ਨਵੀਂ ਦਿੱਲੀ, 27 ਨਵੰਬਰ (ਪੋਸਟ ਬਿਊਰੋ)- ਦਿੱਲੀ ਵਿਧਾਨ ਸਭਾ ਨੇ ਕੱਲ੍ਹ ਇਸ ਦੇ ਇੱਕ ਦਿਨਾਂ ਵਿਸ਼ੇਸ਼ ਸੈਸ਼ਨ ਦੌਰਾਨ ਸਦਨ ਦੀ ਕਾਵਰਈ ਵਿੱਚ ਰੁਕਾਵਟ ਪਾਉਣ ਲਈ ਭਾਰਤੀ ਜਨਤਾ ਪਾਰਟੀ ਦੇ ਵਿਧਾਇਕ ਜਤਿੰਦਰ ਮਹਾਜਨ ਨੂੰ ਸਸਪੈਂਡ ਕਰ ਦਿੱਤਾ ਅਤੇ ਦੋ ਹੋਰ ਭਾਜਪਾ ਵਿਧਾਇਕਾਂ ਅਨਿਲ ਬਾਜਪਾਈ ਅਤੇ ਮੋਹਨ ਸਿੰਘ ਬਿਸ਼ਤ ਨੂੰ ਸਦਨ ਤੋਂ ਕੱਢ ਦਿੱਤਾ। ਭਾਜਪਾ ਦੇ ਹੋਰ ਵਿਧਾਇਕਾਂ ਨੇ ਸਸਪੈਂਡ ਕੀਤੇ ਅਤੇ ਬਾਹਰ ਕੱਢੇ ਸਾਥੀਆਂ ਦੇ ਸਮਰਥਨ ਵਿੱਚ ਕਾਰਵਾਈ ਦਾ ਬਾਈਕਾਟ ਕਰਨ ਲਈ ਸਦਨ ਤੋਂ ਵਾਕਆਊਟ ਕਰ ਦਿੱਤਾ।
ਪਤਾ ਲੱਗਾ ਹੈ ਕਿ ਕੱਲ੍ਹ ਜਦੋਂ ਹੀ ਵਿਸ਼ੇਸ਼ ਸੈਸ਼ਨ ਦੀ ਕਾਰਵਾਈ ਸ਼ੁਰੂ ਹੋਈ, ਭਾਜਪਾ ਵਿਧਾਇਕਾਂ ਨੇ ਨਵੀਂ ਸ਼ਰਾਬ ਨੀਤੀ, ਸ਼ਹਿਰ ਵਿੱਚ ਵਧਦੇ ਹਵਾ ਪ੍ਰਦੂਸ਼ਣ ਅਤੇ ਤੇਲ ਉੱਤੇ ਉਚੇ ਵੈਟ ਵਰਗੇ ਮੁਦਿਆਂ ਉੱਤੇਬਹਿਸ ਕਰਾਉਣ ਦੀ ਮੰਗ ਕੀਤੀ। ਵਿਧਾਨ ਸਭਾ ਸਪੀਕਰ ਰਾਮ ਨਿਵਾਸ ਗੋਇਲ ਨੇ ਇਨ੍ਹਾਂ ਮੁਦਿਆਂ ਉੱਤੇ ਚਰਚਾ ਤੋਂ ਇਨਕਾਰ ਕਰਦੇ ਹੋਏ ਕਿਹਾ ਕਿ ਇੱਕ ਦਿਨਾਂ ਸੈਸ਼ਨ ਵਿਸ਼ੇਸ਼ ਏਜੰਡੇ ਲਈ ਬੁਲਾਇਆ ਗਿਆ ਹੈ ਅਤੇ ਸਿਰਫ਼ ਏਜੰਡੇ ਵਿੱਚ ਸੂਚੀਬੱਧ ਵਿਸ਼ਿਆਂ ਉੱਤੇ ਹੀ ਚਰਚਾ ਕੀਤੀ ਜਾਵੇਗੀ। ਉਨ੍ਹਾਂ ਕਿਹਾ,‘‘ਕਿਸੇ ਹੋਰ ਚਰਚਾ ਦੀ ਪ੍ਰਵਾਨਗੀ ਨਹੀਂ ਦਿੱਤੀ ਜਾਵੇਗੀ।''