ਟੀਕਮਗੜ੍ਹ, 8 ਅਕਤੂਬਰ (ਪੋਸਟ ਬਿਊਰੋ)- ਮੱਧ ਪ੍ਰਦੇਸ਼ ਦੇ ਟੀਕਮਗੜ੍ਹ ਵਿੱਚ ਪਪਾਵਨੀ ਪਿੰਡ ਵਿੱਚ ਕੱਲ੍ਹ ਦੁਪਹਿਰ ਪਜੈਰੋ ਗੱਡੀ ਦੀ ਟੱਕਰ ਨਾਲ ਤਿੰਨ ਬਾਈਕ ਸਵਾਰਾਂ ਦੀ ਮੌਤ ਹੋ ਗਈ। ਇਸ ਹਾਦਸੇ ਤੋਂ ਨਾਰਾਜ਼ ਪਰਵਾਰਕ ਮੈਂਬਰਾਂ ਨੇ ਜਾਮ ਲਾ ਦਿੱਤਾ। ਦੋਸ਼ ਇਹ ਸੀ ਕਿ ਸਾਬਕਾ ਮੁੱਖ ਮੰਤਰੀ ਉਮਾ ਭਾਰਤੀ ਦੇ ਭਤੀਜੇ ਕਰਗਾਪੁਰ ਵਿਧਾਇਕ ਰਾਹੁਲ ਸਿੰਘ ਤੇਜ਼ ਰਫਤਾਰ ਨਾਲ ਗੱਡੀ ਚਲਾ ਰਹੇ ਸਨ। ਦੇਰ ਸ਼ਾਮ ਤੱਕ ਰਾਹੁਲ ਦੇ ਖਿਲਾਫ ਮੋਟਰ ਵਹੀਕਲ ਐਕਟ ਦਾ ਕੇਸ ਦਰਜ ਕਰ ਲਿਆ ਗਿਆ। ਉਨ੍ਹਾਂ ਦਾ ਕਹਿਣਾ ਹੈ ਕਿ ਮੈਂ ਫੁਟੇਰ ਪਿੰਡ ਵਿੱਚ ਸਵੇਰ ਤੋਂ ਪ੍ਰੋਗਰਾਮ ਵਿੱਚ ਸਾਂ, ਓਧਰ ਗਿਆ ਹੀ ਨਹੀਂ ਤੇ ਮੈਨੂੰ ਸਾਜ਼ਿਸ ਤਹਿਤ ਫਸਾਇਆ ਜਾ ਰਿਹਾ ਹੈ।
ਝਿੰਨਗੁਵਾ ਦੇ ਵਸਨੀਕ ਰਵੀ ਆਪਣੇ ਸਾਲੇ ਦੇ ਲੜਕੇ ਬ੍ਰਿਜੇਂਦਰ ਅਤੇ ਮਦਨ ਨਾਲ ਬਾਈਕ 'ਤੇ ਬਰੇਠੀ ਪਿੰਡ ਜਾ ਰਹੇ ਸਨ। ਦੁਪਹਿਰ ਤਿੰਨ ਵਜੇ ਪਪਾਵਨੀ ਪਿੰਡ ਦੇ ਮੰਦਰ ਨੇੜੇ ਪਿੱਛਿਉਂ ਭਾਜਪਾ ਵਿਧਾਇਕ ਰਾਹੁਲ ਸਿੰਘ ਲੋਧੀ ਦੀ ਗੱਡੀ ਨੇ ਟੱਕਰ ਮਾਰ ਦਿੱਤੀ। ਇਸ ਕਾਰਨ ਰਵੀ ਅਤੇ ਬ੍ਰਿਜੇਂਦਰ ਦੀ ਘਟਨਾ ਵਾਲੀ ਜਗ੍ਹਾ ਹੀ ਮੌਤ ਹੋ ਗਈ। ਬਾਅਦ ਵਿੱਚ ਝਾਂਸੀ ਵਿੱਚ ਇਲਾਜ ਦੌਰਾਨ ਮਦਨ ਨੇ ਵੀ ਦਮ ਤੋੜ ਦਿੱਤਾ। ਪਰਵਾਰਕ ਮੈਂਬਰਾਂ ਦਾ ਦੋਸ਼ ਹੈ ਕਿ ਵਿਧਾਇਕ ਦੀ ਪਜੈਰੋ ਨੇ ਜਦ ਬਾਈਕ ਨੂੰ ਟੱਕਰ ਮਾਰੀ, ਓਦੋਂ ਉਹ ਖੁਦ ਗੱਡੀ ਚਲਾ ਰਹੇ ਸਨ ਅਤੇ ਹਾਦਸੇ ਪਿੱਛੋਂ ਭੱਜ ਗਏ। ਉਨ੍ਹਾਂ ਨੇ ਬਿਲਕੁਲ ਮਨੁੱਖ ਵਾਲੀ ਭਾਵਨਾ ਨਹੀਂ ਦਿਖਾਈ। ਦੇਰ ਸ਼ਾਮ ਵਿਧਾਇਕ ਦੇ ਨਾਂਅ ਉੱਤੇ ਦਰਜ ਪਜੈਰੋ ਦਾ ਚਾਲਕ ਵਿਜੇ ਯਾਦਵ ਕੋਤਵਾਲੀ ਥਾਣਾ ਪਹੁੰਚ ਗਿਆ। ਪੁਲਸ ਨੇ ਉਸ ਨੂੰ ਹਿਰਾਸਤ ਵਿੱਚ ਲੈ ਕੇ ਗੱਡੀ ਨੂੰ ਥਾਣੇ ਵਿੱਚ ਰਖਵਾਇਆ ਹੈ।