ਨਵੀਂ ਦਿੱਲੀ, 18 ਅਕਤੂਬਰ (ਪੋਸਟ ਬਿਊਰੋ)- ਕੇਰਲ ਵਿੱਚ ਲਗਾਤਾਰ ਹੁੰਦੀ ਭਾਰੀ ਬਾਰਸ਼ ਕਾਰਨ ਸਭ ਦਰਿਆ ਨੱਕੋ-ਨੱਕ ਭਰ ਗਏ ਹਨ। ਕਈ ਥਾਂ ਜ਼ਮੀਨ ਖਿਸਕਣ ਕਾਰਨ ਹਾਲਾਤ ਬੇਕਾਬੂ ਹੋ ਗਏ ਹਨ। ਕੋਟਾਯਮ ਵਿੱਚੋਂ ਨੌਂ ਲਾਸ਼ਾਂ ਮਿਲਣ ਨਾਲ ਮਰਨ ਵਾਲੇ ਲੋਕਾਂ ਦੀ ਗਿਣਤੀ ਵਧ ਕੇ 26 ਹੋ ਗਈ ਹੈ। ਪ੍ਰਸ਼ਾਸਨ ਵੱਲੋਂ ਲੋਕਾਂ ਦੀ ਮਦਦ ਲਈ ਹਰ ਸੰਭਵ ਯਤਨ ਕੀਤੇ ਜਾ ਰਹੇ ਹਨ। ਇੱਕ ਦਰਜਨ ਤੋਂ ਵੱਧ ਵਿਅਕਤੀ ਲਾਪਤਾ ਦੱਸੇ ਜਾਂਦੇ ਹਨ।
ਕੇਂਦਰੀ ਗ੍ਰਹਿ ਮੰਤਰੀ ਅਮਿਤ ਸ਼ਾਹ ਨੇ ਸਾਰੇ ਹਾਲਾਤ ਉੱਤੇ ਚਿੰਤਾ ਪ੍ਰਗਟ ਕਰਦਿਆਂ ਹਰ ਸੰਭਵ ਮਦਦ ਦਾ ਭਰੋਸਾ ਦਿੱਤਾ ਹੈ। ਉਨ੍ਹਾਂ ਨੇ ਕਿਹਾ ਕਿ ਕੇਂਦਰ ਨੇ ਹਾਲਾਤ ਉੱਤੇ ਨਜ਼ਰ ਰੱਖੀ ਹੋਈ ਹੈ।ਕੇਰਲ ਵਿੱਚ ਤਬਾਹੀ ਦੀ ਵਰਖਾ ਨੇ ਸੈਂਕੜੇ ਲੋਕਾਂ ਨੂੰ ਘਰੋਂ ਬੇਘਰ ਕਰ ਦਿੱਤਾ ਹੈ। ਮੌਸਮ ਵਿਭਾਗ ਦੇ ਮੁਤਾਬਕ ਅਰਬ ਸਾਗਰ ਵਿੱਚ ਬਣਿਆ ਲੋ-ਪ੍ਰੈਸ਼ਰ ਕੇਰਲ ਦੇ ਸਮੁੰਦਰੀ ਕੰਢੇ ਉੱਤੇ ਪਹੁੰਚ ਜਾਣ ਕਾਰਨ ਦੱਖਣੀ ਅਤੇ ਕੇਂਦਰੀ ਕੇਰਲ ਵਿੱਚ ਮੀਂਹ ਪੈਣ ਨਾਲ ਤਿ੍ਰਵਨੰਤਪੁਰਮ, ਕੋਲਮ, ਪਦਨਮਟਾਟ, ਕੋਟਾਯਮ ਅਤੇ ਇਡੁਕੀ ਵਿੱਚ ਸਭ ਦਰਿਆ ਭਰ ਗਏ ਹਨ। ਬਚਾਅ ਕਾਰਜਾਂ ਲਈ ਫੌਜ ਅਤੇ ਐਨ ਡੀ ਆਰ ਐਫ ਦੀਆਂ ਟੀਮਾਂ ਨੂੰ ਤੈਨਾਤ ਕੀਤਾ ਗਿਆ ਹੈ।ਪੱਛਮੀ ਘਾਟ ਪਰਬਤ ਲੜੀ ਦੇ ਪੈਰਾਂ ਵਿੱਚ ਇੱਕ ਬਸਤੀ ਵਿੱਚ ਕੱਲ੍ਹ ਰੋਂਦੀ-ਕੁਰਲਾਉਂਦੀ ਇੱਕ ਬਜ਼ੁਰਗ ਔਰਤ ਨੂੰ ਮੀਂਹ ਦੇ ਪਾਣੀ ਨਾਲ ਭਰੀਆਂ ਸੜਕਾਂ ਉੱਤੇ ਲੋਕਾਂ ਕੋਲੋਂ ਮਦਦ ਮੰਗਦੇ ਵੇਖਿਆ ਗਿਆ।ਉਕਤ ਬਜ਼ੁਰਗ ਔਰਤ ਦੀ ਸਾਰੀ ਉਮਰ ਦੀ ਕਮਾਈ ਹੜ੍ਹ ਦੇ ਪਾਣੀ ਵਿੱਚ ਰੁੜ੍ਹ ਗਈ ਅਤੇ ਉਹ ਬੇਘਰ ਹੋ ਗਈ। ਉਸ ਨੇ ਮੁੱਖ ਮੰਤਰੀ ਕੋਲੋਂ ਝੌਂਪੜੀ ਬਣਵਾਉਣ ਲਈ ਜ਼ਮੀਨ ਦੀ ਮੰਗ ਕੀਤੀ ਹੈ।