ਨਵੀਂ ਦਿੱਲੀ, 14 ਫਰਵਰੀ (ਪੋਸਟ ਬਿਊਰੋ)- ਮੌਜੂਦਾ ਲੋਕ ਸਭਾ ਦੇ ਆਖਰੀ ਸੈਸ਼ਨ (ਬਜਟ ਸੈਸ਼ਨ) ਦੌਰਾਨ ਵਿਵਾਦਤ ਨਾਗਰਿਕਤਾ ਸੋਧ ਬਿੱਲ ਤੇ ਤਿੰਨ ਤਲਾਕ ਸਬੰਧੀ ਬਿੱਲ ਰਾਜ ਸਭਾ 'ਚ ਪਾਸ ਨਾ ਕਰਵਾਏ ਜਾ ਸਕਣ ਕਾਰਨ ਪ੍ਰਭਾਵਹੀਣ ਹੋ ਜਾਣੇ ਤੈਅ ਹਨ। ਦੋਵੇਂ ਬਿੱਲ ਲੋਕ ਸਭਾ ਵਿੱਚੋਂ ਪਾਸ ਹੋ ਚੁੱਕੇ ਹਨ, ਪਰ ਰਾਜ ਸਭਾ ਵਿੱਚ ਬਜਟ ਸੈਸ਼ਨ ਦੌਰਾਨ ਕਾਰਵਾਈ 'ਚ ਲਗਾਤਾਰ ਅੜਿੱਕਾ ਪੈਣ ਕਾਰਨ ਇਨ੍ਹਾਂ ਨੂੰ ਰਾਜ ਸਭਾ ਵਿੱਚੋਂ ਪਾਸ ਨਹੀਂ ਕਰਵਾਇਆ ਜਾ ਸਕਿਆ।
ਤਿੰਨ ਜੂਨ ਨੂੰ ਇਸ ਲੋਕ ਸਭਾ ਦਾ ਕਾਰਜਕਾਲ ਖਤਮ ਹੋਣ 'ਤੇ ਇਹ ਦੋਵੇਂ ਬਿੱਲ ਪ੍ਰਭਾਵਹੀਣ ਹੋ ਜਾਣਗੇ। ਇਸ ਦੇ ਸੰਬੰਦ ਵਿੱਚ ਪਾਰਲੀਮੈਂਟਰੀ ਨਿਯਮਾਂ ਅਨੁਸਾਰ ਰਾਜ ਸਭਾ 'ਚ ਪਾਸ ਕੀਤੇ ਗਏ ਬਿੱਲ ਲਟਕੇ ਰਹਿਣ ਦੀ ਸਥਿਤੀ 'ਚ ਲੋਕ ਸਭਾ ਭੰਗ ਹੋਣ ਉੱਤੇ ਪ੍ਰਭਾਵਹੀਣ ਨਹੀਂ ਹੁੰਦੇ, ਪਰ ਜੇ ਲੋਕ ਸਭਾ ਵਿੱਚੋਂ ਪਾਸ ਬਿੱਲ ਰਾਜ ਸਭਾ 'ਚੋਂ ਪਾਸ ਨਹੀਂ ਹੋ ਪਾਉਂਦੇ ਤਾਂ ਉਹ ਲੋਕ ਸਭਾ ਭੰਗ ਹੋਣ 'ਤੇ ਪ੍ਰਭਾਵਹੀਣ ਹੋ ਜਾਂਦੇ ਹਨ।