ਨਵੀਂ ਦਿੱਲੀ, 27 ਜੁਲਾਈ (ਪੋਸਟ ਬਿਊਰੋ)- ਮੋਬਾਈਲ ਅਤੇ ਇੰਟਰਨੈਟ ਅੱਜ ਲੋਕਾਂ ਦੀ ਜ਼ਿੰਦਗੀ ਦਾ ਅਹਿਮ ਹਿੱਸਾ ਬਣ ਗਿਆ ਹੈ। ਹਰ ਕੋਈ ਅੱਜ ਸਮਾਰਟਫੋਨ ਅਤੇ ਇੰਟਰਨੈਟ ਦੀ ਚਾਹਤ ਰੱਖਦਾ ਹੈ ਤੇ ਅਜਿਹਾ ਹੋਣਾ ਲਾਜ਼ਮੀ ਹੈ, ਕਿਉਂਕਿ ਸਾਰੇ ਕੰਮ ਅੱਜਕੱਲ੍ਹ ਆਨਲਾਈਨ ਹੋ ਰਹੇ ਹਨ। ਮੋਬਾਈਲ ਰੀਚਾਰਜ ਹੋਵੇ, ਪੈਸੇ ਟਰਾਂਸਫਰ ਕਰਨੇ ਹੋਣ, ਟਿਕਟ ਬੁਕ ਕਰਨੀ ਹੋਵੇ ਜਾਂ ਫਿਰ ਗੈਸ ਸਿਲੰਡਰ ਦੀ ਬੁਕਿੰਗ ਕਿਉਂ ਨਾ ਕਰਨਾ ਹੋਵੇ, ਸਾਰੇ ਕੰਮ ਸਮਾਰਟਫੋਨ ਤੋਂ ਆਸਾਨੀ ਨਾਲ ਹੋ ਰਹੇ ਹਨ। ਇਨ੍ਹਾਂ ਸਹੂਲਤਾਂ ਕਾਰਨ ਲੋਕਾਂ ਦੇ ਸਮਾਰਟਫੋਨ ਉੱਤੇ ਸਮਾਂ ਵੱਧ ਲੱਗਦਾ ਹੈ।
ਇਕ ਨਵੀਂ ਰਿਪੋਰਟ ਮੁਤਾਬਕ ਸਭ ਤੋਂ ਜ਼ਿਆਦਾ ਮੋਬਾਈਲ ਵਰਤਣ ਵਿੱਚ ਭਾਰਤੀ ਪੂਰੀ ਦੁਨੀਆ ਵਿੱਚ ਤੀਸਰੇ ਨੰਬਰ ਉੱਤੇ ਹਨ।ਜੈਡਡੀਨੈਟ ਦੀ ਰਿਪੋਰਟ ਮੁਤਾਬਕ ਮੋਬਾਈਲ ਵਰਤਣ ਵਿੱਚ ਬਰਾਜ਼ੀਲ ਦੇ ਲੋਕ ਨੰਬਰ-1 ਉੱਤੇ ਹਨ। ਬਰਾਜ਼ੀਲ ਦੇ ਲੋਕ ਰੋਜ਼ ਔਸਤਨ 5 ਘੰਟੇ ਚਾਰ ਮਿੰਟ ਮੋਬਾਈਲ ਵਰਤਦੇ ਹਨ। ਦੂਸਰੇ ਨੰਬਰ ਉੱਤੇ ਇੰਡੋਨੇਸ਼ੀਆ ਦੇ ਲੋਕ ਹਨ, ਜਿਹੜੇ ਰੋਜ਼ ਔਸਤਨ ਪੰਜ ਘੰਟੇ ਤਿੰਨ ਮਿੰਟ ਮੋਬਾਈਲ ਉੱਤੇ ਗੁਜ਼ਾਰਦੇ ਹਨ। ਸਰਵੇ ਦੀ ਇਸ ਲਿਸਟ ਵਿੱਚ ਭਾਰਤ ਦਾ ਨਾਂਅ ਤੀਸਰੇ ਨੰਬਰ ਉੱਤੇ ਹੈ। ਭਾਰਤੀ ਹਰ ਰੋਜ਼ ਔਸਤਨ-4 ਘੰਟੇ ਨੌਂ ਮਿੰਟ ਮੋਬਾਈਲ ਵਰਤਦੇ ਹਨ।
ਰਿਪੋਰਟ ਵਿੱਚ ਦੁਨੀਆ ਦੇ 10 ਦੇਸ਼ਾਂ ਨੂੰ ਸ਼ਾਮਲ ਕੀਤਾ ਗਿਆ ਹੈ। ਭਾਰਤ ਦੇ ਬਾਅਦ ਸਭ ਤੋਂ ਜ਼ਿਆਦਾ ਮੋਬਾਈਲ ਵਰਤਣ ਵਿੱਚ ਚੌਥੇ ਨੰਬਰ ਉੱਤੇ ਸਾਊਥ ਕੋਰੀਆ ਹੈ। ਇਥੋਂ ਦੇ ਲੋਕ ਰੋਜ਼ ਚਾਰ ਘੰਟੇ ਅੱਠ ਮਿੰਟ ਮੋਬਾਈਲ ਵਰਤਦੇ ਹਨ। ਪੰਜਵੇਂ ਨੰਬਰ ਉੱਤੇ ਮੈਕਸੀਕੋ ਦੇ ਲੋਕ ਔਸਤਨ ਚਾਰ ਘੰਟੇ ਸੱਤ ਮਿੰਟ ਦੇ ਨਾਲ ਹਨ। ਤੁਰਕੀ ਦੇ ਲੋਕ ਰੋਜ਼ ਚਾਰ ਘੰਟੇ ਪੰਜ ਮਿੰਟ ਮੋਬਾਈਲ ਵਰਤਦੇ ਹਨ। ਤੁਰਕੀ ਦਾ ਨਾਂਅ ਛੇਵੇਂ ਨੰਬਰ ਉੱਤੇ ਹੈ, ਇਸੇ ਤਰ੍ਹਾਂ ਚਾਰ ਘੰਟੇ ਚਾਰ ਮਿੰਟ ਨਾਲ ਜਾਪਾਨ ਸੱਤਵੇਂ, ਕੈਨੇਡਾ ਚਾਰ ਘੰਟੇ ਇੱਕ ਮਿੰਟ ਦੇ ਨਾਲ ਅੱਠਵੇਂ ਸਥਾਨ, ਅਮਰੀਕਾ ਤਿੰਨ ਘੰਟੇ ਨੌਂ ਮਿੰਟ ਦੇ ਨਾਲ 9ਵੇਂ ਅਤੇ ਬ੍ਰਿਟੇਨ ਤਿੰਨ ਘੰਟੇ ਅੱਠ ਮਿੰਟ ਦੇ ਨਾਲ 10ਵੇਂ ਸਥਾਨ ਉੱਤੇ ਹੈ।