ਤਾਜ਼ਾ ਅਧਿਐਨ ਅਨੁਸਾਰ ਹਾਲ ਦੀ ਘੜੀ ਘੱਟ ਆਮਦਨ ਵਾਲੇ ਕੈਨੇਡੀਅਨਾਂ ਨੂੰ ਇਹ ਦਵਾਈਆਂ ਖਰੀਦਣ ਲਈ ਆਪਣੇ ਖਾਣੇ ਤੇ ਹੀਟ ਨਾਲ ਸਮਝੌਤਾ ਕਰਨਾ ਪੈਂਦਾ ਹੈ।
ਕਮਜ਼ੋਰ ਕੈਨੇਡੀਅਨ, ਜਿਨ੍ਹਾਂ ਵਿੱਚ ਕਾਂਟਰੈਕਟ ਵਰਕਰਜ਼ ਤੇ ਉਹ ਲੋਕ ਵੀ ਸ਼ਾਮਲ ਹਨ ਜਿਨ੍ਹਾਂ ਕੋਲ ਪ੍ਰਾਈਵੇਟ ਹੈਲਥ ਇੰਸ਼ੋਰੈਂਸ ਤੱਕ ਨਹੀਂ ਹੈ। ਉੱਤੋਂ ਉਨ੍ਹਾਂ ਨੂੰ ਡਾਇਬਟੀਜ਼, ਦਮਾ, ਕੋਲੈਸਟਰੌਲ ਤੇ ਹਾਈ ਬਲੱਡ ਪ੍ਰੈਸ਼ਰ ਵਰਗੀਆਂ ਅਲਾਮਤਾਂ ਲਈ ਪ੍ਰਿਸਕ੍ਰਾਈਬਡ ਦਵਾਈਆਂ ਖਰੀਦਣ ਵਾਸਤੇ ਸੰਘਰਸ਼ ਕਰਨਾ ਪੈ ਰਿਹਾ ਹੈ। 20 ਫੀ ਸਦੀ ਕੈਨੇਡੀਅਨਾਂ ਕੋਲ ਜਾਂ ਤਾਂ ਸਹੀ ਕਵਰੇਜ ਨਹੀਂ ਹੈ ਤੇ ਜਾਂ ਕੋਈ ਕਵਰੇਜ ਹੀ ਨਹੀਂ ਹੈ ਤੇ ਉਨ੍ਹਾਂ ਨੂੰ ਆਪਣੀ ਜੇਬ੍ਹ ਵਿੱਚੋਂ ਇਹ ਸੱਭ ਖਰਚਾ ਕਰਨਾ ਪੈਂਦਾ ਹੈ।
ਇੱਕ ਹੋਰ ਅਧਿਐਨ ਅਨੁਸਾਰ ਇਹ ਪਾਇਆ ਗਿਆ ਹੈ ਕਿ ਪਿਛਲੇ ਸਾਲ ਹਰ ਪੰਜਵੇਂ ਘਰ ਵਿੱਚੋਂ ਪਰਿਵਾਰ ਦਾ ਇੱਕ ਜੀਅ ਮਹਿੰਗੀ ਕੀਮਤ ਕਾਰਨ ਪ੍ਰਿਸਕ੍ਰਾਈਬਡ ਦਵਾਈ ਲੈਣ ਤੋਂ ਅਸਮਰੱਥ ਰਿਹਾ। ਲਿਬਰਲਾਂ ਦੀ ਵੈੱਬਸਾਈਟ ਅਨੁਸਾਰ ਉਹ ਅਜਿਹਾ ਪ੍ਰੋਗਰਾਮ ਲਾਗੂ ਕਰਨਗੇ ਜਿਸ ਤਹਿਤ ਪ੍ਰਿਸਕ੍ਰਾਈਬਡ ਦਵਾਈਆਂ ਵੱਧ ਤੋਂ ਵੱਧ ਕੈਨੇਡੀਅਨਾਂ ਦੀ ਪਹੁੰਚ ਵਿੱਚ ਹੋ ਸਕਣਗੀਆਂ। ਐਨਡੀਪੀ ਦਾ ਕਹਿਣਾ ਹੈ ਕਿ ਉਨ੍ਹਾਂ ਦੀ ਯੋਜਨਾ ਇਹ ਯਕੀਨੀ ਬਣਾਵੇਗੀ ਕਿ ਹਰੇਕ ਕੈਨੇਡੀਅਨ ਨੂੰ ਪ੍ਰਿਸਕ੍ਰਿਪਸ਼ਨ ਦੇ ਹਿਸਾਬ ਨਾਲ ਦਵਾਈਆਂ ਮਿਲ ਸਕਣ ਤੇ ਪਰਿਵਾਰ ਸਾਲ ਦਾ 500 ਡਾਲਰ ਵੀ ਬਚਾਅ ਸਕਣ।
ਗ੍ਰੀਨ ਪਾਰਟੀ ਦਾ ਕਹਿਣਾ ਹੈ ਕਿ ਉਹ ਕੈਨੇਡਾ ਹੈਲਥ ਐਕਟ ਦੇ ਪਸਾਰ ਦਾ ਸਮਰਥਨ ਕਰੇਗੀ ਤੇ ਇਹ ਵੀ ਯਕੀਨੀ ਬਣਾਵੇਗੀ ਕਿ ਪ੍ਰਿਸਕ੍ਰਾਈਬਡ ਦਵਾਈਆਂ ਫਾਰਮੇਸੀਜ਼ ਉੱਤੇ ਹੀ ਦਿੱਤੀਆਂ ਜਾਣ।