ਓਟਵਾ, 8 ਅਕਤੂਬਰ (ਪੋਸਟ ਬਿਊਰੋ) : ਸੋਮਵਾਰ ਰਾਤ ਨੂੰ ਸਾਰੀਆਂ ਪਾਰਟੀਆਂ ਦੇ ਆਗੂਆਂ ਦੀ ਹੋਈ ਬਹਿਸ ਵਿੱਚ ਐਨਡੀਪੀ ਆਗੂ ਜਗਮੀਤ ਸਿੰਘ ਕਈ ਮੁੱਦਿਆਂ ਉੱਤੇ ਤੋਲ ਮੋਲ ਕੇ ਦਿੱਤੇ ਗਏ ਜਵਾਬਾਂ, ਆਪਣੀ ਹਾਜ਼ਰ ਜਵਾਬੀ ਤੇ ਮਜ਼ਾਕੀਆ ਲਹਿਜੇ ਕਾਰਨ ਵੱਖਰੀ ਪਛਾਣ ਬਣਾਉਣ ਵਿੱਚ ਕਾਮਯਾਬ ਰਹੇ। ਇਸ ਨਾਲ ਨਵੀਂ ਚਰਚਾ ਇਹ ਛਿੜ ਚੁੱਕੀ ਹੈ ਕਿ 21 ਅਕਤੂਬਰ ਨੂੰ ਪੈਣ ਵਾਲੀਆਂ ਵੋਟਾਂ ਲਈ ਵੋਟਰਾਂ ਕੋਲ ਸਿਰਫ ਲਿਬਰਲ ਤੇ ਕੰਜ਼ਰਵੇਟਿਵਾਂ ਦਾ ਹੀ ਬਦਲ ਨਹੀਂ ਹੋਵੇਗਾ।
ਜਗਮੀਤ ਸਿੰਘ ਤੋਂ ਜਦੋਂ ਬਹਿਸ ਦੌਰਾਨ ਇਹ ਪੁੱਛਿਆ ਗਿਆ ਕਿ ਇਸ ਸਮੇਂ ਜਦੋਂ ਲਿਬਰਲ ਆਗੂ ਜਸਟਿਨ ਟਰੂਡੋ ਤੇ ਕੰਜ਼ਰਵੇਟਿਵ ਆਗੂ ਐਂਡਰਿਊ ਸ਼ੀਅਰ ਦਰਮਿਆਨ ਫਸਵਾਂ ਮੁਕਾਬਲਾ ਚੱਲ ਰਿਹਾ ਹੈ ਤੇ ਚੋਣ ਸਰਵੇਖਣ ਇਹ ਦਰਸਾ ਰਹੇ ਹਨ ਕਿ ਬਹੁਤੀਆਂ ਸੀਟਾਂ ਦੋਵੇਂ ਆਗੂ ਜਿੱਤਣਗੇ ਤਾਂ ਅਜਿਹੇ ਵਿੱਚ ਵੋਟਰਾਂ ਨੂੰ ਉਹ ਕੀ ਸੁਨੇਹਾ ਦੇਣਾ ਚਾਹੁਣਗੇ?ਇਸ ਸਵਾਲ ਦੇ ਜਵਾਬ ਵਿੱਚ ਜਗਮੀਤ ਸਿੰਘ ਨੇ ਆਖਿਆ ਕਿ ਇਸ ਦੇ ਜਵਾਬ ਵਿੱਚ ਉਹ ਕੈਨੇਡੀਅਨਾਂ ਤੋਂ ਇਹੋ ਸਵਾਲ ਪੁੱਛਣਾ ਚਾਹੁਣਗੇ ਕਿ ਆਪਣੀ ਜਿ਼ੰਦਗੀ ਵਿੱਚ ਤੁਸੀਂ ਕਿੰਨੀ ਵਾਰੀ ਕੋਈ ਕੰਮ ਇਸ ਲਈ ਕੀਤਾ ਹੈ ਕਿ ਤੁਸੀਂ ਡਰੇ ਹੋਏ ਸੀ ਤੇ ਇਸ ਫੈਸਲੇ ਕਾਰਨ ਤੁਹਾਨੂੰ ਚੰਗੇ ਨਤੀਜੇ ਵੀ ਮਿਲੇ? ਇਹ ਵੀ ਦੱਸੋ ਕਿ ਕਿੰਨੀ ਵਾਰੀ ਤੁਸੀਂ ਹੌਸਲਾ ਕਰਕੇ ਅਜਿਹਾ ਫੈਸਲਾ ਕੀਤਾ ਹੈ ਜਿਹੜਾ ਤੁਹਾਡੇ ਲਈ ਅਸਲ ਵਿੱਚ ਚੰਗਾ ਹੈ ਤੇ ਜਿਸ ਨੇ ਤੁਹਾਡੀ ਜਿ਼ੰਦਗੀ ਬਿਹਤਰ ਬਣਾ ਦਿੱਤੀ।
ਇਨ੍ਹਾਂ ਚੋਣਾਂ ਵਿੱਚ ਵੀ ਇਹੋ ਗੱਲ ਹੈ। ਜੇ ਤੁਸੀਂ ਡਰ ਕਾਰਨ ਆਪਣਾ ਫੈਸਲਾ ਕਰਦੇ ਹੋਂ ਤਾਂ ਤੁਹਾਨੂੰ ਉਹੋ ਜਿਹੇ ਹੀ ਨਮੋਸ਼ੀ ਭਰੇ ਨਤੀਜਿਆਂ ਦਾ ਸਾਹਮਣਾ ਕਰਨਾ ਹੋਵੇਗਾ ਪਰ ਜੇ ਤੁਸੀਂ ਅਜਿਹੇ ਸ਼ਖਸ ਦੀ ਚੋਣ ਕਰਦੇ ਹੋਂ ਜਿਸ ਨੂੰ ਤੁਸੀਂ ਦਿਲ ਤੋਂ ਪਸੰਦ ਕਰਦੇ ਹੋਂ ਤੇ ਜਿਹੜਾ ਤੁਹਾਡੇ ਸੁਪਨਿਆਂ ਨੂੰ ਸਾਕਾਰ ਕਰਨ ਵਿੱਚ ਮਦਦ ਕਰੇਗਾ ਤਾਂ ਤੁਹਾਨੂੰ ਵਧੀਆ ਨਤੀਜੇ ਮਿਲਣਗੇ। ਅਸੀਂ ਘੱਟ ਉੱਤੇ ਸਮਝੌਤਾ ਕਰਕੇ ਵਧੀਆ ਨਤੀਜੇ ਹਾਸਲ ਨਹੀਂ ਕਰ ਸਕਦੇ। ਬਹਿਸ ਦੌਰਾਨ ਟਰੂਡੋ ਤੇ ਸ਼ੀਅਰ ਉੱਤੇ ਟਿੱਪਣੀ ਕਰਦਿਆਂ ਜਗਮੀਤ ਸਿੰਘ ਨੇ ਆਖਿਆ ਕਿ ਵੋਟਰਾਂ ਨੂੰ ਮਿਸਟਰ ਡਿਲੇਅ ਤੇ ਮਿਸਟਰ ਡਿਨਾਇ ਵਿੱਚੋਂ ਇੱਕ ਦੀ ਚੋਣ ਕਰਨ ਦੀ ਲੋੜ ਨਹੀਂ ਹੈ। ਇਸ ਇੱਕ ਟਿੱਪਣੀ ਦਾ ਲੋਕਾਂ ਉੱਤੇ ਵੀ ਕਾਫੀ ਅਸਰ ਪਿਆ।