ਪਟਿਆਲਾ, 8 ਅਕਤੂਬਰ (ਪੋਸਟ ਬਿਊਰੋ)- ਆਪਣੇ ਸਹੁਰੇ ਪਰਵਾਰ ਦੇ ਡਰਾਈਵਰ ਖਿਲਾਫ ਛੇੜਛਾੜ ਦੇ ਦੋਸ਼ਾਂ ਤਹਿਤ ਦਿੱਤੀ ਦਰਖਾਸਤ ਬਾਰੇ ਪੁਲਸ ਵੱਲੋਂ ਕਾਰਵਾਈ ਨਾ ਕੀਤੇ ਜਾਣ ਦੇ ਦੋਸ਼ ਲਾਉਂਦਿਆਂ ਦੋ ਦਿਨ ਪਹਿਲਾਂ ਥਾਣਾ ਲਾਹੌਰੀ ਗੇਟ ਦੇ ਬਾਹਰ ਰਾਤ ਭਰ ਧਰਨਾ ਦੇਣ ਵਾਲੀ ਮਹਿਲਾ ਦੇ ਖਿਲਾਫ ਕੇਸ ਦਰਜ ਕੀਤਾ ਗਿਆ ਹੈ। ਇਸ ਕੇਸ ਉਸ ਦੇ ਪਤੀ ਨਾਲ ਚੱਲਦੇ ਕੇਸ ਵਿੱਚ ਮਹਿਲਾ ਦੇ ਖਿਲਾਫ ਗਵਾਹ ਵਜੋਂ ਸ਼ਾਮਲ ਸਹੁਰੇ ਪਰਵਾਰ ਦੇ ਉਕਤ ਡਰਾਈਵਰ ਨੂੰ ਧਮਕਾਉਣ ਅਤੇ ਕੁੱਟਮਾਰ ਕਰਨ ਦੇ ਦੋਸ਼ਾਂ 'ਤੇ ਆਧਾਰਿਤ ਹੈ। ਪੁਲਸ ਦਾ ਕਹਿਣਾ ਹੈ ਕਿ ਇਸੇ ਡਰਾਈਵਰ ਦੇ ਖਿਲਾਫ ਇਸ ਮਹਿਲਾ ਵੱਲੋਂ ਦਿੱਤੀ ਦਰਖਾਸਤ ਜਾਂਚ ਦੌਰਾਨ ਝੂਠੀ ਪਾਈ ਗਈ ਹੈ।
ਪ੍ਰਾਪਤ ਜਾਣਕਾਰੀ ਅਨੁਸਾਰ ਅਮਨਪ੍ਰੀਤ ਕੌਰ ਦੇ ਖਿਲਾਫ ਸ਼ਿਕਾਇਤ ਕਰਤਾ ਨੇ ਕਿਹਾ ਕਿ ਉਸ ਦੇ ਆਪਣੇ ਪਤੀ ਨਾਲ ਚੱਲਦੇ ਤਲਾਕ ਦੇ ਅਦਾਲਤੀ ਕੇਸ ਉਹ ਗਵਾਹ ਵਜੋਂ ਬਿਆਨ ਦੇਣ ਗਿਆ ਤਾਂ ਅਮਨਪ੍ਰੀਤ ਕੌਰ ਨੇ ਉਸ ਨੂੰ ਘੇਰ ਕੇ ਧਮਕਾਇਆ ਅਤੇ ਕੁੱਟਮਾਰ ਵੀ ਕੀਤੀ ਸੀ। ਇਸ ਤਰ੍ਹਾਂ ਅਮਨਪ੍ਰੀਤ ਕੌਰ ਦੇ ਖਿਲਾਫ ਥਾਣਾ ਲਾਹੌਰੀ ਗੇਟ 'ਚ ਕੇਸ ਦਰਜ ਕੀਤਾ ਗਿਆ ਹੈ। ਡੀ ਐਸ ਪੀ ਸਿਟੀ-1 ਯੋਗੇਸ਼ ਸ਼ਰਮਾ ਨੇ ਕੇਸ ਦਰਜ ਹੋਣ ਦੀ ਪੁਸ਼ਟੀ ਕਰਦਿਆਂ ਕਿਹਾ ਕਿ ਛੇੜਛਾੜ ਦੇ ਦੋਸ਼ਾਂ ਤਹਿਤ ਮਹਿਲਾ ਵੱਲੋਂ ਦਿੱਤੀ ਦਰਖਾਸਤ ਮੁੱਢਲੀ ਜਾਂਚ ਦੌਰਾਨ ਝੂਠੀ ਨਿਕਲੀ ਹੈ। ਪੁਲਸ ਨੇ ਦੱਸੇ ਗਏ ਘਟਨਾ ਸਥਾਨ ਦੇ ਸੀ ਸੀ ਟੀ ਵੀ ਕੈਮਰੇ ਦੀ ਫੁਟੇਜ ਵੀ ਦੇਖੀ ਗਈ ਹੈ ਪਰ ਅਜਿਹਾ ਮਾਮਲਾ ਸਾਹਮਣੇ ਨਹੀਂ ਆਇਆ।