ਦੋਹਾ, 2 ਅਕਤੂਬਰ (ਪੋਸਟ ਬਿਊਰੋ)- ਵਰਲਡ ਐਥਲੈਟਿਕਸ ਚੈਂਪੀਅਨਸ਼ਿਪ ਦੇ ਦੌਰਾਨ ਰੂਸ ਦੀ ਮਹਿਲਾ ਹਾਈ ਜੰਪਰ ਮਾਰੀਆ ਲਾਸਿਤਸਕਿਨੀ ਨੇ ਲਗਾਤਾਰ ਤੀਸਰਾ ਗੋਲਡ ਜਿੱਤਿਆ ਹੈ ਅਤੇ ਉਹ ਚੈਂਪੀਅਨਸ਼ਿਪ ਵਿੱਚ ਮੈਨਜ਼ ਅਤੇ ਵਿਮਨਜ਼ ਕੈਟਾਗਰੀ ਵਿੱਚ ਤਿੰਨ ਗੋਲਡ ਜਿੱਤਣ ਵਾਲੀ ਪਹਿਲੀ ਖਿਡਾਰੀ ਬਣ ਗਈ ਹੈ।
ਰੂਸ ਦੀ ਐਥਲੈਟਿਕਸ ਫੈਡਰੇਸ਼ਨ ਉੱਤੇ ਪਾਬੰਦੀ ਹੋਣ ਕਾਰਨ ਮਾਰੀਆ ਨਿਊਟ੍ਰਲ ਖਿਡਾਰੀ ਦੇ ਰੂਪ ਵਿੱਚ ਉਤਰੀ ਸੀ। ਇਸ ਦੇ ਪਹਿਲਾਂ ਉਹ 2015 ਅਤੇ 2017 ਵਿੱਚ ਵੀ ਵਰਲਡ ਚੈਂਪੀਅਨਸ਼ਿਪ ਵਿੱਚ ਗੋਲਡ ਮੈਡਲ ਜਿੱਤ ਚੁੱਕੀ ਹੈ। 26 ਸਾਲ ਦੀ ਮਾਰੀਆ ਨੇ 2.04 ਮੀਟਰ ਦੀ ਛਲਾਂਗ ਲਾਈ। ਯੂਕਰੇਨ ਦੀ 18 ਸਾਲ ਦੀ ਯਾਰੋਸਲਾਵਾ ਨੇ ਵੀ ਉਸੇ ਵਾਂਗ 2.04 ਮੀਟਰ ਛਲਾਂਗ ਲਾਈ ਸੀ, ਪਰ ਹਰ ਹਾਈਟ ਨੂੰ ਕਲੀਅਰ ਕਰਦੇ ਜਾਣ ਕਾਰਨ ਮਾਰੀਆ ਨੂੰ ਗੋਲਡ ਦਿੱਤਾ ਗਿਆ। ਯਾਰੋਸਲਾਵਾ ਨੂੰ ਸਿਲਵਰ ਮਿਲਿਆ। ਅਮਰੀਕਾ ਦੀ ਵਾਸਤੀ ਕੁਨਿੰਘਮ ਨੇ ਤਾਂਬੇ ਦਾ ਮੈਡਲ ਜਿੱਤਿਆ। ਜਿੱਤ ਦੇ ਬਾਅਦ ਮਾਰੀਆ ਨੇ ਕਿਹਾ ਕਿ ਪੂਰਾ ਦੇਸ਼ ਸੋਚ ਰਿਹਾ ਸੀ ਕਿ ਮੈਂ ਇਥੇ ਗੋਲਡ ਮੈਡਲ ਜਿੱਤਾਂ। ਇਸ ਕਾਰਨ ਮੇਰੇ 'ਤੇ ਥੋੜ੍ਹਾ ਦਬਾਅ ਵੀ ਸੀ। ਹਰ ਜੰਪ ਦੇ ਦੌਰਾਨ ਮੈਨੂੰ ਪ੍ਰੇਸ਼ਾਨੀ ਹੋਈ, ਪਰ ਇਹ ਜਿੱਤ ਮੇਰੇ ਲਈ ਇਤਿਹਾਸਕ ਹੈ। ਮੈਂ ਅਗਲੇ ਸਾਲ ਟੋਕੀਓ ਓਲੰਪਿਕ ਵਿੱਚ ਵੀ ਆਪਣੇ ਇਸ ਪ੍ਰਦਰਸ਼ਨ ਨੂੰ ਬਰਕਰਾਰ ਰੱਖਣਾ ਚਾਹਾਂਗੀ।