ਟੋਰਾਂਟੋ, 8 ਅਕਤੂਬਰ (ਪੋਸਟ ਬਿਊਰੋ) : ਟੋਰਾਂਟੋ ਵਿੱਚ ਮਸ਼ਹੂਰ ਸੀਰੀਆਈ ਰੈਸਟੋਰੈਂਟ ਦੇ ਮਾਲਕਾਂ ਦਾ ਕਹਿਣਾ ਹੈ ਕਿ ਪਿਛਲੇ ਹਫਤੇ ਉਨ੍ਹਾਂ ਦੇ ਪਰਿਵਾਰ ਤੇ ਸਟਾਫ ਨੂੰ ਨਫਰਤ ਨਾਲ ਭਰੇ ਸੁਨੇਹੇ ਦੇ ਨਾਲ ਨਾਲ ਜਾਨੋਂ ਮਾਰਨ ਦੀਆਂ ਮਿਲ ਰਹੀਆਂ ਧਮਕੀਆਂ ਕਾਰਨ ਉਹ ਸਥਾਈ ਤੌਰ ਉੱਤੇ ਆਪਣੀ ਇਹ ਦੁਕਾਨ ਬੰਦ ਕਰਨ ਜਾ ਰਹੇ ਹਨ।
ਪਿੱਛੇ ਜਿਹੇ ਕੈਨੇਡਾ ਮਾਈਗ੍ਰੇਟ ਹੋਏ ਸੀਰੀਆਈ ਪਰਿਵਾਰ ਵੱਲੋਂ ਚਲਾਏ ਜਾ ਰਹੇ ਕੁਈਨ ਵੈਸਟ ਉੱਤੇ ਸਥਿਤ ਰੈਸਟੋਰੈਂਟ ਸੂਫੀਜ਼ ਨੂੰ ਉਸ ਸਮੇਂ ਤੋਂ ਨਫਰਤ ਭਰੇ ਸੁਨੇਹੇ ਮਿਲ ਰਹੇ ਹਨ ਜਦੋਂ ਤੋਂ ਰੈਸਟੋਰੈਂਟ ਮਾਲਕਾਂ ਦਾ ਲੜਕਾ ਹੈਮਿਲਟਨ ਵਿੱਚ ਹੋਏ ਮੈਕਸਿਮ ਬਰਨੀਅਰ ਦੀ ਪੀਪਲਜ਼ ਪਾਰਟੀ ਆਫ ਕੈਨੇਡਾ (ਪੀਪੀਸੀ) ਦੇ ਫੰਡਰੇਜ਼ਰ ਸਮਾਰੋਹ ਵਿੱਚ ਇੱਕ ਘਟਨਾ ਵਿੱਚ ਸ਼ਾਮਲ ਹੋਇਆ। ਆਨਲਾਈਨ ਸਰਕੂਲੇਟ ਹੋ ਰਹੇ ਇੱਕ ਵੀਡੀਓ ਵਿੱਚ ਨਜ਼ਰ ਆ ਰਿਹਾ ਹੈ ਕਿ 29 ਸਤੰਬਰ ਨੂੰ ਹੋਏ ਇਸ ਈਵੈਂਟ ਵਿੱਚ ਮੋਹਾਕ ਕਾਲਜ ਦੇ ਬਾਹਰ ਮੁਜ਼ਾਹਰਾਕਾਰੀਆਂ ਵੱਲੋਂ ਇੱਕ ਬਜ਼ੁਰਗ ਮਹਿਲਾ ਨੂੰ ਤੰਗ ਪਰੇਸ਼ਨ ਕੀਤਾ ਗਿਆ।
