ਵਾਸਿੰ਼ਗਟਨ, 2 ਅਗਸਤ (ਪੋਸਟ ਬਿਊਰੋ) : ਪ੍ਰਧਾਨ ਮੰਤਰੀ ਜਸਟਿਨ ਟਰੂਡੋ ਵੱਲੋਂ ਅੱਜ ਅਮਰੀਕਾ ਦੇ ਰਾਸ਼ਟਰਪਤੀ ਜੋਅ ਬਾਇਡਨ ਨਾਲ ਫੋਨ ਉੱਤੇ ਗੱਲਬਾਤ ਕੀਤੀ ਗਈ।ਇਸ ਦੌਰਾਨ ਓਲੰਪਿਕਸ ਵਿੱਚ ਮਹਿਲਾਵਾਂ ਦੇ ਫੁੱਟਬਾਲ ਮੁਕਾਬਲੇ ਵਿੱਚ ਅਮਰੀਕਾ ਉੱਤੇ ਕੈਨੇਡਾ ਦੀ ਜਿੱਤ ਬਾਰੇ ਵੀ ਚਰਚਾ ਹੋਈ।
ਇੰਜ ਲੱਗਿਆ ਜਿਵੇਂ ਟਰੂਡੋ ਨੇ ਕੈਨੇਡਾ ਦੀ ਅਮਰੀਕਾ ਉੱਤੇ ਹੋਈ ਜਿੱਤ ਦਾ ਸਵਾਦ ਲਿਆ ਹੋਵੇ।ਦੋਵਾਂ ਆਗੂਆਂ ਨੇ ਵਪਾਰ, ਸਰਹੱਦੀ ਸਹਿਯੋਗ ਤੇ ਹੋਰਨਾਂ ਮੁੱਦਿਆਂ ਉੱਤੇ ਵੀ ਗੱਲਬਾਤ ਕੀਤੀ।ਪੂਰੀ ਤਰ੍ਹਾਂ ਵੈਕਸੀਨੇਸ਼ਨ ਕਰਵਾ ਚੁੱਕੇ ਅਮੈਰੀਕਨਜ਼ ਅਤੇ ਪਰਮਾਨੈਂਟ ਰੈਜ਼ੀਡੈਂਟਸ ਨੂੰ ਅਗਲੇ ਹਫਤੇ ਤੋਂ ਕੈਨੇਡਾ ਆਉਣ ਦੀ ਇਜਾਜ਼ਤ ਹੋਵੇਗੀ ਪਰ ਅਮਰੀਕਾ ਵੱਲੋਂ ਕੈਨੇਡੀਅਨਜ਼ ਲਈ ਅਜਿਹੀ ਕੋਈ ਸਹੂਲਤ ਨਹੀਂ ਦਿੱਤੀ ਜਾ ਰਹੀ।
ਬਾਇਡਨ ਨੇ ਅਮਰੀਕਾ ਦੇ ਬੁਨਿਆਦੀ ਢਾਂਚੇ ਉੱਤੇ ਹੋਣ ਵਾਲੇ ਖਰਚ ਵਿੱਚ ਅਮੈਰੀਕਨ ਫਰਮਜ਼ ਤੇ ਸਪਲਾਇਰਜ਼ ਨੂੰ ਪਹਿਲ ਦੇਣ ਬਾਰੇ ਆਪਣਾ ਰੁਖ਼ ਸਖ਼ਤ ਰੱਖਿਆ ਜਦਕਿ ਟਰੂਡੋ ਨੇ ਇਸ ਪਾਸੇ ਵੀ ਨਰਮੀ ਹੀ ਦਿਖਾਈ ਪਰ ਇਸ ਦੇ ਨਾਲ ਹੀ ਕੈਨੇਡਾ ਦੀ ਪੈਰਵੀ ਵੀ ਕੀਤੀ।ਇਸ ਤੋਂ ਇਲਾਵਾ ਟਰੂਡੋ ਨੇ ਕੈਨੇਡਾ ਦੀ ਮਲਕੀਅਤ ਵਾਲੀ ਤੇ ਇੱਥੋਂ ਹੀ ਆਪਰੇਟ ਕੀਤੀ ਜਾਣ ਵਾਲੀ ਕਰੌਸ-ਬਾਰਡਰ ਪਾਈਪਲਾਈਨ, ਜਿਸ ਨੂੰ ਲਾਈਨ 5 ਵੀ ਆਖਿਆ ਜਾਂਦਾ ਹੈ, ਦਾ ਮੁੱਦਾ ਵੀ ਉਠਾਇਆ। ਇਸ ਪਾਈਪਲਾਈਨ ਨੂੰ ਮਿਸ਼ੀਗਨ ਗ੍ਰੇਟ ਲੇਕਸ ਨਾਲ ਜੁੜੇ ਵਾਤਾਵਰਣ ਨੂੰ ਹੋਣ ਵਾਲੇ ਨੁਕਸਾਨ ਦੇ ਡਰੋਂ ਬੰਦ ਕਰਨਾ ਚਾਹੁੰਦਾ ਹੈ।
ਅਮਰੀਕਾ ਤੇ ਕੈਲਗਰੀ ਸਥਿਤ ਐਨਬ੍ਰਿੱਜ ਇਨਕਾਰਪੋਰੇਸ਼ਨ ਦਰਮਿਆਨ ਜਾਰੀ ਇਸ ਵਿਵਾਦ ਬਾਰੇ ਟਰੂਡੋ ਨੇ ਗੱਲਬਾਤ ਰਾਹੀਂ ਕਿਸੇ ਫੈਸਲੇ ਉੱਤੇ ਪਹੁੰਚਣ ਦਾ ਪੱਖ ਪੂਰਿਆ।ਦੋਵਾਂ ਆਗੂਆਂ ਨੇ ਇਸ ਮਾਮਲੇ ਉੱਤੇ ਨਜ਼ਰ ਰੱਖਣ ਉੱਤੇ ਸਹਿਮਤੀ ਵੀ ਪ੍ਰਗਟਾਈ।ਇਸ ਤੋਂ ਇਲਾਵਾ ਕੈਨੇਡਾ ਤੇ ਅਮਰੀਕਾ ਵੱਲੋਂ ਜੰਗਲ ਦੀ ਅੱਗ ਬਾਰੇ ਦੁਵੱਲੇ ਸਹਿਯੋਗ ਨੂੰ ਹੋਰ ਮਜ਼ਬੂਤ ਕਰਨ ਦਾ ਤਹੱਈਆ ਪ੍ਰਗਟਾਇਆ ਗਿਆ।
ਦੋਵਾਂ ਆਗੂਆਂ ਨੇ ਦਸੰਬਰ 2018 ਤੋਂ ਚੀਨ ਵੱਲੋਂ ਨਜ਼ਰਬੰਦ ਕੀਤੇ ਗਏ ਦੋ ਕੈਨੇਡੀਅਨ ਨਾਗਰਿਕਾਂ ਮਾਈਕਲ ਕੋਵਰਿਗ ਤੇ ਮਾਈਕਲ ਸਪੇਵਰ ਨੂੰ ਫੌਰੀ ਰਿਹਾਅ ਕਰਨ ਦੀ ਮੰਗ ਵੀ ਕੀਤੀ ਗਈ।