ਨਵੀਂ ਦਿੱਲੀ, 26 ਜੁਲਾਈ (ਪੋਸਟ ਬਿਊਰੋ)- ਭਾਰਤ ਦੇ ਨੈਸ਼ਨਲ ਚਾਈਲਡ ਰਾਈਟਸ ਸੁਰੱਖਿਆ ਕਮਿਸ਼ਨ (ਐਨ ਸੀ ਪੀ ਸੀ ਆਰ) ਦੇ ਸਰਵੇ ਵਿੱਚ ਪਤਾ ਲੱਗਾ ਹੈ ਕਿ 10 ਸਾਲ ਦੀ ਉਮਰ ਦੇ 37.8 ਫੀਸਦੀ ਬੱਚਿਆਂ ਦਾ ਫੇਸਬੁੱਕ ਅਕਾਊਂਟ ਹੈ ਅਤੇ ਇਸੇ ਉਮਰ ਵਰਗ ਦੇ 24.3 ਫੀਸਦੀ ਬੱਚੇ ਇੰਸਟਾਗ੍ਰਾਮ ਉੱਤੇ ਸਰਗਰਮ ਹਨ। ਐਨ ਸੀ ਪੀ ਸੀ ਆਰ ਦਾ ਕਹਿਣਾ ਹੈ ਕਿ ਇਹ ਵੱਖ-ਵੱਖ ਸੋਸ਼ਲ ਮੀਡੀਆ ਪਲੇਟਫਾਰਮ ਵੱਲੋਂ ਤੈਅ ਸਟੈਂਡਰਡਜ਼ ਦੇ ਉਲਟ ਹੈ।
ਵਰਣਨਯੋਗ ਹੈ ਕਿ ਫੇਸਬੁਕ ਅਤੇ ਇੰਸਟਾਗ੍ਰਾਮ ਉੱਤੇ ਅਕਾਊਂਟ ਖੋਲ੍ਹਣ ਲਈ ਘੱਟੋ-ਘੱਟ ਉਮਰ 13 ਸਾਲ ਤੈਅ ਹੈ। ਮੋਬਾਈਲ ਫੋਨ ਅਤੇ ਦੂਸਰੇ ਡਿਵਾਈਸ ਦੀ ਵਰਤੋਂ ਨਾਲ ਬੱਚਿਆਂ ਉੱਤੇ ਹੋਣ ਵਾਲੇ ਅਸਰ ਬਾਰੇ ਐਨ ਸੀ ਪੀ ਸੀ ਆਰ ਨੇ ਇਹ ਸਰਵੇ ਕਰਵਾਇਆ ਹੈ, ਜਿਸ ਮੁਤਾਬਕ ਪਤਾ ਲੱਗਾ ਹੈ ਕਿ 10 ਸਾਲ ਦੀ ਉਮਰ ਦੇ ਕਰੀਬ 37.8 ਫੀਸਦੀ ਬੱਚਿਆਂ ਦਾ ਫੇਸਬੁਕ ਅਕਾਊਂਟ ਹੈ ਅਤੇ ਇਸੇ ਉਮਰ ਵਰਗ ਦੇ 24.3 ਫੀਸਦੀ ਬੱਚੇ ਇੰਸਟਾਗ੍ਰਾਮ ਉੱਤੇ ਸਰਗਰਮ ਹਨ। ਐਨ ਸੀ ਪੀ ਸੀ ਆਰ ਦੇ ਸਰਵੇ ਵਿੱਚ ਇੱਕ ਦਿਲਚਸਪ ਗੱਲ ਇਹ ਪਤਾ ਲੱਗੀ ਕਿ ਬਹੁਤੇ ਬੱਚਿਆਂ ਦੀ ਆਪਣੇ ਮਾਤਾ-ਪਿਤਾ ਦੇ ਮੋਬਾਈਲ ਫੋਨ ਦੇ ਰਾਹੀਂ ਸੋਸ਼ਲ ਮੀਡੀਆ ਤੇ ਇੰਟਰਨੈਟ ਤਕ ਪਹੁੰਚ ਹੈ। ਇਸ ਸਰਵੇ ਵਿੱਚ ਕੁੱਲ 5811 ਲੋਕ ਸ਼ਾਮਲ ਸਨ। ਇਨ੍ਹਾਂ ਵਿੱਚ 3491 ਬੱਚੇ, 1534 ਮਾਪੇ, 786 ਅਧਿਆਪਕ ਅਤੇ 60 ਸਕੂਲ ਸ਼ਾਮਲ ਸਨ।