ਮੁਜ਼ਾਹਰਾਕਾਰੀਆਂ ਵੱਲੋਂ ਉਸ ਮਹਿਲਾ ਨੂੰ ਇਮਾਰਤ ਵਿੱਚ ਦਾਖਲ ਹੋਣ ਤੋਂ ਰੋਕਿਆ ਗਿਆ ਤੇ ਕੁੱਝ ਮੁਜ਼ਾਹਰਾਕਾਰੀਆਂ ਨੇ ਤਾਂ ਉਸ ਬਜ਼ੁਰਗ ਮਹਿਲਾ ਨੂੰ ਨਾਜ਼ੀਆਂ ਦਾ ਕੂੜਾ ਵੀ ਦੱਸਿਆ। ਹੈਮਿਲਟਨ ਪੁਲਿਸ ਨੇ ਵੀ ਬਾਅਦ ਵਿੱਚ ਇਸ ਗੱਲ ਦੀ ਪੁਸ਼ਟੀ ਕੀਤੀ ਕਿ ਉਹ ਇਸ ਮਾਮਲੇ ਦੀ ਜਾਂਚ ਕਰ ਰਹੇ ਹਨ ਤੇ ਉਨ੍ਹਾਂ ਆਖਿਆ ਕਿ ਇਸ ਸਬੰਧ ਵਿੱਚ ਚਾਰਜਿਜ਼ ਵੀ ਪੈਂਡਿੰਗ ਪਏ ਹਨ। ਇਸ ਘਟਨਾ ਦਾ ਪਤਾ ਲੱਗਣ ਉੱਤੇ ਬਰਨੀਅਰ ਵੱਲੋਂ ਮਹਿਲਾ ਦੇ ਹੱਕ ਵਿੱਚ ਕਈ ਟਵੀਟ ਕੀਤੇ ਗਏ। ਉਨ੍ਹਾਂ ਟਵੀਟ ਵਿੱਚ ਮਹਿਲਾ ਦਾ ਸ਼ੁਕਰੀਆ ਅਦਾ ਕਰਦਿਆਂ ਲਿਖਿਆ ਕਿ ਆਜ਼ਾਦ ਖਿਆਲ ਸੁਣਨ ਲਈ ਖੜ੍ਹੇ ਹੋਣ ਵਾਸਤੇ ਤੁਹਾਡਾ ਬਹੁਤ ਬਹੁਤ ਧੰਨਵਾਦ। ਸਾਨੂੰ ਆਪਣੇ ਦੇਸ਼ ਨੂੰ ਮਜ਼ਬੂਤ ਤੇ ਆਜ਼ਾਦ ਰੱਖਣ ਲਈ ਤੁਹਾਡੇ ਵਰਗੇ ਦਲੇਰ ਲੋਕਾਂ ਦੀ ਲੋੜ ਹੈ।
ਕਈ ਦਿਨਾਂ ਬਾਅਦ ਫੇਸਬੁੱਕ ਉੱਤੇ ਪਬਲਿਸ਼ ਕੀਤੇ ਗਏ ਮੁਆਫੀਨਾਮੇ ਵਿੱਚ ਰੈਸਟੋਰੈਂਟ ਨੇ ਇਸ ਗੱਲ ਦੀ ਪੁਸ਼ਟੀ ਕੀਤੀ ਕਿ ਉਨ੍ਹਾਂ ਦਾ ਲੜਕਾ ਅੱਲਾ ਵੀ ਮੁਜ਼ਾਹਰਾਕਾਰੀਆਂ ਵਿੱਚੋਂ ਇੱਕ ਸੀ। ਇਸ ਮੁਆਫੀਨਾਮੇ ਵਿੱਚ ਆਖਿਆ ਗਿਆ ਹੈ ਕਿ ਅੱਲਾ ਨੂੰ ਇਸ ਗੱਲ ਦਾ ਪਛਤਾਵਾ ਹੈ ਕਿ ਉਹ ਇਸ ਤਰ੍ਹਾਂ ਦੀ ਘਟਨਾ ਵਾਪਰਨ ਸਮੇਂ ਨਾ ਤਾਂ ਪਾਸੇ ਹੋ ਸਕਿਆ ਤੇ ਨਾ ਹੀ ਉਸ ਮਹਿਲਾ ਖਿਲਾਫ ਹੋ ਰਹੇ ਗਾਲੀ ਗਲੌਜ ਖਿਲਾਫ ਖੜ੍ਹਾ ਹੋ ਸਕਿਆ। ਇਸ ਲਈ ਉਹ ਨਿਜੀ ਤੌਰ ਉੱਤੇ ਮਹਿਲਾ ਤੋਂ ਮੁਆਫੀ ਮੰਗਣੀ ਚਾਹੁੰਦਾ ਹੈ। ਪਰਿਵਾਰ ਨੇ ਇਹ ਵੀ ਲਿਖਿਆ ਕਿ ਉਨ੍ਹਾਂ ਦੇ ਲੜਕੇ ਨੇ ਨਾ ਹੀ ਜ਼ੁਬਾਨੀ ਤੇ ਨਾ ਹੀ ਫਿਜ਼ੀਕਲੀ ਮਹਿਲਾ ਉੱਤੇ ਹਮਲਾ ਕੀਤਾ।
ਪਰਿਵਾਰ ਨੇ ਆਪਣੇ ਇਨਸਟਾਗ੍ਰਾਮ ਵਾਲੇ ਪੇਜ ਉੱਤੇ ਲਿਖਿਆ ਕਿ ਸਾਡਾ ਪਰਿਵਾਰ ਕਦੇ ਵੀ ਨਫਰਤ, ਹਿੰਸਾ ਜਾਂ ਕਿਸੇ ਨੂੰ ਤੰਗ ਪਰੇਸ਼ਾਨ ਕਰਨ ਦੇ ਹੱਕ ਵਿੱਚ ਨਹੀਂ ਹੈ। ਅਸੀਂ ਸ਼ਾਂਤੀ, ਸਮਾਨਤਾ ਤੇ ਸਾਰੇ ਮਨੁੱਖਾਂ ਲਈ ਵਿਚਾਰ ਪ੍ਰਗਟਾਉਣ ਦੀ ਆਜ਼ਾਦੀ ਚਾਹੁੰਦੇ ਹਾਂ। ਪਰਿਵਾਰ ਨੇ ਦੱਸਿਆ ਕਿ ਪਿਛਲੇ ਹਫਤੇ ਤੋਂ ਉਨ੍ਹਾਂ ਨੂੰ ਮਿਲ ਰਹੇ ਨਫਰਤ ਭਰੇ ਸੁਨੇਹਿਆਂ ਤੇ ਮੌਤ ਦੀਆਂ ਧਮਕੀਆਂ ਕਾਰਨ ਉਹ ਇਹ ਰੈਸਟੋਰੈਂਟ ਬੰਦ ਕਰਨ ਲਈ ਮਜਬੂਰ ਹਨ। ਉਹ ਆਪਣੇ ਪਰਿਵਾਰ ਤੇ ਸਟਾਫ ਨੂੰ ਨੁਕਸਾਨ ਨਹੀਂ ਹੋਣ ਦੇਣਾ ਚਾਹੁੰਦੇ। ਮੰਗਲਵਾਰ ਸ਼ਾਮ ਨੂੰ ਅਲਸੂਫੀ ਪਰਿਵਾਰ ਨੇ ਇੱਕ ਹੋਰ ਬਿਆਨ ਜਾਰੀ ਕਰਕੇ ਆਖਿਆ ਕਿ ਸ਼ੁੱਕਰਵਾਰ ਨੂੰ ਉਨ੍ਹਾਂ ਦੇ ਲੜਕੇ ਉੱਤੇ ਹਮਲਾ ਕੀਤਾ ਗਿਆ ਤੇ ਇਸ ਤੋਂ ਬਾਅਦ ਹੀ ਉਨ੍ਹਾਂ ਆਪਣਾ ਰੈਸਟੋਰੈਂਟ ਬੰਦ ਕਰਨ ਦਾ ਫੈਸਲਾ ਕੀਤਾ ਹੈ।