ਅੰਮ੍ਰਿਤਸਰ, 18 ਮਈ (ਪੋਸਟ ਬਿਊਰੋ)- ਇੰਟਰਨੈਸ਼ਨਲ ਚੈੱਕ ਪੋਸਟ (ਆਈ ਸੀ ਪੀ) ਅਟਾਰੀ ਬਾਰਡਰ 'ਤੇ ਕਸਟਮ ਵਿਭਾਗ ਦੀ ਟੀਮ ਨੇ ਕਰੋੜਾਂ ਰੁਪਏ ਦੇ ਅਮਰੀਕਨ ਅਖਰੋਟਾਂ ਦੀ ਇੱਕ ਖੇਪ ਜ਼ਬਤ ਕੀਤੀ ਹੈ।
ਪਤਾ ਲੱਗਾ ਹੈ ਕਿ ਆਮ ਕਰ ਕੇ ਭਾਰਤੀ ਵਪਾਰੀ ਅਫਗਾਨਿਸਤਾਨ ਦਾ ਡਰਾਈ ਫਰੂਟ ਇੰਪੋਰਟ ਕਰਦੇ ਹਨ, ਜਿਸ ਉਤੇ ਭਾਰਤ ਸਰਕਾਰ ਵੱਲੋਂ ਕਸਟਮ ਡਿਊਟੀ ਜ਼ੀਰੋ ਹੈ। ਇਹ ਡਰਾਈ ਫਰੂਟ ਪਾਕਿਸਤਾਨ ਦੇ ਰਸਤੇ ਅਟਾਰੀ ਬਾਰਡਰ 'ਤੇ ਆਉਂਦਾ ਹੈ। ਇਸ ਦੀ ਤੁਲਨਾ ਵਿੱਚ ਅਮਰੀਕਾ ਦੇ ਅਖਰੋਟ 'ਤੇ ਕੇਂਦਰ ਸਰਕਾਰ ਵੱਲੋਂ 100 ਫੀਸਦੀ ਕਸਟਮ ਡਿਊਟੀ ਲਾਈ ਗਈ ਹੈ। ਕਸ਼ਮੀਰ ਅਤੇ ਦਿੱਲੀ ਦੇ ਕੁਝ ਤਸਕਰਾਂ ਨੇ ਅਫਗਾਨੀ ਡਰਾਈ ਫਰੂਟ ਪੈਕਿੰਗ ਵਿੱਚ ਅਮਰੀਕਨ ਅਖਰੋਟ ਦੀ ਖੇਪ ਨੂੰ ਅਟਾਰੀ ਰਸਤੇ ਭੇਜ ਦਿੱਤਾ, ਜਿਸ ਨੂੰ ਅਸਿਸਟੈਂਟ ਕਮਿਸ਼ਨਰ ਕਸਟਮ ਬਸੰਤ ਕੁਮਾਰ ਦੀ ਟੀਮ ਨੇ ਟਰੇਸ ਕਰ ਲਿਆ। ਇਸ ਮੌਕੇ ਕਸਟਮ ਵਿਭਾਗ ਦੀ ਟੀਮ ਨੇ ਕਸ਼ਮੀਰ ਦੇ ਇਕ ਵਪਾਰੀ ਨੂੰ ਗ੍ਰਿਫਤਾਰ ਕੀਤਾ ਤੇ ਦਿੱਲੀ ਦੇ ਵਪਾਰੀਆਂ ਦੀ ਗ੍ਰਿਫਤਾਰੀ ਲਈ ਕਸਟਮ ਵਿਭਾਗ ਦੀ ਟੀਮ ਛਾਪੇਮਾਰੀ ਕਰ ਰਹੀ ਹੈ। ਜਾਣਕਾਰ ਸੂਤਰਾਂ ਅਨੁਸਾਰ ਕਰੋੜਾਂ ਰੁਪਏ ਦੀ ਕਸਟਮ ਡਿਊਟੀ ਦੀ ਚੋਰੀ ਦੀ ਇਸ ਖੇਡ ਵਿੱਚ 10 ਲੋਕ ਸ਼ਾਮਲ ਹਨ, ਜਿਨ੍ਹਾਂ ਦੀ ਜਲਦੀ ਹੀ ਗ੍ਰਿਫਤਾਰੀ ਹੋ ਸਕਦੀ ਹੈ।