ਇਹ ਸੁਣਦੇ ਹੀ ਭਾਜਪਾ ਵਿਧਾਇਕ ਸਰਾਕਰ ਵਿਰੋਧੀ ਨਾਹਰੇ ਲਾਉਣ ਲੱਗੇ। ਸਪੀਕਰ ਰਾਮ ਨਿਵਾਸ ਗੋਇਲ ਨੇ ਜਤਿੰਦਰ ਮਹਾਜਨ, ਮੋਹਨ ਸਿੰਘ ਬਿਸ਼ਤ ਅਤੇ ਅਨਿਲ ਬਾਜਪਾਈ ਨੂੰ ਅਪੀਲ ਕੀਤੀ ਕਿ ਉਹ ਬੈਠ ਜਾਣ ਅਤੇ ਸਦਨ ਦੀ ਕਾਰਵਾਈ ਚੱਲਣ ਦੇਣ। ਉਨ੍ਹਾਂ ਹੋਰ ਭਾਜਪਾ ਵਿਧਾਇਕਾਂ ਨੂੰ ਚਿਤਾਵਨੀ ਦਿੱਤੀ ਕਿ ਉਹ ਸ਼ਾਂਤ ਹੋ ਜਾਣ, ਨਹੀਂ ਤਾਂ ਹੁਕਮਾਂ ਦੀ ਉਲੰਘਣਾਂ ਕਰਨ ਉੱਤੇ ਉਹ ਵੀ ਬਾਹਰ ਕੱਢੇ ਜਾਣ ਲਈ ਤਿਆਰ ਰਹਿਣ, ਪਰ ਭਾਜਪਾ ਵਿਧਾਇਕ ਨਹੀਂ ਮੰਨੇ। ਇਸ ਤੋਂ ਬਾਅਦ ਵਿਧਾਨ ਸਭਾ ਸਪੀਕਰ ਨੇ ਮਾਰਸ਼ਲਾਂ ਨੂੰ ਮੋਹਨ ਸਿੰਘ ਬਿਸ਼ਟ ਅਤੇ ਅਨਿਲ ਬਾਜਪਾਈ ਨੂੰ ਸਦਨ ਤੋਂ ਕੱਢਣ ਦਾ ਹੁਕਮ ਦਿੱਤਾ। ਆਵਾਜਾਈ ਮੰਤਰੀ ਕੈਲਾਸ਼ ਗਹਿਲੋਤ ਨੇ ਸਦਨ ਦੇ ਪੂਰੇ ਸੈਸ਼ਨ ਤੋਂ ਰੋਹਤਾਸ ਨਗਰ ਤੋਂ ਵਿਧਾਇਕ ਮਹਾਜਨ ਨੂੰ ਸਸਪੈਂਡ ਕਰਨ ਦਾ ਮਤਾ ਪੇਸ਼ ਕੀਤਾ, ਜਿਸ ਨੂੰ ਪਾਸ ਕਰ ਦਿੱਤਾ ਗਿਆ।ਵਿਰੋਧੀ ਧਿਰ ਭਾਜਪਾ ਨੇ ਸੱਤਾਧਾਰੀ ਆਮ ਆਦਮੀ ਪਾਰਟੀ ਉੱਤੇ ਦਿੱਲੀ ਵਿੱਚ ਹਵਾ ਪ੍ਰਦੂਸ਼ਣ, ਸ਼ਰਾਬ ਨੀਤੀ ਤੇ ਸਥਾਨਕ ਕਿਸਾਨਾਂ ਦੀ ਸਥਿਤੀ ਦੇ ਮੁਦਿਆਂ ਉੱਤੇ ਚਰਚਾ ਤੋਂ ਭੱਜਣ ਦਾ ਦੋਸ਼ ਲਾਇਆ। ਦਿੱਲੀ ਵਿਧਾਨ ਸਭਾ ਨੇ ਕੱਲ੍ਹ ਬਿਲ ਪਾਸ ਕਰ ਕੇ ਤਿੰਨੇ ਖੇਤੀ ਕਾਨੂੰਨ ਵਾਪਸ ਲੈਣ, ਅੰਦੋਲਨ ਦੌਰਾਨ ਸ਼ਹੀਦ ਹੋਏ 700 ਕਿਸਾਨਾਂ ਦੇ ਪਰਵਾਰਾਂ ਨੂੰ ਮੁਆਵਜ਼ਾ ਦੇਣ ਤੇ ਫ਼ਸਲ ਦਾ ਘੱਟੋ ਘੱਟ ਸਮਰਥਨ ਮੁੱਲ (ਐਮ ਐਸ ਪੀ) ਦੀ ਕਾਨੂੰਨੀ ਗਾਰੰਟੀ ਦਿੱਤੇ ਜਾਣ ਦੀ ਮੰਗ ਕੀਤੀ ਹੈ, ਜਿਸ ਨੂੰ ਭਾਜਪਾ ਨੇ ਰਾਜਸੀ ਕਾਰਨ ਕਿਹਾ ਹੈ।