ਟੋਰਾਂਟੋ, 14 ਮਈ (ਪੋਸਟ ਬਿਊਰੋ) : ਕੋਵਿਡ-19 ਕਾਰਨ ਟੋਰਾਂਟੋ ਦੇ ਕੁੱਝ ਭੀੜ ਭਾੜ ਵਾਲੇ ਈਵੈਂਟਸ ਨੂੰ ਇਸ ਸਾਲ ਇੱਕ ਵਾਰੀ ਫਿਰ ਰੱਦ ਕਰ ਦਿੱਤਾ ਗਿਆ ਹੈ।
ਸਿਟੀ ਆਫ ਟੋਰਾਂਟੋ ਵੱਲੋਂ ਸੁ਼ੱਕਰਵਾਰ ਨੂੰ ਇਹ ਐਲਾਨ ਕੀਤਾ ਗਿਆ ਕਿ ਉਨ੍ਹਾਂ ਵੱਲੋਂ ਲੇਬਰ ਡੇਅ, ਜੋ ਕਿ 6 ਸਤੰਬਰ ਨੂੰ ਹੈ, ਤੋਂ ਬਾਅਦ ਤੱਕ ਦੇ ਸਾਰੇ ਈਵੈਂਟਸ ਲਈ ਪਰਮਿਟ ਜਾਰੀ ਨਹੀਂ ਕੀਤੇ ਜਾਣਗੇ। ਸਿਟੀ ਦੇ ਬੁਲਾਰੇ ਬ੍ਰੈਡ ਰੌਸ ਨੇ ਇਸ ਗੱਲ ਦੀ ਪੁਸ਼ਟੀ ਕੀਤੀ ਕਿ ਇਸ ਸਬੰਧੀ ਰਸਮੀ ਐਲਾਨ ਸੁ਼ੱਕਰਵਾਰ ਨੂੰ ਕੀਤਾ ਜਾਵੇਗਾ।ਇਸ ਤੋਂ ਭਾਵ ਹੈ ਕਿ ਕੈਨੇਡੀਅਨ ਨੈਸ਼ਨਲ ਐਗਜ਼ੀਬਿਸ਼ਨ (ਸੀ ਐਨ ਈ) ਤੇ ਟੇਸਟ ਆਫ ਡੈਨਫੋਰਥ ਵਰਗੇ ਈਵੈਂਟਸ ਨੂੰ ਵੀ ਇਸ ਸਾਲ ਲਈ ਰੱਦ ਕੀਤਾ ਜਾਵੇਗਾ।
ਇਨ੍ਹਾਂ ਸਮੇਤ ਬੀਚਿਜ਼ ਜੈਜ਼ ਫੈਸਟੀਵਲ ਤੇ ਟੋਰਾਂਟੋ ਹੋਂਡਾ ਇੰਡੀ ਵਰਗੇ ਈਵੈਂਟਸ ਵੀ ਨਹੀਂ ਕਰਵਾਏ ਜਾਂਣਗੇ।ਸਿਟੀ ਨੇ ਇਹ ਵੀ ਆਖਿਆ ਕਿ ਉਹ ਸਿਟੀ ਦੀ ਅਗਵਾਈ ਵਾਲੇ ਤੇ ਸਿਟੀ ਦੀ ਇਜਾਜ਼ਤ ਨਾਲ ਕਰਵਾਏ ਜਾਣ ਵਾਲੇ ਸਾਰੇ ਆਊਟਡੋਰ ਈਵੈਂਟਸ ਨੂੰ ਰੱਦ ਕਰਨ ਦਾ ਐਲਾਨ ਪਹਿਲਾਂ ਹੀ ਕਰ ਚੁੱਕੀ ਹੈ। ਇਸ ਵਿੱਚ ਕੈਨੇਡਾ ਡੇਅ ਦੇ ਜਸ਼ਨ ਵੀ ਸ਼ਾਮਲ ਹਨ। ਇਸ ਤੋਂ ਭਾਵ ਹੈ ਕਿ ਜੂਨੋ ਐਵਾਰਡਜ਼ ਤੇ ਪ੍ਰਾਈਡ ਪਰੇਡ ਵੀ ਵਰਚੂਅਲ ਈਵੈਂਟਸ ਵਜੋਂ ਹੀ ਕਰਵਾਏ ਜਾਣਗੇ।